Ufunuo 10

1Kisha nikamwona malaika mwingine mwenye nguvu akishuka kutoka mbinguni. Alikuwa amevaa wingu kama vazi, na upinde wa mvua ulikuwa kama taji juu ya kichwa chake; uso wake uling’aa kama jua, na miguu yake ilikuwa kama nguzo za moto. 2Mkononi mwake alishika gombo dogo lililokuwa wazi. Akiuweka mguu wake wa kulia juu ya bahari na wa kushoto juu ya nchi kavu, 3akapaza sauti kwa sauti kuu, kama simba anavyonguruma. Alipokwisha kupaza sauti, zile ngurumo saba zikasema kwa sauti zao. 4Mara zile ngurumo saba zilipokwisha kusema, nilikuwa tayari kuandika, lakini sauti kutoka mbinguni ikaniambia, “Yatie muhuri maneno ya zile ngurumo saba; usiyaandike.” 5Yule malaika niliyekuwa nimemwona amesimama juu ya bahari na juu ya nchi kavu aliinua mkono wake wa kulia kuelekea mbinguni, 6akaapa kwa yeye anayeishi milele na milele, Muumba wa mbingu na vyote vilivyomo, wa dunia na vyote vilivyomo, na wa bahari na vyote vilivyomo, kwamba hakutakuwa tena na kukawia. 7Badala yake, siku zitakapofika za tarumbeta ya malaika wa saba, atakapokuwa karibu kuipiga, siri ya Mungu itatimizwa kikamilifu, kama habari njema aliyowatangazia watumishi wake manabii.

8Ile sauti kutoka mbinguni niliyokuwa nimeisikia ikasema nami tena. Ilisema, “Nenda ukalichukue gombo lililo wazi mkononi mwa malaika aliyesimama juu ya bahari na juu ya nchi kavu.” 9Nikamwendea malaika, nikamwambia anipe lile gombo dogo. Akaniambia, “Lichukue ulile lote. Litalifanya tumbo lako kuwa chungu, ingawa kinywani mwako litakuwa tamu kama asali.” 10Nikalichukua lile gombo dogo kutoka mkononi mwa malaika, nikalila lote. Kinywani mwangu lilikuwa tamu kama asali, lakini nilipokwisha kulila, tumbo langu likawa chungu.

11Kisha nikaambiwa, “Ni lazima utoe unabii tena kuhusu jamii nyingi, mataifa, lugha na wafalme.”