1 Mambo ya Nyakati 21

1Shetani aliinuka dhidi ya Israeli, akamchochea Daudi kuwahesabu Israeli. 2Daudi akamwambia Yoabu na makamanda wa jeshi, “Nendeni mkawahesabu Israeli tangu Beer-sheba mpaka Dani, kisha mniletee habari, ili nijue wako wangapi.” 3Lakini Yoabu akasema, “BWANA na awazidishe watu wake mara mia kuliko walivyo! Bwana wangu mfalme, je, wote si watumishi wa bwana wangu? Kwa nini bwana wangu anataka jambo hili? Kwa nini liwe sababu ya hatia kwa Israeli?” 4Lakini amri ya mfalme ikashinda maoni ya Yoabu, kwa hiyo Yoabu akaondoka akapita katika Israeli yote, kisha akarudi Yerusalemu. 5Yoabu akampa Daudi jumla ya watu walioandikishwa: katika Israeli wote walikuwa wanaume 1,100,000 walioweza kutumia upanga, na katika Yuda wanaume 470,000 walioweza kutumia upanga. 6Lakini Lawi na Benyamini hakuwahesabu, kwa sababu Yoabu aliiona amri ya mfalme kuwa chukizo. 7Mungu hakupendezwa na jambo hili, naye akawapiga Israeli.

8Kisha Daudi akamwambia Mungu, “Nimetenda dhambi kubwa kwa kufanya hivi. Sasa tafadhali uondoe hatia ya mtumishi wako, kwa maana nimetenda kwa upumbavu sana.”

9BWANA akamwambia Gadi, mwonaji wa Daudi: 10“Nenda ukamwambie Daudi, ‘Hivi ndivyo BWANA asemavyo: Ninakupa mambo matatu. Chagua moja wapo, nami nitakutendea hilo.’” 11Basi Gadi akaenda kwa Daudi akamwambia, “Hivi ndivyo BWANA asemavyo: ‘Chagua upendavyo: 12miaka mitatu ya njaa; au miezi mitatu ya kufagiliwa na watesi wako, upanga wa adui zako ukikufikia; au siku tatu za upanga wa BWANA, yaani tauni katika nchi, malaika wa BWANA akileta maangamizi katika eneo lote la Israeli.’ Sasa amua ni jibu gani nimpelekee yule aliyenituma.”

13Daudi akamwambia Gadi, “Nimo katika dhiki kubwa. Na nianguke mkononi mwa BWANA, kwa maana rehema zake ni nyingi sana; lakini nisianguke mikononi mwa wanadamu.” 14Basi BWANA akaleta tauni juu ya Israeli, na watu 70,000 wa Israeli wakafa. 15Kisha Mungu akatuma malaika Yerusalemu ili kuuangamiza. Lakini malaika alipokuwa akileta maangamizi, BWANA akaona, akaghairi kuleta maafa hayo. Akamwambia malaika aliyekuwa akiangamiza, “Inatosha! Sasa zuia mkono wako.” Wakati huo malaika wa BWANA alikuwa amesimama karibu na uwanja wa kupuria wa Ornani Myebusi.

16Daudi alitazama juu akamwona malaika wa BWANA amesimama kati ya nchi na mbingu, ameshika mkononi upanga uliofutwa, umenyooshwa juu ya Yerusalemu. Daudi na wazee, waliovaa magunia, wakaanguka kifudifudi. 17Daudi akamwambia Mungu, “Je, si mimi niliyetoa amri watu wahesabiwe? Mimi ndiye niliyetenda dhambi na kufanya uovu mkubwa. Lakini kondoo hawa wamefanya nini? Ee BWANA Mungu wangu, tafadhali mkono wako uwe juu yangu na juu ya jamaa ya baba yangu, lakini usiache tauni hii iwapige watu wako.”

18Kisha malaika wa BWANA akamwambia Gadi amwambie Daudi apande akamjengee BWANA madhabahu katika uwanja wa kupuria wa Ornani Myebusi. 19Basi Daudi akapanda kama Gadi alivyomwambia kwa jina la BWANA. 20Ornani aligeuka akamwona malaika, nao wana wanne waliokuwa pamoja naye wakajificha. Ornani alikuwa akipura ngano. 21Daudi alipofika kwa Ornani, Ornani alitazama akamwona Daudi. Akatoka katika uwanja wa kupuria akainama mbele ya Daudi kifudifudi hadi chini. 22Daudi akamwambia Ornani, “Nipe mahali pa uwanja huu wa kupuria ili nimjengee BWANA madhabahu juu yake. Niuzie kwa bei yake kamili, ili tauni iliyowapata watu ikomeshwe.” 23Ornani akamwambia Daudi, “Uchukue, na bwana wangu mfalme na afanye chochote anachoona ni bora. Tazama, ninakupa ng’ombe kwa ajili ya sadaka za kuteketezwa, mbao za kupuria kuwa kuni, na ngano kwa ajili ya sadaka ya nafaka. Ninatoa yote.” 24Lakini mfalme Daudi akamwambia Ornani, “Hapana, ni lazima nikulipe bei yake kamili. Sitachukua kilicho chako kwa ajili ya BWANA, wala kutoa sadaka ya kuteketezwa isiyonigharimu chochote.” 25Basi Daudi akamlipa Ornani karibu kilo 6.9 za dhahabu kwa uzito kwa ajili ya mahali pale. 26Daudi akamjengea BWANA madhabahu huko, akatoa sadaka za kuteketezwa na sadaka za amani. Akamwita BWANA, naye BWANA akamjibu kwa kutuma moto kutoka mbinguni juu ya madhabahu ya sadaka ya kuteketezwa.

27Kisha BWANA akampa malaika amri, naye malaika akaurudisha upanga wake alani mwake. 28Wakati huo, Daudi alipoona kwamba BWANA amempa jibu katika uwanja wa kupuria wa Ornani Myebusi, akatoa dhabihu zake huko. 29Wakati huo maskani ya BWANA, iliyofanywa na Musa jangwani, na madhabahu ya sadaka ya kuteketezwa vilikuwa mahali pa juu huko Gibeoni. 30Lakini Daudi hakuweza kwenda huko kumtafuta Mungu, kwa sababu aliuogopa sana upanga wa malaika wa BWANA.