1 Mambo ya Nyakati 16

1Waliliingiza sanduku la Mungu wakaliweka ndani ya hema ambalo Daudi alikuwa amelipigia. Kisha wakatoa sadaka za kuteketezwa na sadaka za amani mbele za Mungu. 2Daudi alipomaliza kutoa sadaka za kuteketezwa na sadaka za amani, aliwabariki watu kwa jina la BWANA. 3Aliwagawia pia chakula watu wote wa Israeli, wanaume na wanawake: kila mmoja mkate mmoja, andazi la tende na andazi la zabibu kavu. 4Aliwaweka baadhi ya Walawi wahudumu mbele ya sanduku la BWANA, ili kumwomba, kumshukuru na kumsifu BWANA, Mungu wa Israeli.

5Asafu alikuwa kiongozi, na wa pili kwake alikuwa Zekaria. Yeieli, Shemiramothi, Yehieli, Matithia, Eliabu, Benaya, Obed-edomu na Yeieli walipiga zeze na vinubi, naye Asafu alipiga matoazi. 6Makuhani Benaya na Yahazieli walipiga tarumbeta kwa kawaida mbele ya sanduku la agano la Mungu. 7Ilikuwa siku ile ambapo Daudi kwa mara ya kwanza aliwakabidhi Asafu na ndugu zake Walawi kazi ya kumshukuru BWANA:

8Mshukuruni BWANA, liitieni jina lake; waambieni mataifa yote aliyoyatenda. 9Mwimbieni, pigeni vinanda mkimsifu; zungumzeni mambo yote ya ajabu aliyoyatenda. 10Oneni fahari katika jina lake takatifu; wote wanaomtafuta BWANA wafurahi mioyoni mwao. 11Mgeukieni BWANA na nguvu zake; njooni mbele zake tena na tena. 12Yakumbukeni maajabu aliyoyafanya, ishara zake, na hukumu alizozitamka, 13ninyi wazao wa mtumishi wake Israeli, ninyi watoto wa Yakobo, aliowachagua. 14Yeye, BWANA, ndiye Mungu wetu; maamuzi yake yanaifikia dunia yote. 15Liwekeni agano lake mioyoni mwenu milele, ahadi aliyoiweka kwa vizazi elfu, 16agano alilofanya na Abrahamu, kiapo alichomwapia Isaka, 17naye akaliweka imara kwa Yakobo kuwa agizo, kwa Israeli kuwa agano linalodumu milele, 18akisema, “Nchi ya Kanaani nakupa wewe, fungu lililopimiwa ninyi kuwa urithi wenu.” 19Mlipokuwa kikundi kidogo tu cha watu, wageni wachache walioishi katika nchi ile, 20wakitangatanga kutoka taifa moja hadi jingine, kutoka ufalme mmoja hadi kwa watu wengine, 21hakumwacha mtu yeyote awadhulumu, na kwa ajili yao akawakaripia wafalme: 22“Msinyooshe mkono juu ya wapakwa mafuta wangu; msiwaumize manabii wangu.”

23Dunia yote, mwimbieni BWANA! Siku baada ya siku tangazeni habari njema za jinsi anavyookoa. 24Yaelezeni mataifa habari za utukufu wake, na watu wote habari za maajabu aliyoyatenda. 25Kwa maana BWANA ni mkuu na anastahili sifa kuu kuliko zote; yeye anapaswa kuheshimiwa kwa hofu kuliko kila mungu. 26Kwa maana kila mungu wanayemtumikia watu ni bure, ni sanamu tu, lakini ni BWANA aliyezifanya mbingu. 27Fahari na enzi vimesimama mbele yake; nguvu na furaha vimejaa mahali anapokaa. 28Mpeni BWANA anachostahili, enyi jamaa za mataifa; mpeni BWANA utukufu na uweza. 29Mpeni BWANA utukufu unaostahili jina lake; leteni zawadi mkaje mbele zake; inameni mbele za BWANA katika fahari takatifu. 30Tetemekeni mbele yake, dunia yote! Ulimwengu umesimama imara; hakuna kitakachoufanya uyumbe. 31Mbingu na zijae furaha na nchi ishangilie; na itangazwe kati ya mataifa, “BWANA ni Mfalme!” 32Bahari na ivume pamoja na vyote vinavyoishi ndani yake; mashamba na vyote vilivyomo na visherehekee. 33Ndipo miti ya msituni italia kwa furaha mbele za BWANA, kwa maana yuko njiani kuja kuihukumu nchi. 34Mshukuruni BWANA, kwa maana ni mwema; upendo wake usiokoma unadumu milele. 35Semeni pia, “Utuokoe, Ee Mungu Mwokozi wetu; utukusanye na kutuponya kutoka katikati ya mataifa, ili tulishukuru jina lako takatifu na kuona fahari katika kukusifu.” 36BWANA, Mungu wa Israeli, abarikiwe tangu zamani za kale hata zama zijazo! Kisha watu wote wakasema, “Amina!” wakamsifu BWANA.

37Basi Daudi akawaacha Asafu na ndugu zake Walawi huko mbele ya sanduku la agano la BWANA, wahudumu mbele ya sanduku kwa kawaida, kama kazi ya kila siku ilivyotaka. 38Akawaacha pia Obed-edomu na ndugu zao, jumla yao sitini na wanane, na Obed-edomu mwana wa Yeduthuni na Hosa kuwa mabawabu. 39Akamwacha kuhani Sadoki na makuhani wenzake mahali pa juu huko Gibeoni, mbele ya maskani ya BWANA, 40ili kumtolea BWANA sadaka za kuteketezwa juu ya madhabahu ya sadaka ya kuteketezwa kwa kawaida, asubuhi na jioni, kulingana na yote yaliyoandikwa katika sheria ya BWANA aliyowapa Israeli. 41Pamoja nao walikuwa Hemani na Yeduthuni na wengine wote waliochaguliwa na kutajwa mmoja mmoja kwa majina, ili kumshukuru BWANA, kwa maana upendo wake usiokoma unadumu milele. 42Hemani na Yeduthuni walikuwa na tarumbeta na matoazi kwa ajili ya wapigaji, na vyombo vya nyimbo za Mungu. Wana wa Yeduthuni walikuwa langoni. 43Kisha watu wote wakaenda, kila mtu nyumbani kwake, naye Daudi akarudi kuibariki jamaa yake.