1 Mambo ya Nyakati 26

1Hizi ndizo zilizokuwa zamu za mabawabu. Kutoka kwa Wakora alikuja Meshelemia mwana wa Kore, wa wana wa Asafu. 2Meshelemia alikuwa na wana: Zekaria mzaliwa wa kwanza, Yediaeli wa pili, Zebadia wa tatu, Yathnieli wa nne, 3Elamu wa tano, Yehohanani wa sita na Elihoenai wa saba. 4Obed-edomu alikuwa na wana: Shemaya mzaliwa wa kwanza, Yehozabadi wa pili, Yoa wa tatu, Sakari wa nne, Nethaneli wa tano, 5Amieli wa sita, Isakari wa saba na Peulethai wa nane. Kwa maana Mungu alikuwa amembariki.

6Mwanawe Shemaya naye alizaliwa wana, nao walikuwa viongozi katika jamaa ya baba yao, kwa maana walikuwa mashujaa hodari. 7Wana wa Shemaya: Othni, Refaeli, Obedi na Elzabadi, ambaye ndugu zake Elihu na Semakia walikuwa watu stadi. 8Hawa wote walikuwa wazao wa Obed-edomu. Wao, wana wao na ndugu zao walikuwa watu stadi, wenye nguvu za kutosha kwa kazi hiyo: sitini na wawili kutoka jamaa ya Obed-edomu. 9Meshelemia alikuwa na wana na ndugu waliokuwa watu stadi, kumi na wanane kwa jumla.

10Hosa, mmoja wa wazao wa Merari, alikuwa na wana: Shimri mkuu (ingawa hakuwa mzaliwa wa kwanza, baba yake alimfanya mkuu), 11Hilkia wa pili, Tebalia wa tatu na Zekaria wa nne. Wana na ndugu wa Hosa walikuwa kumi na watatu kwa jumla. 12Zamu hizi za mabawabu, chini ya wakuu wao, zilikuwa na kazi za huduma katika nyumba ya BWANA, kama ndugu zao walivyokuwa nazo. 13Walipiga kura kwa ajili ya kila lango kwa jamaa za baba zao, mdogo na mkubwa vilevile.

14Kura ya mashariki ilimwangukia Shelemia. Kisha wakampigia kura mwanawe Zekaria, mshauri mwenye hekima, na kura yake ikatoka kwa ajili ya kaskazini.

15Kura ya Obed-edomu ilikuwa ya kusini, na wanawe wakapewa ghala. 16Shupimu na Hosa walipewa magharibi, pamoja na Lango la Shalekethi kwenye barabara inayopanda. Kila kituo cha ulinzi kilikuwa na kingine kando yake. 17Upande wa mashariki walikuwa Walawi sita, kaskazini wanne kila siku, kusini wanne kila siku, na kwenye ghala walihudumu wawili wawili. 18Kwenye Parbari upande wa magharibi kulikuwa na wanne barabarani na wawili kwenye Parbari yenyewe. 19Hizi ndizo zilizokuwa zamu za mabawabu katika wazao wa Kora na wa Merari. 20Katika Walawi, Ahiya alisimamia hazina za nyumba ya Mungu na hazina za vitu vilivyowekwa wakfu. 21Kutoka kwa wana wa Ladani, Wagershoni waliotokana na Ladani na wakuu wa jamaa za Ladani Mgershoni, alikuja Yehieli. 22Wana wa Yehieli, Zethamu na ndugu yake Yoeli, walisimamia hazina za nyumba ya BWANA. 23Kutoka kwa Waamramu, Waishari, Wahebroni na Wauzieli: 24Shebueli mwana wa Gershomu, mwana wa Musa, alikuwa afisa mkuu aliyesimamia hazina. 25Ndugu zake kupitia Eliezeri walikuwa Rehabia mwanawe, Yeshaya mwanawe, Yoramu mwanawe, Zikri mwanawe na Shelomothi mwanawe. 26Huyu Shelomothi na ndugu zake walisimamia hazina zote za vitu vilivyowekwa wakfu ambavyo mfalme Daudi alikuwa ameviweka wakfu, pamoja na wakuu wa jamaa, makamanda wa maelfu na wa mamia, na makamanda wa jeshi. 27Waliweka wakfu sehemu ya nyara za vita ili kuitegemeza nyumba ya BWANA. 28Kila kitu kilichowekwa wakfu na Samweli mwonaji, Sauli mwana wa Kishi, Abneri mwana wa Neri na Yoabu mwana wa Seruya, kila kitu kilichowekwa wakfu, kilikuwa chini ya utunzaji wa Shelomithi na ndugu zake.

29Kutoka kwa Waishari, Kenania na wanawe walipewa kazi nje ya hekalu, juu ya Israeli, kama maafisa na waamuzi. 30Kutoka kwa Wahebroni, Hashabia na ndugu zake, watu stadi 1,700, walisimamia Israeli upande wa magharibi wa Yordani, kwa ajili ya kazi yote ya BWANA na huduma ya mfalme. 31Yeria alikuwa mkuu wa Wahebroni, kwa kufuata kumbukumbu za vizazi vya jamaa zao. Katika mwaka wa arobaini wa utawala wa Daudi uchunguzi ulifanywa, na mashujaa hodari kati yao wakaonekana huko Yazeri katika Gileadi. 32Ndugu za Yeria, watu stadi 2,700, walikuwa wakuu wa jamaa. Mfalme Daudi aliwaweka kusimamia Wareubeni, Wagadi na nusu ya kabila la Manase katika kila jambo la Mungu na kila jambo la mfalme.