Masalimo 2

¹Nʼchifukwa chiyani anthu a mitundu ina akufuna kuchita chiwembu? Akonzekeranji zopanda pake anthu?

²Mafumu a dziko lapansi akugwirizana nazo; ndipo olamulira asonkhana pamodzi kulimbana ndi Ambuye ndi wodzozedwa wakeyo.

³Iwo akunena kuti, “Tiyeni timasule magoli awo ndipo titaye zingwe zawo.”

⁴Wokhala mmwamba akuseka; Ambuye akuwanyoza iwowo.

⁵Ndipo iye awadzudzula mu mkwiyo wake ndi kuwaopseza mu ukali wake, kunena kuti,

⁶“Ine ndakhazikitsa mfumu yanga pa Ziyoni, phiri langa loyera.”

⁷Ine ndidzalengeza zimene Yehova walamula: Iye anati kwa Ine, “Iwe ndiwe mwana wanga; lero Ine ndakhala Atate ako.

⁸Tandipempha, ndipo ndidzachititsa kuti mitundu ya anthu ikhale cholowa chako; malekezero a dziko lapansi kuti akhale chuma chako.

⁹Iweyo udzawalamulira ndi ndodo yaufumu yachitsulo; udzawaphwanya zidutswazidutswa ngati zowumba zadothi.”

¹⁰Kotero, inu mafumu, chenjerani; chenjezedwani, inu olamulira a dziko lapansi.

¹¹Tumikirani Yehova mwa mantha ndi kukondwerera ulamuliro wake monjenjemera.

¹²Mpsopsoneni mwanayo kuti angakwiye; kuti mungawonongedwe mʼnjira zanu, pakuti ukali wake utha kuuka mʼkanthawi kochepa. Odala ndi onse amene amathawira kwa Iye.