1 Mambo ya Nyakati 13

1Daudi alishauriana na makamanda wa maelfu na wa mamia, pamoja na kila mmoja wa viongozi. 2Kisha Daudi akaliambia kusanyiko lote la Israeli, “Kama mnakubali, na kama jambo hili linatoka kwa BWANA Mungu wetu, na tutume wajumbe pande zote kwa ndugu zetu Waisraeli waliobaki katika nchi zote za Israeli, na kwa makuhani na Walawi walio pamoja nao katika miji yao yenye malisho, ili wakusanyike kwetu. 3Kisha na tulirudishe kwetu sanduku la Mungu wetu, kwa maana hatukulitafuta katika siku za Sauli.” 4Kusanyiko lote likakubali kufanya hivyo, kwa sababu mpango huo ulionekana sawa kwa watu wote. 5Basi Daudi akawakusanya Israeli wote, kuanzia Shihori ya Misri mpaka Lebo-hamathi, ili kulileta sanduku la Mungu kutoka Kiriath-yearimu. 6Daudi na Israeli wote walipanda Baala, yaani Kiriath-yearimu, ulio wa Yuda, ili kulipandisha kutoka huko sanduku la Mungu, sanduku la BWANA anayeketi katika enzi juu ya makerubi, linaloitwa kwa jina lake. 7Waliliweka sanduku la Mungu juu ya gari jipya la kukokotwa, wakalitoa nyumbani kwa Abinadabu, huku Uza na Ahio wakiliendesha gari hilo. 8Daudi na Israeli wote walikuwa wakishangilia mbele za Mungu kwa nguvu zao zote, kwa nyimbo na kwa vinubi, zeze, matari, matoazi na tarumbeta. 9Walipofika kwenye uwanja wa kupuria wa Kidoni, Uza alinyosha mkono wake ili kulishika sanduku, kwa sababu ng’ombe walikuwa wamejikwaa. 10Ndipo hasira ya BWANA ikawaka dhidi ya Uza, naye akampiga kwa sababu alikuwa amenyosha mkono wake kwenye sanduku. Akafa hapo mbele za Mungu. 11Daudi alikasirika kwa sababu BWANA alikuwa amemfurikia Uza kwa hasira, akapaita mahali pale Peres-uza, jina ambalo pana mpaka leo. 12Siku ile Daudi alimwogopa Mungu, akasema, “Nitawezaje kulileta kwangu sanduku la Mungu?” 13Basi Daudi hakulipeleka sanduku katika mji wa Daudi likae pamoja naye. Badala yake aligeuka akalipeleka nyumbani kwa Obed-edomu Mgiti. 14Sanduku la Mungu lilikaa kwa miezi mitatu pamoja na watu wa nyumbani mwa Obed-edomu katika nyumba yake, naye BWANA akawabariki watu wa nyumbani mwa Obed-edomu na kila kitu alichokuwa nacho.