Ufunuo 12

1Ishara kubwa ikaonekana angani: mwanamke aliyevaa jua kama vazi lake, mwezi ukiwa chini ya miguu yake, na juu ya kichwa chake taji la nyota kumi na mbili. 2Alikuwa mjamzito, naye akalia kwa uchungu wa kuzaa, akiteseka ili ajifungue. 3Ishara nyingine ikaonekana angani: tazama, joka kubwa, jekundu kama moto, mwenye vichwa saba na pembe kumi, na juu ya vichwa vyake taji saba za kifalme. 4Kwa mkia wake anakokota theluthi ya nyota za mbinguni, naye akazitupa chini duniani. Joka akasimama mbele ya mwanamke aliyekuwa karibu kujifungua, akingoja kumla mtoto wake mara tu atakapozaliwa. 5Akazaa mwana, mtoto wa kiume, yule atakayeyachunga mataifa yote kwa fimbo ya chuma. Mtoto wake akanyakuliwa kwenda kwa Mungu, kwenye kiti chake cha enzi. 6Yule mwanamke akakimbilia nyikani. Huko Mungu amemwandalia mahali, ili atunzwe kwa siku 1,260.

7Kisha kukawa na vita mbinguni: Mikaeli na malaika zake wakaenda kupigana na joka. Joka na malaika zake wakapigana, 8lakini hakuwa na nguvu za kutosha, na hapakuwa tena na nafasi yao mbinguni. 9Joka yule kubwa akatupwa chini, yule nyoka wa zamani, anayeitwa Ibilisi na Shetani, mdanganyaji wa ulimwengu wote. Alitupwa chini duniani, na malaika zake wakatupwa chini pamoja naye.

10Nikasikia sauti kubwa mbinguni: “Wakati umefika! Wokovu umekuja, na uweza, na ufalme wa Mungu wetu, na mamlaka ya Kristo wake; kwa maana yule aliyekuwa akiwashtaki ndugu zetu mchana na usiku mbele ya Mungu wetu ametupwa nje. 11Wao wamemshinda kwa damu ya Mwanakondoo na kwa neno la ushuhuda wao; hawakuyaona maisha yao kuwa ya thamani, hata walipokabiliwa na kifo. 12Basi furahini, enyi mbingu, na wote wanaokaa ndani yake! Ole kwa nchi na bahari, kwa sababu Ibilisi ameshuka kwenu akiwa amejaa hasira kali, akijua kwamba muda aliobakiwa nao ni mfupi.”

13Joka alipoona kwamba ametupwa chini duniani, akamwinda yule mwanamke aliyemzaa mtoto wa kiume. 14Yule mwanamke akapewa mabawa mawili ya tai mkubwa ili aruke kwenda mahali pake nyikani, ambako anatunzwa mbali na nyoka kwa wakati, na nyakati, na nusu ya wakati. 15Kisha nyoka akamwaga maji kutoka kinywani mwake kama mto, yakimfuata yule mwanamke, ili mafuriko yamchukue. 16Lakini nchi ikamsaidia yule mwanamke: ikafungua kinywa chake, ikaumeza ule mto ambao joka alikuwa ameumwaga kutoka kinywani mwake. 17Kwa ghadhabu yake juu ya mwanamke, joka akaenda kupigana vita na wale waliosalia wa uzao wake, wanaozishika amri za Mungu na kuushikilia ushuhuda wa Yesu. 18Kisha joka akasimama juu ya mchanga wa ufukoni mwa bahari.