1 Mambo ya Nyakati 12

1Hawa ndio watu waliokuja kwa Daudi huko Siklagi, wakati ambapo bado hakuweza kutembea kwa uhuru kwa sababu ya Sauli mwana wa Kishi. Walikuwa miongoni mwa mashujaa waliomsaidia vitani. 2Walikuwa na pinde, nao waliweza kutupa mawe kwa kombeo na kupiga mishale kwa mkono wa kuume au wa kushoto. Walikuwa ndugu za Sauli kutoka Benyamini. 3Mkuu wao alikuwa Ahiezeri, akafuata Yoashi, wote wawili wana wa Shemaa Mgibeathi. Walikuwepo pia Yezieli na Peleti wana wa Azmawethi, na Beraka na Yehu Mwanathothi. 4Pamoja nao walikuwa Yeremia, Yahazieli, Yohana na Yozabadi Mgederathi. 5Pamoja nao walikuwa pia Eluzai, Yerimothi, Bealia, Shemaria na Shefatia Mharufi. 6Elkana, Ishia, Azareli, Yoezeri na Yashobeamu, waliokuwa Wakora, walikuwepo pia. 7Vivyo hivyo Yoela na Zebadia, wana wa Yerohamu kutoka Gedori. 8Baadhi ya Wagadi walijitenga wakaenda kwa Daudi kwenye ngome iliyo nyikani. Walikuwa mashujaa hodari, askari waliofunzwa tayari kwa vita, stadi wa kutumia ngao na mkuki. Nyuso zao zilikuwa kama nyuso za simba, nao walikimbia milimani kwa wepesi kama paa.

9Ezeri alikuwa mkuu, Obadia wa pili, Eliabu wa tatu, 10Mishmana wa nne, Yeremia wa tano, 11Atai wa sita, Elieli wa saba, 12Yohana wa nane, Elzabadi wa tisa, 13Yeremia wa kumi na Makbanai wa kumi na moja. 14Wagadi hawa walikuwa maafisa wa jeshi. Mdogo kabisa wao aliweza kusimama dhidi ya watu mia, na mkubwa dhidi ya elfu. 15Watu hawa walivuka Yordani katika mwezi wa kwanza, wakati mto ulipokuwa umefurika juu ya kingo zake zote, nao wakawafukuza wote waliokaa mabondeni, mashariki na magharibi.

16Baadhi ya watu wa Benyamini na Yuda nao walikuja kwa Daudi ngomeni. 17Daudi alitoka kwenda kuwalaki, akawaambia, “Kama mmekuja kwangu kwa amani kunisaidia, basi moyo wangu ni mmoja nanyi. Lakini kama mmekuja kunisaliti kwa adui zangu, ingawa sijatenda kosa lolote, Mungu wa babu zetu na aone, awakemee.”

18Ndipo Roho akamvaa Amasai, mkuu wa wale Thelathini, akasema, “Sisi ni wako, Daudi! Tuko pamoja nawe, mwana wa Yese! Amani, amani kwako, na amani kwa yeyote anayekusaidia, kwa maana Mungu wako anakusaidia.” Basi Daudi akawakaribisha, akawafanya viongozi wa kikosi chake.

19Baadhi ya watu wa Manase nao walihamia upande wa Daudi alipokuja pamoja na Wafilisti kupigana na Sauli. Lakini Daudi na watu wake hawakuwasaidia Wafilisti, kwa sababu wakuu wa Wafilisti walishauriana wakamrudisha. Walisema, “Atarudi kwa bwana wake Sauli, nasi tutalipa kwa vichwa vyetu.” 20Alipokuwa akirudi Siklagi, watu hawa wa Manase walihamia upande wake: Adna, Yozabadi, Yediaeli, Mikaeli, Yozabadi, Elihu na Silethai, makamanda wa maelfu katika Manase. 21Walimsaidia Daudi dhidi ya kikosi cha wavamizi, kwa maana wote walikuwa mashujaa hodari, nao wakawa makamanda katika jeshi. 22Siku baada ya siku watu walikuja kumsaidia Daudi, mpaka akawa na jeshi kubwa, kama jeshi la Mungu.

23Hizi ndizo hesabu za vikosi vilivyojiandaa kwa vita, vilivyokuja Hebroni kwa Daudi ili kumkabidhi ufalme wa Sauli, kama BWANA alivyokuwa amesema.

24Kutoka Yuda: watu wenye ngao na mkuki, 6,800 waliojiandaa kwa vita.

25Kutoka Simeoni: mashujaa hodari tayari kwa vita, 7,100.

26Kutoka Lawi: 4,600.

27Yehoyada alikuwa kiongozi wa nyumba ya Haruni, na watu 3,700 walikuja pamoja naye.

28Pia alikuwepo Sadoki, kijana shujaa hodari, pamoja na makamanda ishirini na wawili kutoka jamaa ya baba yake.

29Kutoka Benyamini, ndugu za Sauli mwenyewe: 3,000. Mpaka wakati huo wengi wao walikuwa wameendelea kuwa waaminifu kwa nyumba ya Sauli.

30Kutoka Efraimu: mashujaa hodari 20,800, watu maarufu katika jamaa za baba zao.

31Kutoka nusu ya kabila la Manase: 18,000, waliokuwa wametajwa mmoja mmoja kwa majina yao waje kumfanya Daudi mfalme.

32Kutoka Isakari: wakuu 200, watu wenye ufahamu wa nyakati, waliojua yawapasayo Israeli kufanya; na ndugu zao wote walifuata amri yao.

33Kutoka Zabuloni: watu 50,000 tayari kwa huduma ya jeshi, waliopangwa kwa vita na kila aina ya silaha, waliokuja kusaidia kwa mioyo isiyogawanyika.

34Kutoka Naftali: makamanda 1,000, na pamoja nao watu 37,000 waliobeba ngao na mkuki.

35Kutoka Dani: watu 28,600 waliopangwa kwa vita.

36Kutoka Asheri: watu 40,000 tayari kwa huduma ya jeshi, kupangwa kwa vita.

37Kutoka ng’ambo ya Yordani, kutoka Reubeni, Gadi na nusu ya kabila la Manase: watu 120,000 wenye kila aina ya silaha kwa vita. 38Wapiganaji hawa wote, waliopangwa kwa vita, walikuja Hebroni kwa moyo usiogawanyika ili kumfanya Daudi mfalme juu ya Israeli wote. Israeli wengine wote nao walikuwa na nia moja ya kumfanya Daudi mfalme. 39Walikaa huko pamoja na Daudi kwa siku tatu, wakila na kunywa, kwa sababu ndugu zao walikuwa wamewapatia mahitaji. 40Majirani zao pia, hata wa mbali kama Isakari, Zabuloni na Naftali, walileta chakula juu ya punda, ngamia, nyumbu na ng’ombe: unga mwingi, maandazi ya tini, maandazi ya zabibu kavu, divai, mafuta, ng’ombe na kondoo. Kwa maana kulikuwa na furaha katika Israeli.