Waamuzi 5

1Siku ile Debora na Baraka mwana wa Abinoamu waliimba, na haya ndiyo maneno yao: 2“Nywele ndefu zilipoachwa wazi katika Israeli, watu walipojitolea kwa hiari, mhimidini BWANA! 3Sikilizeni, enyi wafalme; tegeni masikio, enyi watawala! Nitaimba, mimi mwenyewe, kwa BWANA; nitamwimbia BWANA, Mungu wa Israeli, nyimbo za sifa. 4BWANA, ulipoondoka Seiri, ulipotembea kwa nguvu kutoka nchi ya Edomu, nchi ilitikisika, mbingu zikamwaga, mawingu yakamwaga maji. 5Milima ilitetemeka mbele ya uso wa BWANA, yule wa Sinai, mbele ya uso wa BWANA, Mungu wa Israeli. 6Wakati wa Shamgari mwana wa Anathi, wakati wa Yaeli, barabara kuu zilikuwa tupu, nao wasafiri walipita njia za pembeni zilizopinda. 7Vijiji vya Israeli viliachwa tupu, tupu kabisa, hata nilipoinuka mimi, Debora, hata nilipoinuka, mama katika Israeli. 8Israeli walichagua miungu mipya; ndipo vita vikafika kwenye malango ya miji. Haikuonekana ngao wala mkuki kati ya watu elfu arobaini katika Israeli. 9Moyo wangu uko pamoja na majemadari wa Israeli, waliojitolea kwa hiari kati ya watu. Mhimidini BWANA! 10Ninyi mnaopanda punda weupe, ninyi mnaoketi juu ya matandiko ya thamani, nanyi mnaotembea njiani, tangazeni! 11Juu ya sauti za wachungaji mahali pa kunyweshea mifugo, huko wanayasimulia tena matendo ya haki ya BWANA, matendo ya haki ya wanavijiji wake katika Israeli. Wakati huo watu wa BWANA walishuka kwenda malangoni mwao. 12Amka, amka, Debora! Amka, amka, uanze kuimba! Inuka, Baraka mwana wa Abinoamu, uwaongoze mateka wako! 13Ndipo mabaki walishuka, watu, kuungana na wakuu; BWANA alishuka kwa ajili yangu dhidi ya mashujaa. 14Kutoka Efraimu walikuja wale ambao mizizi yao iko katika Amaleki; nyuma yako, Benyamini, walikuja kati ya watu wako. Kutoka Makiri walishuka majemadari, na kutoka Zabuloni wale wanaobeba fimbo ya jemadari. 15Majemadari wa Isakari walikuwa pamoja na Debora, na Isakari alisimama pamoja na Baraka pia, wakikimbilia bondeni nyuma yake. Kati ya koo za Reubeni kulikuwa na maazimio makuu ya moyo. 16Kwa nini ulikaa kati ya mazizi ya kondoo, ukisikiliza wachungaji wakipiga miluzi kwa makundi yao? Kati ya koo za Reubeni kulikuwa na kujihoji sana moyoni. 17Gileadi alibaki ng’ambo ya Yordani. Na Dani, kwa nini alikawia karibu na merikebu? Asheri alitulia kando ya pwani ya bahari, akikaa karibu na bandari zake. 18Zabuloni walikuwa watu walioyaona maisha yao kuwa si kitu, tayari kufa, na Naftali vivyo hivyo, kwenye nyanda za juu za uwanja wazi. 19Wafalme walikuja wakapigana; wafalme wa Kanaani walipigana wakati huo, huko Taanaki, karibu na vijito vya Megido, lakini hawakuchukua fedha yoyote kama nyara. 20Kutoka mbinguni vita vilianzishwa; nyota, katika njia zao, zilipigana na Sisera. 21Mto Kishoni uliwakumba, mto wa zamani za kale, Mto Kishoni. Nafsi yangu, songa mbele kwa nguvu! 22Ndipo kwato za farasi zikagonga ardhi farasi wake hodari walipokimbia mbio, mbio. 23‘Ulaanini Merozi,’ asema malaika wa BWANA; ‘walaanini watu wake kwa uchungu, kwa sababu hawakuja kumsaidia BWANA, kusimama pamoja naye dhidi ya wapiganaji.’ 24Yaeli na abarikiwe kuliko wanawake wote, mke wa Heberi Mkeni, abarikiwe kuliko wanawake wote wanaoishi hemani. 25Aliomba maji, naye akampa maziwa; akamletea maziwa mgando katika bakuli linalofaa wakuu. 26Alinyosha mkono wake kuchukua kigingi cha hema, mkono wake wa kuume kuchukua nyundo ya fundi. Akampiga Sisera, akakiponda kichwa chake; akalivunja na kulitoboa paji lake. 27Miguuni pake alizama chini, akaanguka, akalala kimya; miguuni pake alizama chini, akaanguka; pale alipozama chini, hapo ndipo alipoanguka, ameuawa. 28Kupitia dirishani alichungulia nje, mama yake Sisera, akalia kupitia kimiani, ‘Kwa nini gari lake linachukua muda mrefu hivi kuja? Kwa nini vishindo vya farasi wa magari yake vimechelewa hivi?’ 29Wenye hekima zaidi kati ya wanawake wake wa heshima wanamjibu; hata yeye mwenyewe anajipa jibu lilo hilo: 30‘Lazima wanapata nyara na kuzigawana: msichana mmoja au wawili kwa kila mwanamume; nguo za rangi kama nyara kwa Sisera, nguo za rangi kama nyara, zilizotariziwa vizuri, nguo iliyotiwa rangi na kutariziwa pande zote mbili, kwa shingo kati ya nyara.’ 31Vivyo hivyo na waangamie adui zako wote, BWANA! Lakini wale wampendao na wawe kama jua linapochomoza kwa nguvu zake.” Nayo nchi ikawa na amani kwa miaka arobaini.