Waamuzi 6

1Waisraeli walifanya maovu machoni pa BWANA, naye BWANA akawatia mikononi mwa Midiani kwa miaka saba. 2Nguvu za Midiani ziliwalemea sana Israeli. Kwa sababu ya Midiani, Waisraeli walijitengenezea maficho milimani, na mapango, na ngome. 3Kila mara Israeli walipopanda mazao yao, Wamidiani na Waamaleki na watu wa mashariki walikuja kuwashambulia. 4Walipiga kambi katika nchi yao na kuharibu mazao mpaka Gaza. Hawakuacha chochote katika Israeli cha kuwalisha, wala kondoo, wala ng’ombe, wala punda. 5Walikuja pamoja na mifugo yao na hema zao, wengi kama kundi la nzige. Wao na ngamia wao hawakuhesabika, nao wakaingia nchini ili kuifanya ukiwa. 6Israeli walifanywa maskini sana kwa sababu ya Midiani, nao Waisraeli wakamlilia BWANA.

7Waisraeli walipomlilia BWANA kwa sababu ya Midiani, 8BWANA aliwatumia Waisraeli nabii, naye akawaambia, “Hivi ndivyo asemavyo BWANA, Mungu wa Israeli: ‘Ni mimi niliyewapandisha kutoka Misri na kuwatoa katika nyumba ya utumwa. 9Niliwaokoa kutoka mikononi mwa Misri na mikononi mwa wote waliowaonea. Niliwafukuza mbele yenu, nikawapa nchi yao. 10Niliwaambia, “Mimi ndimi BWANA Mungu wenu. Msiiogope miungu ya Waamori, ingawa mnakaa katika nchi yao.” Lakini hamkunisikiliza.’”

11Kisha malaika wa BWANA alikuja Ofra, akaketi chini ya mwaloni ulioko huko, uliokuwa mali ya Yoashi Mwabiezeri. Gideoni, mwana wa Yoashi, alikuwa akipura ngano ndani ya shinikizo la zabibu ili Wamidiani wasiione. 12Malaika wa BWANA alimtokea, akasema, “BWANA yu pamoja nawe, ewe shujaa hodari.” 13Gideoni alimjibu, “Samahani, bwana wangu, lakini ikiwa BWANA yu pamoja nasi, kwa nini mambo haya yote yametupata? Yako wapi maajabu yake yote ambayo mababu zetu walitusimulia, waliposema, ‘Je, BWANA hakutupandisha kutoka Misri?’ Sasa BWANA ametuacha na kututia mikononi mwa Midiani.” 14BWANA alimgeukia, akasema, “Nenda kwa nguvu hizi ulizo nazo, nawe utawaokoa Israeli kutoka mikononi mwa Midiani. Je, si mimi ninayekutuma?” 15Gideoni akamwambia, “Samahani, Bwana wangu, lakini nitawezaje kuwaokoa Israeli? Ukoo wangu ndio dhaifu kuliko yote katika Manase, nami ni mdogo kuliko wote katika jamaa yangu.” 16BWANA alimjibu, “Nitakuwa pamoja nawe, nawe utawaangusha Wamidiani kana kwamba ni mtu mmoja.” 17Gideoni akamwambia, “Ikiwa nimepata kibali machoni pako, nipe ishara kwamba ni wewe kweli unayesema nami. 18Tafadhali usiondoke hapa mpaka nitakaporudi kwako na kuleta zawadi yangu na kuiweka mbele yako.” Akasema, “Nitakaa mpaka utakaporudi.” 19Gideoni aliingia ndani akaandaa mwana-mbuzi, na mikate isiyotiwa chachu ya karibu lita 22 ya unga. Akaiweka nyama katika kikapu na mchuzi katika chungu, akamletea chini ya mwaloni, akaviweka mbele yake.

