1 Mambo ya Nyakati 15

1Daudi alijijengea nyumba katika mji wa Daudi. Pia akaandaa mahali kwa ajili ya sanduku la Mungu, akalipigia hema. 2Ndipo Daudi akasema, “Hakuna mtu anayeruhusiwa kulibeba sanduku la Mungu isipokuwa Walawi, kwa maana BWANA aliwachagua wao kulibeba sanduku la BWANA na kumtumikia yeye milele.”

3Daudi aliwakusanya Israeli wote huko Yerusalemu ili kulipandisha sanduku la BWANA mahali alipokuwa amepaandaa kwa ajili yake. 4Daudi aliwakusanya wana wa Haruni na Walawi. 5Kutoka kwa wazao wa Kohathi: Urieli mkuu wao, na ndugu zake 120.

6Kutoka kwa wazao wa Merari: Asaya mkuu wao, na ndugu zake 220.

7Kutoka kwa wazao wa Gershomu: Yoeli mkuu wao, na ndugu zake 130.

8Kutoka kwa wazao wa Elisafani: Shemaya mkuu wao, na ndugu zake 200.

9Kutoka kwa wazao wa Hebroni: Elieli mkuu wao, na ndugu zake themanini.

10Kutoka kwa wazao wa Uzieli: Aminadabu mkuu wao, na ndugu zake 112.

11Kisha Daudi aliwaita Sadoki na Abiathari makuhani, na Walawi Urieli, Asaya, Yoeli, Shemaya, Elieli na Aminadabu. 12Akawaambia, “Ninyi ndio wakuu wa jamaa za Walawi. Jitakaseni, ninyi na ndugu zenu, mlipandishe sanduku la BWANA, Mungu wa Israeli, mpaka mahali nilipoliandalia. 13Ni kwa sababu ninyi hamkulibeba mara ya kwanza ndipo BWANA Mungu wetu alipotushukia ghafula, kwa kuwa hatukumtafuta yeye kama agizo lilivyotaka.” 14Basi makuhani na Walawi walijitakasa ili kulipandisha sanduku la BWANA, Mungu wa Israeli. 15Walawi walilibeba sanduku la Mungu kwa mipiko mabegani mwao, kama Musa alivyoamuru kwa neno la BWANA.

16Daudi aliwaambia pia wakuu wa Walawi wawaweke baadhi ya ndugu zao kuwa waimbaji, wenye vyombo vya muziki, zeze, vinubi na matoazi, wapige kwa sauti kuu na kupaza sauti za furaha.

17Basi Walawi wakamweka Hemani mwana wa Yoeli; katika ndugu zake, Asafu mwana wa Berekia; na katika ndugu zao wazao wa Merari, Ethani mwana wa Kushaya. 18Pamoja nao walikuwa ndugu zao wa daraja la pili: Zekaria, Beni, Yaazieli, Shemiramothi, Yehieli, Uni, Eliabu, Benaya, Maaseya, Matithia, Elifelehu na Mikneya, na mabawabu Obed-edomu na Yeieli. 19Waimbaji Hemani, Asafu na Ethani walipaswa kupiga matoazi ya shaba kwa sauti kuu. 20Zekaria, Azieli, Shemiramothi, Yehieli, Uni, Eliabu, Maaseya na Benaya walipaswa kupiga zeze, kwa alamothi. 21Matithia, Elifelehu, Mikneya, Obed-edomu, Yeieli na Azazia walipaswa kuongoza kwa vinubi, kwa sheminithi. 22Kenania, mkuu wa Walawi aliyesimamia muziki, aliongoza muziki, kwa sababu alikuwa stadi katika kazi hiyo. 23Berekia na Elkana walikuwa mabawabu wa sanduku. 24Shebania, Yoshafati, Nethaneli, Amasai, Zekaria, Benaya na Eliezeri, waliokuwa makuhani, walipaswa kupiga tarumbeta mbele ya sanduku la Mungu. Obed-edomu na Yehia nao walikuwa mabawabu wa sanduku. 25Basi Daudi na wazee wa Israeli na makamanda wa maelfu walikwenda kulipandisha sanduku la agano la BWANA kutoka nyumbani kwa Obed-edomu kwa shangwe.

26Mungu alipowasaidia Walawi waliolibeba sanduku la agano la BWANA, walitoa dhabihu ya ng’ombe dume saba na kondoo dume saba. 27Daudi alikuwa amevaa joho la kitani safi, vivyo hivyo Walawi wote waliolibeba sanduku, waimbaji, na Kenania aliyeongoza muziki wa waimbaji. Daudi pia alivaa efodi ya kitani. 28Basi Israeli wote walilipandisha sanduku la agano la BWANA kwa kelele kuu za shangwe na kwa sauti ya baragumu, kwa tarumbeta na matoazi, na kwa muziki mkubwa wa zeze na vinubi. 29Sanduku la agano la BWANA lilipokuwa likiingia katika mji wa Daudi, Mikali binti Sauli alichungulia dirishani. Akamwona mfalme Daudi akicheza na kushangilia, naye akamdharau moyoni mwake.