1 Mambo ya Nyakati 20

1Mwaka ulipozunguka tena, majira ambayo wafalme hutoka kwenda vitani, Yoabu aliliongoza jeshi lote kwa nguvu. Akaiharibu nchi ya Waamoni, kisha akaja akauzingira mji wa Raba. Lakini Daudi mwenyewe alibaki Yerusalemu. Yoabu akaushambulia Raba akaubomoa. 2Daudi alichukua taji kutoka kichwani mwa mfalme wao. Akaona kwamba lilikuwa na uzito wa karibu kilo 34 ya dhahabu, na lilikuwa na jiwe la thamani, nalo likawekwa juu ya kichwa cha Daudi. Akatoa pia nyara nyingi sana kutoka mjini. 3Akawatoa watu waliokuwa mjini akawakata kwa misumeno, kwa sururu za chuma na kwa misumeno mingine. Daudi alifanya vivyo hivyo kwa miji yote ya Waamoni. Kisha Daudi na askari wote wakarudi Yerusalemu.

4Baada ya hayo vita vilizuka na Wafilisti huko Gezeri. Wakati huo Sibekai Mhushathi akamwua Sipai, mmoja wa wazao wa Warefai, na Wafilisti wakatiishwa. 5Kulikuwa na vita vingine na Wafilisti, na Elhanani mwana wa Yairi akamwua Lahmi ndugu wa Goliathi wa Gathi, ambaye mkuki wake ulikuwa na mpini kama mti wa mfumaji. 6Kulikuwa na vita vingine huko Gathi, ambako palikuwa na mtu mrefu sana mwenye vidole sita kila mkono na vidole sita kila mguu, ishirini na vinne kwa jumla. Yeye pia alikuwa mzao wa Rafa. 7Alipowatukana Israeli, Yonathani mwana wa Shimea, ndugu wa Daudi, akamwua. 8Hawa walikuwa wazao wa Rafa huko Gathi, nao wakaanguka kwa mikono ya Daudi na watu wake.