Ufunuo 8

1Alipouvunja muhuri wa saba, kukawa kimya kabisa mbinguni kwa karibu nusu saa. 2Nikawaona wale malaika saba wanaosimama mbele za Mungu; wakapewa tarumbeta saba.

3Kisha malaika mwingine akaja, akiwa ameshika chetezo cha dhahabu, akasimama kwenye madhabahu. Akakabidhiwa uvumba mwingi, ili auongeze kwenye maombi ya watu watakatifu wote wa Mungu juu ya madhabahu ya dhahabu iliyo mbele ya kiti cha enzi. 4Moshi wa uvumba ukapanda mbele za Mungu kutoka mkononi mwa malaika, pamoja na maombi ya watu watakatifu wa Mungu. 5Kisha malaika akakichukua chetezo, akakijaza moto kutoka madhabahuni, akakivurumisha duniani. Ngurumo zikavuma, kukawa na sauti kubwa na umeme wa radi, na nchi ikatetemeka.

6Kisha wale malaika saba walioshika tarumbeta saba wakajiweka tayari kuzipiga.

7Malaika wa kwanza alipopiga tarumbeta yake, mvua ya mawe na moto, vilivyochanganyika na damu, vikavurumishwa duniani. Theluthi ya nchi ikateketea, theluthi ya miti ikateketea, na kila jani bichi likateketea.

8Kisha malaika wa pili akapiga tarumbeta yake. Kitu kilichoonekana kama mlima mkubwa unaowaka moto kikavurumishwa baharini, na theluthi ya bahari ikawa damu. 9Theluthi ya viumbe vyenye uhai vilivyomo baharini ikafa, na theluthi ya meli ikavunjika.

10Malaika wa tatu akapiga tarumbeta yake, na kutoka angani ikashuka nyota kubwa, ikiwaka kama mwenge. Ikaangukia theluthi ya mito na chemchemi za maji. 11Jina la nyota hiyo ni Pakanga. Theluthi ya maji ikageuka kuwa pakanga, na watu wengi wakafa kwa sababu ya maji hayo, kwa kuwa yalikuwa yamekuwa machungu.

12Kisha malaika wa nne akapiga tarumbeta yake. Pigo likaipata theluthi ya jua, theluthi ya mwezi na theluthi ya nyota, na theluthi ya mwanga wao ikatiwa giza: kwa theluthi ya mchana hakuna kilichoangaza, na vivyo hivyo kwa usiku.

13Kisha nikatazama, nikamsikia tai akiruka juu kabisa angani, akiita kwa sauti kubwa: “Ole, ole, ole kwa wanaoishi duniani, kwa sababu ya milio ya tarumbeta ambazo malaika watatu waliobaki wako karibu kuzipiga!”