3 Yohana 1

1Mzee, kwa rafiki yangu mpendwa Gayo, ninayempenda katika kweli.

2Rafiki mpendwa, ombi langu ni kwamba mambo yako yote yaende vizuri na uwe na afya njema, kama vile nafsi yako inavyoendelea vizuri. 3Nilifurahi sana ndugu walipofika na kushuhudia uaminifu wako kwa kweli, jinsi unavyoishi katika kweli. 4Hakuna furaha yangu iliyo kubwa kuliko hii: kusikia kwamba watoto wangu wanaishi katika kweli.

5Rafiki mpendwa, unatenda kwa uaminifu katika yote unayowafanyia ndugu, ingawa ni wageni kwako. 6Wameshuhudia upendo wako mbele ya kanisa. Utafanya vizuri ukiwapa mahitaji yao kwa ajili ya hatua inayofuata ya safari yao, kwa namna inayomstahili Mungu. 7Walianza safari kwa ajili ya Jina, nao hawapokei chochote kutoka kwa wapagani. 8Kwa hiyo ni wajibu wetu kuwakaribisha na kuwategemeza watu kama hao, na hivyo tuwe washirika katika kazi ya kweli.

9Nililiandikia kanisa maneno machache, lakini Diotrefe, anayependa kuwa wa kwanza kati yao, anakataa kutupokea. 10Ndiyo maana, nikija, nitalikumbusha kanisa mambo anayoyafanya, jinsi anavyoeneza maneno matupu na maovu juu yetu. Wala hilo halimtoshi: yeye mwenyewe hakubali kuwapokea ndugu, huwazuia wale wanaotaka kuwapokea, na kuwafukuza kanisani.

11Rafiki mpendwa, usiige mabaya, bali uige mema. Mtu anayetenda mema ametoka kwa Mungu; mtu anayetenda mabaya hajamwona Mungu. 12Kila mtu anamtolea Demetrio ushuhuda mzuri, na kweli yenyewe pia. Sisi nasi tunamtolea ushuhuda, nawe unajua kwamba ushuhuda wetu ni wa kweli.

13Kuna mengi ambayo ningeweza kukuandikia, lakini sitaki kuyaweka katika maandishi kwa wino na kalamu. 14Badala yake natumaini kukuona karibuni sana, na hapo tutaweza kuzungumza ana kwa ana. 15Amani iwe nawe. Marafiki walio hapa wanakutumia salamu. Msalimie kila mmoja wa marafiki walioko huko kwa jina lake.