1 Mambo ya Nyakati 29

1Kisha mfalme Daudi akaliambia kusanyiko lote, “Mungu amemchagua mwanangu Sulemani peke yake, lakini yeye ni kijana na hana uzoefu, na kazi hii ni kubwa, kwa sababu jumba hili si kwa ajili ya mwanadamu bali ni kwa ajili ya BWANA Mungu. 2Kwa nguvu zangu zote nimeiandalia nyumba ya Mungu wangu: dhahabu kwa vitu vya dhahabu na fedha kwa vitu vya fedha, shaba na chuma kwa vitu vitakavyotengenezwa kwa hivyo, na mbao kwa kazi ya mbao, pamoja na mawe ya shohamu na mawe ya kujaza, mawe meusi na mawe ya rangi nyingi, kila aina ya jiwe la thamani, na marmar kwa wingi. 3Zaidi ya hayo, kwa sababu ninapendezwa na nyumba ya Mungu wangu, ninatoa hazina yangu mwenyewe ya dhahabu na fedha kwa ajili ya nyumba ya Mungu wangu, zaidi ya yote niliyoiandalia nyumba takatifu: 4karibu tani 100 za dhahabu, dhahabu ya Ofiri, na karibu tani 240 za fedha iliyosafishwa kwa ajili ya kufunika kuta za majengo, 5dhahabu kwa vitu vya dhahabu na fedha kwa vitu vya fedha, na kwa kazi yote itakayofanywa na mafundi. Sasa ni nani aliye tayari kutoa kwa hiari na kujiweka wakfu leo kwa BWANA?” 6Kisha viongozi wa jamaa na viongozi wa makabila ya Israeli walitoa kwa hiari, pamoja na makamanda wa maelfu na wa mamia na maafisa waliosimamia kazi ya mfalme. 7Kwa ajili ya huduma ya nyumba ya Mungu walitoa karibu tani 170 na karibu kilo 84 za dhahabu, karibu tani 340 za fedha, karibu tani 610 za shaba na karibu tani 3,400 za chuma. 8Wote waliokuwa na mawe ya thamani waliyatoa kwa hazina ya nyumba ya BWANA, chini ya utunzaji wa Yehieli Mgershoni. 9Watu walifurahi kwa ajili ya matoleo hayo ya hiari, kwa maana walikuwa wamemtolea BWANA kwa hiari kwa moyo mkamilifu. Mfalme Daudi naye alifurahi kwa furaha kuu.

10Kisha Daudi akamhimidi BWANA mbele ya kusanyiko lote. Daudi akasema, “Uhimidiwe wewe, Ee BWANA, Mungu wa baba yetu Israeli, tangu milele hata milele. 11Ee BWANA, ukuu, uweza, utukufu, ushindi na enzi ni vyako; naam, kila kitu kilicho mbinguni na duniani ni chako. Ufalme ni wako, Ee BWANA, nawe umetukuzwa kuwa kichwa juu ya yote. 12Utajiri na heshima hutoka kwako; wewe unatawala juu ya kila kitu. Mkononi mwako mna nguvu na uweza, na ni mkononi mwako kumfanya yeyote mkuu na kuwapa wote nguvu. 13Basi sasa, Mungu wetu, tunakushukuru na kulisifu jina lako tukufu. 14Lakini mimi ni nani, na watu wangu ni nani, hata tuwe na uwezo wa kutoa kwa hiari namna hii? Kila kitu hutoka kwako; tulichokupa kimetoka mkononi mwako mwenyewe. 15Kwa maana sisi ni wageni mbele yako, na wakaazi wa muda tu, kama babu zetu wote walivyokuwa. Siku zetu duniani ni kama kivuli, bila tumaini la kudumu. 16Ee BWANA Mungu wetu, utajiri huu wote tuliokusanya ili kujenga nyumba kwa ajili ya jina lako takatifu umetoka mkononi mwako, na kila sehemu yake ni mali yako. 17Mungu wangu, najua kwamba wewe huuchunguza moyo, na unyofu hukupendeza. Kwa moyo mnyofu nimetoa vitu hivi vyote kwa hiari, na sasa nimewaona watu wako waliokusanyika hapa wakikutolea kwa hiari kwa furaha. 18Ee BWANA, Mungu wa babu zetu Abrahamu, Isaka na Israeli, idumishe nia hii milele katika makusudi na mawazo ya mioyo ya watu wako, na uielekeze mioyo yao kwako kwa uthabiti. 19Mpe mwanangu Sulemani moyo mkamilifu ili azishike amri zako, masharti yako na kanuni zako, azitimize zote, na alijenge jumba ambalo nimefanya maandalizi kwa ajili yake.”

20Kisha Daudi akaliambia kusanyiko lote, “Sasa mhimidini BWANA Mungu wenu.” Kusanyiko lote likamhimidi BWANA, Mungu wa babu zao. Wakainamisha vichwa vyao na kulala kifudifudi mbele ya BWANA na mbele ya mfalme. 21Kesho yake walimtolea BWANA dhabihu, wakamtolea BWANA sadaka za kuteketezwa: ng’ombe dume 1,000, kondoo dume 1,000 na wana-kondoo 1,000, kila mmoja pamoja na sadaka yake ya kinywaji, na dhabihu nyingi sana kwa ajili ya Israeli wote. 22Walikula na kunywa mbele za BWANA siku ile kwa furaha kuu. Kisha wakamfanya Sulemani mwana wa Daudi kuwa mfalme mara ya pili, wakampaka mafuta kuwa kiongozi kwa ajili ya BWANA, na Sadoki kuwa kuhani. 23Basi Sulemani aliketi juu ya kiti cha enzi cha BWANA kama mfalme, mahali pa baba yake Daudi. Akafanikiwa, na Israeli wote wakamtii. 24Maafisa wote na mashujaa, na pia wana wote wa mfalme Daudi, waliahidi utii wao kwa mfalme Sulemani. 25BWANA alimtukuza Sulemani mno machoni pa Israeli wote, akampa enzi ya kifalme ambayo hakuna mfalme wa Israeli kabla yake aliyekuwa nayo.

26Basi Daudi mwana wa Yese alitawala juu ya Israeli wote. 27Utawala wake juu ya Israeli ulidumu miaka arobaini: miaka saba alitawala huko Hebroni, na thelathini na mitatu huko Yerusalemu. 28Alikufa katika uzee mwema, akiwa ameshiba siku, utajiri na heshima, na mwanawe Sulemani akawa mfalme mahali pake. 29Matendo ya mfalme Daudi, tangu mwanzo hadi mwisho, yameandikwa katika kumbukumbu za Samweli mwonaji, kumbukumbu za Nathani nabii na kumbukumbu za Gadi mwonaji, 30pamoja na utawala wake wote na uweza wake, na mambo yaliyompata yeye, Israeli na falme zote za nchi.