Waamuzi 11

1Yeftha Mgileadi alikuwa shujaa hodari wa vita. Alikuwa mwana wa kahaba, na baba yake alikuwa Gileadi. 2Mke wa Gileadi naye alimzalia wana. Walipokua, walimfukuza Yeftha, wakamwambia, “Hutapata sehemu yoyote ya mali ya baba yetu, kwa sababu wewe ni mwana wa mwanamke mwingine.” 3Basi Yeftha aliwakimbia ndugu zake, akaishi katika nchi ya Tobu. Kundi la watu wasiofaa kitu likakusanyika kumzunguka, nao wakatoka pamoja naye kwenda kuvamia.

4Baada ya muda Waamoni walikwenda kupigana vita dhidi ya Israeli. 5Waamoni walipokuwa wakipigana na Israeli, wazee wa Gileadi walikwenda kumrudisha Yeftha kutoka nchi ya Tobu. 6Walimwambia Yeftha, “Njoo uwe kamanda wetu, ili tuweze kupigana na Waamoni.” 7Lakini Yeftha aliwaambia wazee wa Gileadi, “Je, si ninyi mlionichukia mkanifukuza kutoka nyumbani kwa baba yangu? Kwa nini mnanijia sasa, mnapokuwa katika taabu?” 8Wazee wa Gileadi walimjibu Yeftha, “Hiyo ndiyo sababu hasa tumerudi kwako sasa. Njoo pamoja nasi upigane na Waamoni, nawe utakuwa mkuu wetu, mtawala wa wote wanaoishi Gileadi.” 9Yeftha aliwajibu wazee wa Gileadi, “Mkinirudisha nikapigane vita na Waamoni, na BWANA akawatia mikononi mwangu, basi nitakuwa mkuu wenu.” 10Wazee wa Gileadi walimwambia Yeftha, “BWANA ni shahidi kati yetu. Hakika tutafanya kama ulivyosema.” 11Basi Yeftha alirudi pamoja na wazee wa Gileadi, na watu wakamweka juu yao kuwa mkuu na kamanda. Naye Yeftha akayarudia masharti yake yote mbele za BWANA huko Mizpa.

12Kisha Yeftha alituma wajumbe kwa mfalme wa Waamoni na swali hili: “Una ugomvi gani nami, hata umekuja kuishambulia nchi yangu?” 13Mfalme wa Waamoni aliwajibu wajumbe wa Yeftha, “Ni kwa sababu Israeli waliichukua nchi yangu walipopanda kutoka Misri, tangu Arnoni mpaka Yaboki na mpaka Yordani. Sasa uirudishe kwa amani.” 14Yeftha alituma wajumbe mara nyingine kwa mfalme wa Waamoni, 15nao wakamwambia, “Hivi ndivyo Yeftha asemavyo: Israeli hawakuichukua nchi ya Moabu wala nchi ya Waamoni. 16Israeli walipopanda kutoka Misri, walisafiri kupitia nyika mpaka Bahari ya Shamu, kisha wakafika Kadeshi. 17Israeli walituma wajumbe kumwomba mfalme wa Edomu, ‘Tafadhali turuhusu tupite katika nchi yako.’ Lakini mfalme wa Edomu hakujali. Walimpelekea mfalme wa Moabu ombi hilo hilo, naye pia akakataa. Kwa hiyo Israeli walibaki Kadeshi. 18Kisha Israeli walisafiri kupitia nyika, wakazizunguka nchi za Edomu na Moabu. Walipita upande wa mashariki wa Moabu, wakapiga kambi ng’ambo ya Arnoni. Hawakuingia katika eneo la Moabu, kwa sababu Arnoni ulikuwa mpaka wa Moabu. 19Kisha Israeli walituma wajumbe kwa Sihoni mfalme wa Waamori, aliyetawala Heshboni, wakamwambia, ‘Tafadhali turuhusu tupite katika nchi yako tufike mahali petu wenyewe.’ 20Lakini Sihoni hakuwaamini Israeli wapite katika eneo lake. Aliyakusanya majeshi yake yote, akapiga kambi Yahasi, akawashambulia Israeli. 21Kisha BWANA, Mungu wa Israeli, aliwatia Sihoni na majeshi yake yote katika mamlaka ya Israeli, nao Israeli wakawashinda, wakaimiliki nchi yote ya Waamori waliokaa katika eneo hilo. 22Waliimiliki nchi yote ya Waamori, kutoka Arnoni upande wa kusini hadi Yaboki, na kutoka nyika hadi Yordani. 23Basi sasa kwa kuwa BWANA, Mungu wa Israeli, amewafukuza Waamori mbele ya watu wake Israeli, je, wewe utaichukua nchi yao? 24Je, wewe hukimiliki chochote ambacho mungu wako Kemoshi anakupa? Vivyo hivyo sisi tutaimiliki nchi yote ya wale ambao BWANA Mungu wetu amewafukuza mbele yetu. 25Je, wewe kweli ni mtu bora kuliko Balaki mwana wa Zipori, mfalme wa Moabu? Je, aliwahi kubishana na Israeli au kupigana vita nao? 26Israeli wamekaa Heshboni na vijiji vyake, Aroeri na vijiji vyake, na katika miji yote iliyo kando ya Arnoni kwa miaka 300. Kwa nini hamkuirudisha katika muda wote huo? 27Mimi sijakukosea, lakini wewe unanikosea kwa kunishambulia kwa vita. BWANA, aliye Mwamuzi, na aamue shauri hili leo kati ya Waisraeli na Waamoni.” 28Lakini mfalme wa Waamoni hakuujali ujumbe ambao Yeftha alimtumia.

