Waamuzi 12

1Watu wa Efraimu waliitwa vitani, wakavuka mpaka Zafoni. Walimwambia Yeftha, “Kwa nini ulivuka kwenda kupigana na Waamoni bila kutuita twende pamoja nawe? Tutaiteketeza nyumba yako ukiwa ndani yake!” 2Yeftha aliwajibu, “Mimi na watu wangu tulikuwa katika mapambano makali na Waamoni. Niliwaita, lakini hamkuniokoa kutoka mikononi mwao. 3Nilipoona kwamba hamtaniokoa, niliyahatarisha maisha yangu, nikavuka kwenda kupigana na Waamoni, naye BWANA akawatia mikononi mwangu. Basi kwa nini mmepanda leo kunishambulia na kupigana nami?” 4Kisha Yeftha aliwakusanya watu wote wa Gileadi, akapigana na Efraimu. Watu wa Gileadi wakawashinda Waefraimu, kwa sababu Waefraimu walikuwa wamesema, “Ninyi Wagileadi si kitu ila watoro wa Efraimu, mnaoishi kati ya Efraimu na Manase.” 5Wagileadi waliviteka vivuko vya Yordani ili kuwazuia Waefraimu. Kila mara mmoja wa Waefraimu waliokuwa wakikimbia aliposema, “Niache nivuke,” watu wa Gileadi walimwuliza, “Je, wewe ni Mwefraimu?” Akijibu, “Hapana,” 6walimwambia, “Basi sema ‘Shibolethi.’” Naye alisema “Sibolethi,” kwa sababu hakuweza kulitamka neno hilo sawasawa. Ndipo walipomkamata na kumwua pale kwenye vivuko vya Yordani. Wakati huo Waefraimu 42,000 walianguka. 7Yeftha aliwaamua Israeli kwa miaka sita. Kisha Yeftha Mgileadi akafa, akazikwa katika mji mmoja wa Gileadi.

8Baada yake, Ibzani wa Bethlehemu aliwaamua Israeli. 9Alikuwa na wana thelathini na binti thelathini. Aliwaoza binti zake nje ya ukoo wake, na akawaleta wasichana thelathini kutoka nje kuwa wake za wanawe. Aliwaamua Israeli kwa miaka saba. 10Kisha Ibzani alikufa, akazikwa Bethlehemu.

11Baada yake, Eloni Mzabuloni aliwaamua Israeli. Aliwaamua Israeli kwa miaka kumi. 12Kisha Eloni Mzabuloni alikufa, akazikwa Aiyaloni katika nchi ya Zabuloni.

13Baada yake, Abdoni mwana wa Hileli Mpirathoni aliwaamua Israeli. 14Wanawe arobaini na wajukuu wake thelathini walipanda punda sabini. Aliwaamua Israeli kwa miaka minane. 15Kisha Abdoni mwana wa Hileli Mpirathoni alikufa, akazikwa Pirathoni katika nchi ya Efraimu, katika nchi ya milima ya Waamaleki.