1 Mambo ya Nyakati 10

1Basi Wafilisti walipigana na Israeli. Watu wa Israeli wakawakimbia Wafilisti, na wengi wakaanguka wamekufa katika mlima Gilboa. 2Wafilisti wakawafikia Sauli na wanawe, wakawaua Yonathani, Abinadabu na Malki-shua, wana wa Sauli. 3Mapigano yakamwelemea Sauli. Wapiga upinde wakampata kwa mishale yao, naye akajeruhiwa nao. 4Sauli akamwambia mbeba silaha wake, “Chomoa upanga wako unichome nao, la sivyo watu hawa wasiotahiriwa watakuja kunifanyia mzaha.” Lakini mbeba silaha wake hakukubali, kwa sababu aliogopa mno. Basi Sauli akachukua upanga wake mwenyewe, akauangukia. 5Mbeba silaha wake alipoona kwamba Sauli amekufa, naye pia akauangukia upanga wake mwenyewe, akafa.

6Hivyo Sauli akafa pamoja na wanawe watatu, na nyumba yake yote ikafa pamoja. 7Watu wote wa Israeli waliokuwa bondeni walipoona kwamba jeshi limekimbia na kwamba Sauli na wanawe wamekufa, wakaiacha miji yao, wakakimbia. Kisha Wafilisti wakaja, wakakaa ndani yake.

8Siku iliyofuata Wafilisti wakaja kuwavua wafu, wakamkuta Sauli na wanawe wamelala pale walipoanguka katika mlima Gilboa. 9Wakamvua Sauli, wakachukua kichwa chake na silaha zake, wakatuma wajumbe katika nchi yote ya Wafilisti kupeleka habari njema kwa sanamu zao na kwa watu. 10Wakaziweka silaha zake katika hekalu la miungu yao, na katika hekalu la Dagoni wakakitundika kichwa chake.

11Watu wote wa Yabeshi ya Gileadi wakasikia yote ambayo Wafilisti walimtendea Sauli. 12Mashujaa wao wote wakaondoka, wakauchukua mwili wa Sauli na miili ya wanawe, wakaileta Yabeshi. Wakaizika mifupa yao chini ya mwaloni huko Yabeshi, wakafunga kwa siku saba. 13Basi Sauli alikufa kwa sababu ya kukosa uaminifu kwake kwa BWANA. Hakulishika neno la BWANA, tena alikwenda kwa mwanamke anayewaita wafu ili apate mwongozo. 14Hakumtafuta BWANA. Kwa hiyo BWANA akamuua, akamkabidhi Daudi mwana wa Yese ufalme.