1 Mambo ya Nyakati 28

1Daudi aliwakusanya maafisa wote wa Israeli huko Yerusalemu: maafisa wa makabila, makamanda wa zamu zilizomtumikia mfalme, makamanda wa maelfu na makamanda wa mamia, na maafisa waliosimamia mali yote na mifugo iliyokuwa ya mfalme na wanawe, pamoja na maafisa wa ikulu, mashujaa na kila shujaa hodari. 2Mfalme Daudi alisimama akasema, “Nisikilizeni, ndugu zangu na watu wangu. Nilikuwa nimeweka moyoni mwangu kujenga nyumba ambamo sanduku la agano la BWANA lingepumzika, kiti cha kuwekea miguu cha Mungu wetu, nami nikafanya maandalizi ya kuijenga. 3Lakini Mungu aliniambia, ‘Hutajenga nyumba kwa ajili ya jina langu, kwa maana wewe ni mtu wa vita, nawe umemwaga damu.’ 4Hata hivyo, BWANA, Mungu wa Israeli, alinichagua katika jamaa yangu yote niwe mfalme juu ya Israeli milele. Alimchagua Yuda awe kiongozi, na katika watu wa Yuda akaichagua jamaa ya baba yangu, na katika wana wa baba yangu alipendezwa kunifanya mfalme juu ya Israeli wote. 5Na katika wana wangu wote, kwa maana BWANA amenipa wana wengi, amemchagua mwanangu Sulemani aketi juu ya kiti cha enzi cha ufalme wa BWANA juu ya Israeli. 6Akaniambia, ‘Mwanao Sulemani ndiye atakayejenga nyumba yangu na nyua zangu. Nimemchagua kuwa mwanangu, nami nitakuwa baba yake. 7Nitauimarisha ufalme wake milele ikiwa atashikilia kwa uthabiti kuzitenda amri zangu na maamuzi yangu, kama anavyofanya leo.’ 8Basi sasa, mbele ya macho ya Israeli wote, kusanyiko la BWANA, na Mungu wetu akisikia, nawaagiza: shikeni amri zote za BWANA Mungu wenu na kuzitafuta, ili mpate kuendelea kuimiliki nchi hii nzuri na kuwaachia wazao wenu baada yenu iwe urithi wao milele.

9Na wewe, mwanangu Sulemani, umjue Mungu wa baba yako, umtumikie kwa moyo usiogawanyika na kwa nafsi iliyo radhi, kwa maana BWANA huchunguza kila moyo na kuelewa kila kusudi lililo nyuma ya mawazo ya watu. Ukimtafuta, atakuwezesha kumpata; lakini ukimwacha, atakukataa milele. 10Fikiri hili sasa: BWANA amekuchagua kujenga nyumba iwe mahali patakatifu. Uwe hodari uifanye kazi hii.”

11Kisha Daudi akampa mwanawe Sulemani michoro ya baraza ya hekalu, majengo yake, hazina zake, vyumba vyake vya juu, vyumba vyake vya ndani na chumba cha kiti cha rehema, 12na michoro ya yote aliyokuwa nayo akilini: nyua za nyumba ya BWANA na vyumba vyote vilivyoizunguka, hazina za nyumba ya Mungu na hazina za vitu vilivyowekwa wakfu, 13kwa ajili ya zamu za makuhani na Walawi, kwa ajili ya kazi yote ya huduma katika nyumba ya BWANA, na kwa ajili ya vyombo vyote vilivyotumika katika huduma ya nyumba ya BWANA, 14uzito wa dhahabu kwa ajili ya vyombo vyote vya dhahabu vilivyotumika katika kila aina ya huduma, na uzito wa fedha kwa ajili ya vyombo vyote vya fedha vilivyotumika katika kila aina ya huduma, 15uzito wa vinara vya dhahabu na taa zake za dhahabu, pamoja na uzito wa kila kinara na taa zake; na uzito wa vinara vya fedha, kwa kila kinara na taa zake, kulingana na matumizi ya kila kinara, 16uzito wa dhahabu kwa kila meza ya safu za mikate mitakatifu, na fedha kwa ajili ya meza za fedha, 17dhahabu safi kwa ajili ya nyuma, mabakuli na magudulia; uzito wa dhahabu kwa kila bakuli la dhahabu, na uzito wa fedha kwa kila bakuli la fedha, 18na uzito wa dhahabu iliyosafishwa kwa ajili ya madhabahu ya uvumba; na mchoro wa gari, yaani makerubi ya dhahabu yaliyotandaza mabawa yao na kulifunika sanduku la agano la BWANA. 19Daudi akasema, “Haya yote yamo katika maandishi kutoka mkononi mwa BWANA juu yangu. Yeye alinifahamisha mambo yote ya mpango huu.”

20Daudi akamwambia mwanawe Sulemani, “Uwe hodari na mwenye moyo mkuu, uifanye kazi. Usiogope wala usikate tamaa, kwa maana BWANA Mungu, Mungu wangu, yu pamoja nawe. Hatakuachilia wala hatakutupa mpaka utakapomaliza kazi yote ya huduma ya nyumba ya BWANA. 21Tazama, zamu za makuhani na Walawi ziko hapa kwa ajili ya kila aina ya huduma katika nyumba ya Mungu. Kila mtu aliye radhi na mwenye ustadi kwa huduma yoyote atakuwa pamoja nawe katika kazi yote, na maafisa na watu wote watafanya lolote utakaloamuru.”