1 Mambo ya Nyakati 17

1Daudi alipokuwa ametulia katika nyumba yake, alimwambia Nathani nabii, “Tazama, mimi ninaishi katika nyumba ya mierezi, lakini sanduku la agano la BWANA linakaa chini ya mapazia ya hema.” 2Nathani akamwambia Daudi, “Fanya yote uliyo nayo moyoni, kwa maana Mungu yu pamoja nawe.”

3Lakini usiku ule ule neno la Mungu lilimjia Nathani: 4“Nenda ukamwambie mtumishi wangu Daudi, ‘Hivi ndivyo BWANA asemavyo: Wewe si wewe utakayenijengea nyumba ya kuishi. 5Sijaishi katika nyumba tangu siku nilipowapandisha Israeli mpaka leo. Nimekuwa nikihama kutoka hema moja hadi jingine, na kutoka maskani moja hadi nyingine. 6Popote nilipotembea kati ya Israeli wote, je, niliwahi kusema neno na yeyote wa waamuzi wa Israeli niliowaamuru kuwachunga watu wangu, nikiuliza, “Kwa nini hamjanijengea nyumba ya mierezi?”’ 7Basi sasa, mwambie mtumishi wangu Daudi hivi: ‘Hivi ndivyo BWANA wa majeshi asemavyo: Nilikutwaa kutoka malishoni, ulipokuwa ukifuata kondoo, uwe kiongozi juu ya watu wangu Israeli. 8Popote ulipokwenda nimekuwa pamoja nawe, nami nimewaangamiza adui zako wote mbele yako. Sasa nitalifanya jina lako kama majina ya watu wakuu kabisa duniani. 9Nitawachagulia watu wangu Israeli mahali na kuwapanda huko, ili wakae mahali pao wenyewe wasisumbuliwe tena. Watu waovu hawatawadhoofisha tena kama walivyofanya hapo mwanzo, 10tangu wakati nilipoweka waamuzi juu ya watu wangu Israeli. Nami nitawanyenyekesha adui zako wote. Nami nakutangazia kwamba BWANA atakujengea nyumba. 11Siku zako zitakapotimia nawe ukaenda kuwa pamoja na babu zako, nitamwinua mzao wako baada yako, mmoja wa wana wako mwenyewe, nami nitauimarisha ufalme wake. 12Yeye ndiye atakayenijengea nyumba, nami nitakiimarisha kiti chake cha enzi milele. 13Mimi nitakuwa baba yake, naye atakuwa mwanangu. Sitaziondoa fadhili zangu kwake, kama nilivyoziondoa kwa yule aliyekuwa kabla yako. 14Nitamweka imara juu ya nyumba yangu na ufalme wangu milele, na kiti chake cha enzi kitasimama imara daima.’” 15Nathani alimwambia Daudi sawasawa na maneno haya yote na maono haya yote.

16Kisha mfalme Daudi aliingia akaketi mbele za BWANA, akasema, “Ee BWANA Mungu, mimi ni nani, na nyumba yangu ni nini, hata wewe umenifikisha hapa? 17Na kana kwamba hili lilikuwa dogo machoni pako, Ee Mungu, umesema pia kuhusu nyumba ya mtumishi wako kwa siku nyingi zijazo. Umeniangalia kama mtu wa cheo cha juu, Ee BWANA Mungu. 18Daudi aweza kukuambia nini zaidi kuhusu heshima uliyompa mtumishi wako? Wewe unamjua mtumishi wako. 19Ee BWANA, kwa ajili ya mtumishi wako na kama moyo wako ulivyochagua, umefanya jambo hili kuu, ili kuyajulisha mambo haya yote makuu. 20Ee BWANA, hakuna aliye kama wewe, wala hakuna Mungu ila wewe, kama yote tuliyosikia kwa masikio yetu wenyewe yanavyotuambia. 21Ni nani aliye kama watu wako Israeli, taifa pekee duniani ambalo Mungu alikwenda kulikomboa liwe watu wake mwenyewe? Ulijifanyia jina kwa matendo makuu na ya kutisha, ukiyafukuza mataifa mbele ya watu wako, uliowakomboa kutoka Misri. 22Umewafanya watu wako Israeli kuwa watu wako mwenyewe milele, nawe, Ee BWANA, umekuwa Mungu wao. 23Basi sasa, Ee BWANA, neno ulilosema kuhusu mtumishi wako na kuhusu nyumba yake na lisimame imara milele, ukafanye kama ulivyosema. 24Na lisimame imara, na jina lako liwe kuu milele, watu wakisema, ‘BWANA wa majeshi, Mungu wa Israeli, ni Mungu wa Israeli!’ Nayo nyumba ya mtumishi wako Daudi itasimama imara mbele yako. 25Kwa maana wewe, Mungu wangu, umemfunulia mtumishi wako kwamba utamjengea nyumba. Ndiyo sababu mtumishi wako amepata ujasiri wa kuomba mbele yako. 26Na sasa, Ee BWANA, wewe ndiwe Mungu, nawe umemwahidi mtumishi wako jambo hili jema. 27Basi sasa umeona vema kuibariki nyumba ya mtumishi wako, ili idumu mbele yako milele. Kwa maana wewe, Ee BWANA, umeibariki, nayo imebarikiwa milele.”