2 Yohana 1

1Kutoka kwa mzee, kwa mama aliyechaguliwa na watoto wake. Ninawapenda katika kweli, wala si mimi peke yangu: wote waliokuja kuijua kweli wanawapenda pia. 2Tunawapenda kwa sababu ya kweli inayokaa ndani yetu, nayo itakuwa pamoja nasi milele. 3Neema, rehema na amani zitakuwa pamoja nasi kutoka kwa Mungu Baba na kutoka kwa Yesu Kristo, Mwana wa Baba, katika kweli na upendo.

4Nilifurahi sana nilipowakuta baadhi ya watoto wako wakiishi katika kweli, kwa kufuata amri tuliyopokea kutoka kwa Baba. 5Na sasa, mama, nina ombi kwako. Ninachokuandikia si amri mpya; ni ile ambayo tumekuwa nayo tangu mwanzo. Ninaomba tupendane. 6Upendo ndio huu: kwamba tuishi kwa kufuata amri zake. Na amri mliyoisikia tangu mwanzo ni hii: mnapaswa kuishi katika upendo. 7Kwa maana wapotoshaji wengi wametoka kwenda ulimwenguni, watu wasiomkiri Yesu Kristo kuwa amekuja katika mwili. Mtu wa namna hiyo ndiye mpotoshaji na mpinga-Kristo. 8Jihadharini, ili msipoteze kile tulichojitahidi kukifanikisha, bali mpokee thawabu yenu kamili. 9Kila anayevuka mipaka na asiyekaa katika mafundisho ya Kristo yuko bila Mungu. Lakini anayekaa katika mafundisho hayo ana Baba na Mwana pia. 10Mtu yeyote akija kwenu bila kuleta mafundisho haya, msimpokee nyumbani mwenu, wala msimsalimu. 11Kwa maana anayemsalimu mtu wa namna hiyo anakuwa mshirika katika matendo yake maovu.

12Kuna mambo mengi ambayo ningeweza kuwaandikia, lakini nimeamua kutoyaandika kwa karatasi na wino. Badala yake natumaini kuja kwenu na kuzungumza nanyi ana kwa ana, ili furaha yenu iwe kamili.

13Watoto wa dada yako aliyechaguliwa wanakutumia salamu.