20Malaika wa Mungu akamwambia, “Chukua nyama na mikate isiyotiwa chachu, uviweke juu ya mwamba huu. Kisha umwage mchuzi.” Naye akafanya hivyo. 21Ndipo malaika wa BWANA alinyosha ncha ya fimbo iliyokuwa mkononi mwake, akaigusa nyama na mikate isiyotiwa chachu. Moto ukawaka kutoka mwambani, ukaiteketeza nyama na mikate, naye malaika wa BWANA akatoweka machoni pake. 22Gideoni alipoona kwamba alikuwa malaika wa BWANA, alilia, “Ole wangu, Bwana MUNGU! Nimemwona malaika wa BWANA uso kwa uso!” 23Lakini BWANA alimwambia, “Amani iwe kwako! Usiogope; hutakufa.” 24Basi Gideoni alimjengea BWANA madhabahu huko, akaiita “BWANA ni Amani.” Hata leo bado iko huko Ofra ya Waabiezeri.

25Usiku ule ule BWANA alimwambia, “Chukua ng’ombe dume mchanga kutoka kundi la baba yako, yule dume wa pili, mwenye umri wa miaka saba. Ibomoe madhabahu ya Baali iliyo mali ya baba yako, ukaikate nguzo ya Ashera iliyo kando yake. 26Kisha umjengee BWANA Mungu wako madhabahu juu ya ngome hii, ukiipanga ipasavyo. Mchukue yule ng’ombe dume wa pili, umtoe kuwa sadaka ya kuteketezwa, kwa kutumia kuni za nguzo ya Ashera utakayoikata.” 27Basi Gideoni alichukua watu kumi kati ya watumishi wake, akafanya kama BWANA alivyomwambia. Lakini aliiogopa sana jamaa ya baba yake na watu wa mji kufanya hivyo mchana, kwa hiyo akafanya usiku. 28Watu wa mji walipoamka asubuhi na mapema, waliona kwamba madhabahu ya Baali imebomolewa na nguzo ya Ashera iliyokuwa kando yake imekatwa, na kwamba ng’ombe dume wa pili ametolewa juu ya madhabahu iliyokuwa imejengwa. 29Waliulizana, “Ni nani aliyefanya hivi?” Walipokwisha kuuliza-uliza na kuchunguza, walisema, “Gideoni mwana wa Yoashi ndiye aliyefanya hivyo.” 30Watu wa mji walimwambia Yoashi, “Mtoe mwanao nje. Lazima afe, kwa sababu ameibomoa madhabahu ya Baali na kuikata nguzo ya Ashera iliyosimama kando yake.” 31Lakini Yoashi aliwaambia wote waliosimama dhidi yake, “Je, mnataka kumtetea Baali? Mnataka kumwokoa? Mtu yeyote atakayemtetea atauawa kabla ya asubuhi! Ikiwa Baali ni mungu, na ajitetee mwenyewe, kwa kuwa ni madhabahu yake iliyobomolewa.” 32Basi siku ile Gideoni alipewa jina Yerubaali, kwa sababu watu walisema, “Baali na ashindane naye, kwa kuwa aliibomoa madhabahu yake.”

33Basi Wamidiani wote na Waamaleki na watu wa mashariki waliunganisha majeshi yao, wakavuka Yordani, wakapiga kambi katika Bonde la Yezreeli. 34Kisha Roho wa BWANA akamvaa Gideoni. Alipiga baragumu, nao Waabiezeri wakaitwa kumfuata. 35Alituma wajumbe katika Manase yote, nao pia wakaitwa kumfuata. Alituma wajumbe pia kwa Asheri, Zabuloni na Naftali, nao wakapanda kuungana nao. 36Kisha Gideoni alimwambia Mungu, “Ikiwa kweli wewe utawaokoa Israeli kupitia kwangu, kama ulivyosema, 37tazama, nitaweka ngozi ya sufu katika uwanja wa kupuria. Ikiwa umande utaanguka juu ya ngozi peke yake huku ardhi yote ikibaki kavu, ndipo nitakuwa na hakika kwamba utawaokoa Israeli kupitia kwangu, kama ulivyosema.” 38Na ndivyo ilivyokuwa. Alipoamka asubuhi na mapema kesho yake, aliikamua ngozi akatoa umande wa kutosha kujaza bakuli maji. 39Kisha Gideoni alimwambia Mungu, “Usinikasirikie, lakini niache niseme mara moja tu tena. Tafadhali niache nijaribu mara moja tu tena kwa ngozi. Safari hii ngozi peke yake iwe kavu, na ardhi yote iwe na umande.” 40Usiku ule Mungu alifanya hivyo. Ngozi peke yake ilikuwa kavu, na ardhi yote ilikuwa imefunikwa na umande.