29Kisha Roho wa BWANA alimjia Yeftha. Alipita katika Gileadi na Manase, akapita Mizpa ya Gileadi, na kutoka Mizpa ya Gileadi akaendelea kuwashambulia Waamoni. 30Yeftha aliweka nadhiri kwa BWANA: “Ikiwa kweli utawatia Waamoni mikononi mwangu, 31basi yeyote au chochote kitakachotoka katika milango ya nyumba yangu kunilaki ninaporudi salama kutoka kwa Waamoni kitakuwa cha BWANA, nami nitakitoa kuwa sadaka ya kuteketezwa.”

32Basi Yeftha alivuka kwenda kwa Waamoni kupigana nao, naye BWANA akawatia mikononi mwake. 33Aliwashinda kwa mauaji makubwa kutoka Aroeri hadi eneo la Minithi, miji ishirini, na mpaka Abel-keramimu. Hivyo Waamoni wakawekwa chini ya mamlaka ya Waisraeli.

34Yeftha alipofika nyumbani kwake Mizpa, binti yake alitoka kumlaki, akicheza kwa mdundo wa matari. Yeye alikuwa mtoto wake wa pekee; mbali naye hakuwa na mwana wala binti. 35Mara alipomwona, alirarua mavazi yake, akalia, “Ole wangu, binti yangu! Umeniangusha kabisa! Umekuwa wewe unayeniletea maafa. Nimetoa ahadi kwa BWANA, nami siwezi kuirudisha nyuma.” 36Alimwambia, “Baba yangu, umetoa ahadi kwa BWANA. Nitendee kama ulivyoahidi, kwa kuwa sasa BWANA amekupatia haki juu ya adui zako Waamoni.” 37Pia alimwambia baba yake, “Nitimizie ombi hili moja. Nipe miezi miwili niende milimani pamoja na rafiki zangu nikalie huko, kwa sababu sitaolewa kamwe.” 38Alisema, “Nenda,” akamruhusu aende kwa miezi miwili. Alikwenda milimani pamoja na rafiki zake, akaomboleza kwamba hataolewa kamwe. 39Mwisho wa miezi miwili alirudi kwa baba yake, naye akamtendea kama alivyoweka nadhiri. Alikuwa hajawahi kukutana kimwili na mwanamume. Ikawa desturi katika Israeli. 40Kila mwaka wasichana wa Israeli walikwenda kwa siku nne kumkumbuka binti wa Yeftha Mgileadi.