Waamuzi 21

1Basi watu wa Israeli walikuwa wameapa huko Mizpa: “Hakuna hata mmoja wetu atakayemwoza binti yake kwa mtu wa Benyamini.” 2Watu walikwenda Betheli, wakaketi huko mbele za Mungu mpaka jioni, wakilia kwa sauti kubwa na kwa uchungu. 3Walilia, “Ee BWANA, Mungu wa Israeli, kwa nini jambo hili limetukia katika Israeli? Kwa nini leo Israeli likose kabila lake moja?” 4Asubuhi na mapema siku iliyofuata watu walijenga madhabahu huko, wakatoa sadaka za kuteketezwa na sadaka za amani.

5Kisha Waisraeli waliuliza, “Je, kuna yeyote katika makabila yote ya Israeli ambaye hakupanda pamoja na kusanyiko kwa BWANA?” Kwa maana walikuwa wamejifunga kwa kiapo kizito kwamba yeyote ambaye hangepanda kwa BWANA huko Mizpa lazima auawe. 6Lakini Waisraeli walihuzunika kwa ajili ya Benyamini, kabila ndugu yao. Walisema, “Leo kabila moja limekatiliwa mbali na Israeli. 7Tutawapatiaje wake wale watu waliosalia, kwa kuwa tumeapa kwa BWANA kwamba hatutawaoza binti zetu?” 8Basi waliuliza, “Ni nani katika makabila ya Israeli ambaye hakupanda kwa BWANA huko Mizpa?” Ikaonekana kwamba hakuna hata mtu mmoja kutoka Yabeshi-gileadi aliyekuja kambini kujiunga na kusanyiko. 9Watu walipohesabiwa, hakuna hata mmoja wa wenyeji wa Yabeshi-gileadi aliyekuwepo. 10Basi jumuiya ilituma huko watu 12,000 wa wapiganaji wake bora wakiwa na amri hii: “Nendeni mkawaue kwa upanga watu wa Yabeshi-gileadi, pamoja na wanawake na watoto. 11Hiki ndicho mtakachofanya: kila mwanamume, na kila mwanamke aliyewahi kulala na mwanamume, mtawaangamiza kabisa kama watu waliowekwa wakfu kwa maangamizi.” 12Kati ya watu wa Yabeshi-gileadi walipata wasichana 400 waliokuwa mabikira, ambao hawakuwahi kulala na mwanamume. Hao waliwaleta kambini huko Shilo, katika nchi ya Kanaani.

13Kisha jumuiya yote ilituma ujumbe kwa Wabenyamini waliokuwa kwenye mwamba wa Rimoni, ikawapa amani. 14Basi Benyamini walirudi wakati huo, nao wakapewa wale wanawake wa Yabeshi-gileadi ambao Waisraeli walikuwa wamewaacha hai. Lakini hawakuwatosha wote. 15Watu walihuzunika kwa ajili ya Benyamini, kwa sababu BWANA alikuwa ameleta pengo katika makabila ya Israeli. 16Kisha wazee wa jumuiya walisema, “Tutawapatiaje wake wale watu waliosalia, kwa kuwa wanawake wa Benyamini wameangamizwa?” 17Walisema, “Waliookoka wa Benyamini lazima wawe na warithi wa kuushika urithi wao, ili kabila lisifutwe katika Israeli. 18Lakini sisi hatuwezi kuwaoza binti zetu, kwa sababu Waisraeli wameapa, ‘Na alaaniwe yeyote ampaye Benyamini mke!’”

19Kisha walisema, “Tazama, kila mwaka kuna sikukuu ya BWANA huko Shilo.” (Shilo uko kaskazini mwa Betheli na kusini mwa Lebona, upande wa mashariki wa njia kuu ipandayo kutoka Betheli mpaka Shekemu.) 20Basi waliwaagiza Wabenyamini, “Nendeni mkajifiche katika mashamba ya mizabibu mngoje, 21mkatazame. Wasichana wa Shilo watakapotoka kujiunga na michezo ya ngoma, tokeni kwa kasi katika mashamba ya mizabibu, kila mmoja wenu ajinyakulie mke kutoka kwa wasichana wa Shilo. Kisha rudini nchi ya Benyamini. 22Baba zao au ndugu zao watakapokuja kwetu kulalamika, tutawaambia, ‘Tutendeeni wema, waacheni wawe nao, kwa sababu hatukumpatia kila mmoja wao mke katika vita. Na kwa kuwa ninyi hamkuwapa binti zenu, hamna hatia ya kuvunja kiapo.’”

23Wabenyamini walifanya hivyo hivyo. Walijitwalia wake kwa idadi yao, kutoka kwa wale wachezaji waliowanyakua, wakarudi katika nchi yao wenyewe. Waliijenga miji yao upya, wakakaa humo. 24Wakati huo Waisraeli waliondoka mahali pale, wakaenda nyumbani, kila mtu kwa kabila lake na ukoo wake, kila mtu kwenye nchi yake mwenyewe. 25Siku hizo hapakuwa na mfalme katika Israeli; kila mtu alifanya alivyoona ni sawa.