Ufunuo 4

1Baada ya hayo nilitazama, na huko mbinguni palikuwa na mlango uliokuwa wazi. Ile sauti niliyoisikia mwanzoni, iliyokuwa kama tarumbeta ikizungumza nami, ilisema, “Njoo juu hapa, nikuonyeshe yale ambayo lazima yatokee.” Baada ya hayo, 2mara moja nilikuwa katika Roho, nikaona kiti cha enzi kimewekwa mbinguni, na mmoja ameketi juu yake. 3Yeye aliyeketi hapo alionekana kama yaspi na akiki, na kukizunguka kiti cha enzi kulikuwa na upinde wa mvua ulioonekana kama zumaridi. 4Kukizunguka kiti cha enzi kulikuwa na viti vingine vya enzi ishirini na vinne, na juu yake waliketi wazee ishirini na wanne, wamevaa mavazi meupe, na taji za dhahabu vichwani mwao. 5Miale ya umeme inatoka katika kiti cha enzi, pamoja na sauti na ngurumo. Mbele ya kiti cha enzi inawaka mienge saba ya moto, ambayo ni roho saba za Mungu, 6na mbele yake kuna kitu kinachoonekana kama bahari ya kioo, kama bilauri. Katikati ya kiti cha enzi na kukizunguka pande zote walikuwa viumbe hai wanne, wamejaa macho mbele na nyuma. 7Kiumbe wa kwanza alionekana kama simba; wa pili alionekana kama ng’ombe; wa tatu alikuwa na uso kama uso wa mwanadamu; na wa nne alionekana kama tai anayeruka. 8Viumbe hai hao wanne kila mmoja ana mabawa sita, nao wamejaa macho pande zote na ndani. Mchana na usiku hawapumziki, wakisema: “Mtakatifu, mtakatifu, mtakatifu, Bwana Mungu, Mwenyezi, aliyekuwepo, aliyepo, na anayekuja.” 9Kila mara viumbe hai wanapompa utukufu, heshima na shukrani yule aliyeketi juu ya kiti cha enzi, anayeishi milele na milele, 10wale wazee ishirini na wanne huanguka mbele yake na kumwabudu yule anayeishi milele na milele. Huzitupa taji zao mbele ya kiti cha enzi, wakisema: 11“Bwana wetu na Mungu wetu, wewe unastahili kupokea utukufu, heshima na uweza, kwa sababu wewe uliviumba vitu vyote: kwa kuwa ulipenda, vilikuwepo na viliumbwa.”