Waamuzi 7

1Asubuhi na mapema Yerubaali, yaani Gideoni, pamoja na askari wote waliokuwa pamoja naye, walipiga kambi karibu na chemchemi ya Harodi. Kambi ya Midiani ilikuwa upande wao wa kaskazini, karibu na kilima cha More bondeni. 2BWANA alimwambia Gideoni, “Askari ulio nao ni wengi mno mimi kuwatia Wamidiani mikononi mwao. Israeli wangejivuna tu dhidi yangu na kusema, ‘Nguvu zetu wenyewe zimetuokoa.’ 3Sasa tangaza kwa askari, ‘Yeyote anayeogopa na kutetemeka anaweza kurudi na kuondoka Mlima Gileadi.’” Basi askari elfu ishirini na mbili walirudi, na elfu kumi wakabaki.

4Lakini BWANA alimwambia Gideoni, “Askari bado ni wengi mno. Washushe majini, nami nitawachuja huko kwa ajili yako. Nikikuambia, ‘Huyu atakwenda pamoja nawe,’ yeye atakwenda pamoja nawe. Lakini nikikuambia, ‘Huyu hatakwenda pamoja nawe,’ yeye hatakwenda.” 5Basi Gideoni aliwashusha askari majini, naye BWANA akamwambia, “Kila mmoja atakayeramba maji kwa ulimi wake kama mbwa arambavyo, mweke katika kundi moja. Kila mmoja atakayepiga magoti ili kunywa, mweke katika kundi jingine.” 6Hesabu ya wale walioramba, wakileta maji vinywani mwao kwa mikono yao, ilikuwa watu mia tatu. Askari wengine wote walipiga magoti ili kunywa.

7Kisha BWANA alimwambia Gideoni, “Kwa wale watu mia tatu walioramba nitawaokoa ninyi nyote, nami nitawatia Wamidiani mikononi mwako. Waache wengine wote waende nyumbani.” 8Wale waliobaki walichukua masurufu mikononi mwao, pamoja na baragumu zao. Gideoni aliwarudisha watu wengine wote wa Israeli hemani mwao, lakini akawabakiza wale watu mia tatu. Kambi ya Midiani ilikuwa chini yake bondeni.

9Usiku ule ule BWANA alimwambia Gideoni, “Amka, ushuke ukaishambulie kambi, kwa sababu nimeitia mkononi mwako. 10Lakini ikiwa unaogopa kushambulia, shuka mpaka kambini pamoja na Pura mtumishi wako, 11ukasikilize wanayosema. Baada ya hapo utapata ujasiri wa kuishambulia kambi.” Basi alishuka pamoja na Pura mtumishi wake mpaka ukingo wa nje wa askari wenye silaha waliokuwa kambini. 12Wamidiani, Waamaleki na watu wote wa mashariki walikuwa wametanda bondeni, wengi kama nzige. Ngamia wao hawakuhesabika, wengi kama chembe za mchanga ufuoni mwa bahari. 13Gideoni alipofika, mtu mmoja alikuwa akimsimulia rafiki yake ndoto. Akasema, “Sikiliza, niliota ndoto. Mkate wa duara wa shayiri ulikuja ukiviringika mpaka kambini mwa Midiani. Ukafika kwenye hema, ukaipiga kwa nguvu hata ikaanguka. Ukaipindua hema juu chini, nayo ikaporomoka.” 14Rafiki yake akajibu, “Hii haiwezi kuwa kitu kingine ila upanga wa Gideoni mwana wa Yoashi, yule Mwisraeli! Mungu amewatia Midiani na jeshi lote mikononi mwake.”

15Gideoni aliposikia ndoto hiyo na maana yake, alisujudu na kuabudu. Kisha akarudi kambini mwa Israeli, akaita, “Amkeni! BWANA ameitia kambi ya Midiani mikononi mwenu.” 16Aliwagawa wale watu mia tatu katika vikosi vitatu, akampa kila mmoja baragumu na mtungi mtupu, na mwenge ndani ya mtungi. 17Akawaambia, “Niangalieni, mfanye kama nifanyavyo. Nikifika ukingoni mwa kambi, fanyeni sawasawa na ninavyofanya. 18Nitakapopiga baragumu yangu, pamoja na wote walio pamoja nami, nanyi pia mpige baragumu zenu pande zote za kambi, mkipiga kelele, ‘Kwa ajili ya BWANA na kwa ajili ya Gideoni!’”

19Gideoni na watu mia waliokuwa pamoja naye walifika ukingoni mwa kambi mwanzoni mwa zamu ya kati ya usiku, mara tu baada ya walinzi wapya kuwekwa. Walipiga baragumu zao, wakaivunja mitungi waliyokuwa wameishika. 20Vikosi vyote vitatu vilipiga baragumu na kuivunja mitungi yao. Wakiwa wameshika mienge katika mikono yao ya kushoto na baragumu za kupiga katika mikono yao ya kuume, walipiga kelele, “Upanga kwa ajili ya BWANA na kwa ajili ya Gideoni!” 21Kila mtu alisimama mahali pake kuizunguka kambi, huku jeshi lote la Midiani likikimbia huku na huko, likipiga kelele, likatoroka. 22Wale mia tatu walipopiga baragumu zao, BWANA aliugeuza upanga wa kila mtu juu ya mwenzake katika jeshi lote. Jeshi likakimbia kuelekea Zerera mpaka Beth-shita, na mpaka ukingo wa Abel-mehola karibu na Tabathi. 23Kisha watu wa Israeli kutoka Naftali, Asheri na Manase yote waliitwa kwenda vitani, wakawafuatia Wamidiani. 24Gideoni alituma wajumbe katika nchi yote ya milima ya Efraimu na ujumbe huu: “Shukeni mkawashambulie Wamidiani, mkayashike maji mbele yao mpaka Beth-bara, na Yordani pia.” Basi watu wote wa Efraimu waliitwa, wakayashika maji mpaka Beth-bara, na Yordani. 25Pia waliwakamata majemadari wawili wa Midiani, Orebu na Zeebu. Orebu walimwua kwenye Mwamba wa Orebu, na Zeebu kwenye Shinikizo la Zeebu. Waliendelea kuwafuatia Wamidiani, nao wakamletea Gideoni vichwa vya Orebu na Zeebu kutoka ng’ambo ya Yordani.