Yuda 1

1Kutoka kwa Yuda, mtumishi wa Yesu Kristo na ndugu yake Yakobo, kwa wale walioitwa, wanaopendwa na Mungu Baba na kulindwa salama kwa ajili ya Yesu Kristo. 2Rehema, amani na upendo viwe vyenu kwa wingi zaidi na zaidi.

3Wapendwa, nilipokuwa nikifanya kila juhudi kuwaandikia kuhusu wokovu tunaoushiriki sote, niliona sina budi kuwaandikia na kuwasihi mpigane kwa bidii kwa ajili ya imani ambayo watu wa Mungu walio watakatifu walikabidhiwa mara moja kwa daima. 4Kwa maana watu fulani wamejipenyeza kati yenu bila kutambuliwa. Zamani iliandikwa kwamba wangeipata hukumu hii. Ni watu wasiomcha Mungu, wanaoigeuza neema ya Mungu wetu kuwa kisingizio cha maisha yasiyo na haya, na wanaomkana Yesu Kristo, Bwana wetu wa pekee.

5Sasa nataka kuwakumbusha jambo fulani, ingawa tayari mnayajua yote. Yesu aliwaokoa watu kutoka nchi ya Misri, lakini baadaye aliwaangamiza wale miongoni mwao ambao hawakuamini. 6Na malaika ambao hawakukaa katika nafasi ya mamlaka waliyopewa, bali waliyaacha makao yao wenyewe, amewalinda katika minyororo ya daima, katika giza nene, tayari kwa hukumu ya siku ile kuu. 7Vivyo hivyo Sodoma na Gomora na miji iliyoizunguka, ambayo, kama malaika wale, ilijitia katika uasherati na kufuata mwili wa aina nyingine, sasa iko mbele yetu kama mfano, ikiteseka kwa adhabu ya moto wa milele.

8Hata hivyo, vivyo hivyo watu hawa wanaoota ndoto wanaitia miili yao unajisi, wanakataa mamlaka ya Bwana, na wanawatukana wenye utukufu. 9Lakini Mikaeli, malaika mkuu, alipokuwa akishindana na Ibilisi, akibishana juu ya mwili wa Musa, hakuthubutu kuleta juu yake hukumu ya matusi. Badala yake alisema, “Bwana akukemee.” 10Lakini watu hawa wanatukana mambo wasiyoyajua, na yale wanayoyajua kwa silika, kama wanyama wasioweza kufikiri, ndiyo hasa yanayowaangamiza. 11Ole wao! Wamefuata njia ya Kaini. Kwa ajili ya malipo wamejitosa katika upotevu wa Balaamu. Wameangamia katika uasi wa Kora. 12Katika karamu zenu za upendo watu hawa ni kama miamba iliyojificha chini ya maji. Wanakula pamoja nanyi bila hofu yoyote, wachungaji wanaojilisha wenyewe tu. Ni mawingu yasiyoleta mvua, yanayopeperushwa na upepo; miti ya mwishoni mwa vuli isiyo na matunda, iliyokufa mara mbili na kung’olewa na mizizi yake; 13mawimbi makali ya bahari, yanayotoa matendo yao ya aibu kama povu; nyota zinazotangatanga, ambazo kwa ajili yao giza jeusi kabisa limewekwa milele.

14Henoko, wa saba katika ukoo kutoka kwa Adamu, alitoa unabii pia kuhusu watu hawa. Alisema, “Tazama! Bwana anakuja pamoja na makumi ya maelfu ya watakatifu wake 15ili kuwahukumu wote, na kuwathibitishia hatia wote wasiomcha Mungu kwa kila tendo la kutomcha Mungu walilotenda katika kutomcha Mungu kwao, na kwa kila neno gumu ambalo wenye dhambi wasiomcha Mungu wamesema dhidi yake.” 16Watu hawa wananung’unika na kulalamikia fungu lao maishani. Wanaishi kwa kufuata tamaa zao wenyewe. Vinywa vyao vinasema maneno makubwa ya kujivuna, nao wanawabembeleza watu ili wapate faida kutoka kwao.

17Lakini ninyi, wapendwa, yakumbukeni maneno yaliyosemwa mapema na mitume wa Bwana wetu Yesu Kristo. 18Walikuwa wakiwaambia, “Katika wakati wa mwisho watakuja wadhihaki, wakiongozwa na tamaa zao wenyewe za kutomcha Mungu.” 19Watu hawa wanaleta mafarakano kati yenu. Ni watu wa kidunia, na Roho hayumo ndani yao. 20Lakini ninyi, wapendwa, endeleeni kujijenga juu ya imani yenu iliyo takatifu kabisa, na kuomba katika Roho Mtakatifu. 21Jilindeni ndani ya upendo wa Mungu, huku mkiitazamia rehema ya Bwana wetu Yesu Kristo inayoleta uzima wa milele. 22Wahurumieni wengine walio na mashaka. 23Waokoeni wengine kwa kuwanyakua kutoka motoni. Na wengine wahurumieni, lakini kwa hofu: chukieni hata nguo zilizochafuliwa na mwili wao wenye dhambi.

24Basi, kwa yule anayeweza kuwahifadhi msianguke, na kuwaleta mbele ya utukufu wake bila dosari na kwa shangwe kuu, 25kwa Mungu pekee, Mwokozi wetu, kupitia Yesu Kristo Bwana wetu, kuwe na utukufu, adhama, nguvu na mamlaka, tangu kabla ya mwanzo wa wakati, sasa, na milele yote. Amina.