1 Mambo ya Nyakati 22

1Kisha Daudi akatangaza, “Hapa ndipo nyumba ya BWANA Mungu, na hapa ndipo madhabahu ya sadaka ya kuteketezwa kwa ajili ya Israeli.”

2Basi Daudi akaagiza wakusanywe wageni waliokuwa wakiishi katika nchi ya Israeli, akaweka wachonga mawe kuchonga mawe kwa ajili ya kujenga nyumba ya Mungu. 3Daudi aliandaa chuma kingi kwa ajili ya misumari ya milango ya malango na kwa ajili ya vifungo, na shaba nyingi kuliko ingeweza kupimwa. 4Pia kulikuwa na magogo ya mierezi yasiyohesabika, kwa maana Wasidoni na Watiro walikuwa wamemletea Daudi mierezi mingi sana.

5Daudi akasema, “Sulemani mwanangu ni kijana na hana uzoefu, na nyumba itakayojengwa kwa ajili ya BWANA lazima iwe kuu kupita kiasi, ili sifa zake na fahari yake zifike katika nchi zote. Basi na niiandalie mahitaji yake.” Kwa hiyo kabla ya kifo chake Daudi aliweka akiba ya vifaa vingi sana. 6Kisha akamwita mwanawe Sulemani, akamwagiza kumjengea BWANA, Mungu wa Israeli, nyumba.

7Daudi akamwambia Sulemani, “Mwanangu, ilikuwa nia yangu mwenyewe kujenga nyumba kwa ajili ya jina la BWANA Mungu wangu. 8Lakini neno la BWANA likanijia: ‘Umemwaga damu nyingi sana na kupigana vita vikubwa. Hutajenga nyumba kwa ajili ya jina langu, kwa sababu ya damu yote uliyoimwaga juu ya nchi mbele yangu. 9Tazama, utazaliwa mwana, naye atakuwa mtu wa raha. Nitampa raha kutoka kwa adui zake wote wanaomzunguka. Kwa maana jina lake litakuwa Sulemani, nami nitawapa Israeli amani na utulivu katika siku zake. 10Yeye ndiye atakayejenga nyumba kwa ajili ya jina langu. Yeye atakuwa mwanangu, nami nitakuwa baba yake, nami nitakiimarisha kiti cha enzi cha ufalme wake juu ya Israeli milele.’ 11Sasa, mwanangu, BWANA na awe pamoja nawe, ili ufanikiwe unapoijenga nyumba ya BWANA Mungu wako, kama vile alivyoahidi kuhusu wewe. 12Zaidi ya yote, BWANA na akujalie busara na ufahamu atakapokuweka juu ya Israeli, ili uishike sheria ya BWANA Mungu wako. 13Ndipo utafanikiwa, ukiwa mwangalifu kutimiza kanuni na maamuzi ambayo BWANA alimwamuru Musa kwa ajili ya Israeli. Uwe hodari na mwenye moyo mkuu. Usiogope wala usikate tamaa. 14Tazama, kwa taabu nyingi nimeiandalia nyumba ya BWANA karibu tani 3,400 za dhahabu na karibu tani 34,000 za fedha, na shaba na chuma kingi mno kisichoweza kupimwa. Nimeandaa pia mbao na mawe, nawe utapaswa kuviongeza. 15Pia una wafanyakazi wengi: wachonga mawe, mafundi wa mawe na mbao, na kila aina ya mtu stadi kwa kila kazi. 16Dhahabu na fedha, shaba na chuma, haviwezi kuhesabika. Sasa inuka uanze kazi, na BWANA na awe pamoja nawe.” 17Kisha Daudi akawaamuru maafisa wote wa Israeli wamsaidie mwanawe Sulemani. 18“Je, BWANA Mungu wenu si pamoja nanyi? Je, hakuwapa raha pande zote? Kwa maana amewatia mikononi mwangu wale walioishi katika nchi, nayo nchi imetiishwa mbele ya BWANA na mbele ya watu wake. 19Sasa elekezeni mioyo yenu na nafsi zenu katika kumtafuta BWANA Mungu wenu. Inukeni mjenge patakatifu pa BWANA Mungu, ili sanduku la agano la BWANA na vyombo vitakatifu vya Mungu viletwe ndani ya nyumba itakayojengwa kwa ajili ya jina la BWANA.”