1 Mambo ya Nyakati 11

1Kisha Israeli wote walikusanyika kwa Daudi huko Hebroni. Wakamwambia, “Tazama, sisi ni mfupa wako na nyama yako mwenyewe. 2Hapo zamani, hata Sauli alipokuwa akitawala, wewe ndiwe uliyewaongoza Israeli kwenda vitani na kuwarudisha. Naye BWANA Mungu wako alikuambia, ‘Wewe ndiwe utakayewachunga watu wangu Israeli; utakuwa kiongozi juu ya watu wangu Israeli.’” 3Wazee wote wa Israeli walipokuwa wamefika kwa mfalme huko Hebroni, Daudi alifanya agano nao huko mbele za BWANA, nao wakampaka Daudi mafuta awe mfalme juu ya Israeli, kama BWANA alivyoahidi kupitia Samweli.

4Kisha Daudi na Israeli wote walikwenda kuushambulia Yerusalemu, yaani Yebusi, walikokaa Wayebusi, wenyeji wa nchi ile. 5Watu wa Yebusi walimwambia Daudi, “Hutaingia humu.” Lakini Daudi aliiteka ngome ya Sayuni, ambayo sasa ni mji wa Daudi. 6Daudi alikuwa amesema, “Yeyote atakayekuwa wa kwanza kumpiga Myebusi atakuwa mkuu na jemadari.” Yoabu mwana wa Seruya alipanda kwanza, hivyo akawa mkuu. 7Daudi alifanya makao yake katika ngome hiyo, na ndiyo sababu uliitwa mji wa Daudi. 8Aliujenga mji pande zote, kuanzia Milo mpaka eneo lililouzunguka, naye Yoabu akaikarabati sehemu iliyobaki ya mji. 9Daudi alizidi kuwa mkuu zaidi na zaidi, kwa maana BWANA wa majeshi alikuwa pamoja naye.

10Hawa ndio wakuu wa mashujaa wa Daudi, waliomuunga mkono kwa nguvu katika ufalme wake, pamoja na Israeli wote, ili kumfanya mfalme, kama BWANA alivyoahidi kuhusu Israeli.

11Hii ndiyo orodha ya mashujaa wa Daudi. Yashobeamu mwana wa Hakmoni alikuwa mkuu wa wale Thelathini. Aliuinua mkuki wake dhidi ya watu mia tatu akawaua wakati mmoja. 12Aliyefuata baada yake alikuwa Eleazari mwana wa Dodo Mwahohi. Yeye alikuwa mmoja wa wale mashujaa watatu. 13Yeye alikuwa pamoja na Daudi huko Pas-damimu wakati Wafilisti walipokuwa wamekusanyika huko kwa vita. Palikuwa na kipande cha shamba kilichojaa shayiri, na askari wakawakimbia Wafilisti. 14Lakini wao wakasimama imara katikati ya shamba hilo, wakalilinda, wakawapiga Wafilisti, naye BWANA akawaokoa kwa ushindi mkuu. 15Wakati mmoja wakuu watatu wa wale Thelathini walishuka mwambani wakajiunga na Daudi kwenye pango la Adulamu, wakati jeshi la Wafilisti lilipokuwa limepiga kambi katika Bonde la Refaimu. 16Wakati huo Daudi alikuwa ngomeni, na kikosi cha askari wa Kifilisti kilikuwa Bethlehemu. 17Daudi akatamani akasema, “Laiti mtu angeniletea maji ya kunywa kutoka kisima cha Bethlehemu, kile kilicho karibu na lango!” 18Basi wale watatu wakapenya kambi ya Wafilisti, wakateka maji kutoka kisima cha Bethlehemu kilichokuwa karibu na lango, wakamletea Daudi. Lakini Daudi hakukubali kuyanywa. Badala yake akayamimina kuwa sadaka kwa BWANA. 19Akasema, “Mbele za Mungu wangu, mbali nami kufanya hivi! Je, ninywe damu ya watu hawa waliokwenda kwa kuhatarisha maisha yao? Kwa maana wamehatarisha maisha yao ili kuyaleta.” Kwa hiyo hakukubali kuyanywa. Hayo ndiyo matendo ya wale mashujaa watatu. 20Abishai, ndugu wa Yoabu, alikuwa mkuu wa wale Watatu. Aliuinua mkuki wake dhidi ya watu mia tatu akawaua, akapata jina pamoja na wale Watatu. 21Aliheshimiwa maradufu kuliko wale Watatu, akawa kamanda wao, lakini hakufikia cheo cha wale Watatu.

22Benaya mwana wa Yehoyada alikuwa mwana wa mtu shujaa wa Kabseeli aliyefanya matendo makuu. Aliwaua mashujaa wawili wa Moabu. Pia alishuka ndani ya shimo siku ya theluji akamwua simba. 23Pia alimwua Mmisri mmoja, mtu mrefu sana, mwenye kimo cha karibu mita 2.25. Mmisri huyo alikuwa na mkuki mkononi kama mti wa mfumaji, lakini Benaya akamwendea na rungu, akaunyakua mkuki kutoka mkononi mwa Mmisri, akamwua kwa silaha yake mwenyewe. 24Hayo ndiyo matendo ya Benaya mwana wa Yehoyada, naye akapata jina pamoja na wale mashujaa watatu. 25Aliheshimiwa kuliko wale Thelathini, lakini hakufikia cheo cha wale Watatu. Naye Daudi akamweka kuwa mkuu wa walinzi wake.

26Mashujaa wa jeshi walikuwa Asaheli ndugu wa Yoabu, Elhanani mwana wa Dodo wa Bethlehemu,

27Shamothi Mharori, Helesi Mpeloni,

28Ira mwana wa Ikeshi Mtekoa, Abiezeri Mwanathothi,

29Sibekai Mhushathi, Ilai Mwahohi,

30Maharai Mnetofathi, Heledi mwana wa Baana Mnetofathi,

31Itai mwana wa Ribai kutoka Gibea ya Wabenyamini, Benaya Mpirathoni, 32Hurai wa mabonde ya Gaashi, Abieli Mwarbathi,

33Azmawethi Mbaharumi, Eliaba Mshaalboni,

34wana wa Hashemu Mgizoni, Yonathani mwana wa Shage Mharari,

35Ahiamu mwana wa Sakari Mharari, Elifali mwana wa Uri,

36Heferi Mmekerathi, Ahiya Mpeloni,

37Hesro Mkarmeli, Naarai mwana wa Ezbai,

38Yoeli ndugu wa Nathani, Mibhari mwana wa Hagri,

39Seleki Mwamoni, Naharai Mbeerothi, mbeba silaha wa Yoabu mwana wa Seruya,

40Ira Mwithri, Garebu Mwithri,

41Uria Mhiti, Zabadi mwana wa Alai,

42Adina mwana wa Shiza Mreubeni, mkuu wa Wareubeni, na watu thelathini pamoja naye,

43Hanani mwana wa Maaka, Yoshafati Mmithni,

44Uzia Mwashterathi, Shama na Yeieli wana wa Hothamu Mwaroeri,

45Yediaeli mwana wa Shimri, na Yoha nduguye, Mtizi,

46Elieli Mmahawi, Yeribai na Yoshavia wana wa Elnaamu, Ithma Mmoabu, 47Elieli, Obedi na Yaasieli Mmesoba.