1 Mambo ya Nyakati 14

1Hiramu mfalme wa Tiro alituma wajumbe kwa Daudi, pamoja na magogo ya mierezi, mafundi wa mawe na mafundi seremala, ili wamjengee jumba la kifalme. 2Ndipo Daudi akajua kwamba BWANA amemwimarisha kuwa mfalme juu ya Israeli, na ameuinua juu sana ufalme wake kwa ajili ya watu wake Israeli.

3Huko Yerusalemu Daudi alioa wake wengine, akawa baba wa wana na binti wengine. 4Majina ya watoto waliozaliwa kwake huko Yerusalemu ni haya: Shamua, Shobabu, Nathani, Sulemani, 5Ibhari, Elishua, Elpeleti, 6Noga, Nefegi, Yafia, 7Elishama, Beeliada na Elifeleti. 8Habari zilipowafikia Wafilisti kwamba Daudi amepakwa mafuta kuwa mfalme juu ya Israeli wote, jeshi lote la Wafilisti likapanda kumsaka. Lakini Daudi akasikia habari hiyo, akatoka kwenda kukabiliana nao. 9Basi Wafilisti walikuwa wamekuja wakavamia Bonde la Refaimu. 10Basi Daudi akamwuliza Mungu, “Je, nipande kupigana na Wafilisti? Je, wewe utawatia mikononi mwangu?” BWANA akamjibu, “Panda, nami nitawatia mikononi mwako.” 11Basi walipanda Baal-perasimu, naye Daudi akawashinda huko. Akasema, “Mungu amewavunja adui zangu kwa mkono wangu, kama maji yanavyobomoa kingo.” Ndiyo sababu mahali pale paliitwa Baal-perasimu. 12Wafilisti waliiacha miungu yao huko, na kwa amri ya Daudi ikachomwa moto.

13Kwa mara nyingine Wafilisti walivamia bonde hilo. 14Daudi alipomwuliza Mungu tena, Mungu alimjibu, “Usipande ukiwafuata. Zunguka mbali nao, uwashambulie ukitokea upande wa miti ya balsamu. 15Mara utakaposikia sauti ya watu wanaotembea juu ya vilele vya miti ya balsamu, toka uende vitani, kwa maana Mungu ametoka akutangulie kulishinda jeshi la Wafilisti.” 16Daudi alifanya kama vile Mungu alivyomwamuru, nao wakalishinda jeshi la Wafilisti njia yote kutoka Gibeoni mpaka Gezeri. 17Basi sifa za Daudi zikaenea katika kila nchi, naye BWANA akayafanya mataifa yote yamwogope.