Waamuzi 14

1Samsoni alishuka mpaka Timna, na huko Timna akamwona msichana mmoja wa Kifilisti. 2Alipanda kurudi, akawaambia baba yake na mama yake, “Nimemwona mwanamke huko Timna, mmoja wa wasichana wa Kifilisti. Sasa mnipatie awe mke wangu.” 3Baba yake na mama yake walimwambia, “Je, hakuna mwanamke kati ya jamaa zako, au popote kati ya watu wangu? Je, ni lazima uende kutwaa mke kwa Wafilisti wasiotahiriwa?” Lakini Samsoni alimwambia baba yake, “Nipatie huyo. Yeye ndiye anayefaa machoni pangu.” 4Baba yake na mama yake hawakujua kwamba jambo hili lilitoka kwa BWANA, kwa maana yeye alikuwa akitafuta nafasi ya kuwashughulikia Wafilisti. Wakati huo Wafilisti walikuwa wakiwatawala Israeli.

5Kisha Samsoni alishuka Timna pamoja na baba yake na mama yake. Walipofika kwenye mashamba ya mizabibu ya Timna, ghafla mwana-simba alimjia akinguruma. 6Roho wa BWANA alimjilia kwa nguvu, naye bila kitu chochote mikononi mwake akampasua yule simba kwa urahisi kama mtu apasuavyo mwana-mbuzi. Lakini hakumwambia baba yake wala mama yake alichokifanya. 7Kisha alishuka, akazungumza na yule mwanamke, naye akamfaa Samsoni machoni pake. 8Baada ya muda alirudi kumwoa, akageuka kando kuutazama mzoga wa yule simba. Humo ndani ya mwili wa simba kulikuwa na kundi la nyuki, na asali. 9Aliikomba asali kwa mikono yake, akaendelea na safari, akila huku akitembea. Alipowafikia baba yake na mama yake, aliwapa nao wakala. Lakini hakuwaambia kwamba aliikomba asali hiyo kutoka katika mzoga wa yule simba. 10Baba yake alishuka kumwona yule mwanamke, naye Samsoni akafanya karamu huko, kama vijana walivyokuwa wakifanya. 11Watu wa huko walipomwona, walileta wenzi thelathini wakae pamoja naye. 12Samsoni aliwaambia, “Niwategee kitendawili. Kama mtaweza kunieleza jibu lake katika siku saba za karamu na kukitegua, nitawapa mavazi thelathini ya kitani na mavazi thelathini ya sikukuu. 13Lakini kama hamtaweza kunieleza, basi ninyi lazima mnipe mavazi thelathini ya kitani na mavazi thelathini ya sikukuu.” Wakamwambia, “Tutegee kitendawili chako. Tukisikie.” 14Aliwaambia, “Kutoka kwa anayekula kilitoka chakula; kutoka kwa mwenye nguvu kilitoka kitu kitamu.” Kwa siku tatu hawakuweza kukitegua kitendawili hicho. 15Siku ya saba walimwambia mke wa Samsoni, “Mbembeleze mumeo atuambie jibu la kitendawili, la sivyo tutakuchoma moto wewe na jamaa ya baba yako. Je, mlitualika hapa ili kutunyang’anya mali? Ndivyo ilivyo?” 16Mke wa Samsoni alilia mbele yake, akasema, “Wewe unanichukia tu; hunipendi hata kidogo. Umewategea watu wangu kitendawili, wala hujaniambia jibu lake.” Akamwambia, “Tazama, hata baba yangu na mama yangu sijawaambia. Kwa nini nikuambie wewe?” 17Alilia mbele yake siku zote saba za karamu yao. Siku ya saba alimwambia, kwa sababu aliendelea kumsumbua, naye akawaeleza watu wake jibu la kitendawili. 18Siku ya saba, kabla jua halijazama, watu wa mji walimwambia, “Ni nini kitamu kuliko asali? Ni nini chenye nguvu kuliko simba?” Samsoni aliwajibu, “Kama msingelima kwa mtamba wangu, kamwe msingekitegua kitendawili changu.” 19Kisha Roho wa BWANA alimjilia kwa nguvu. Alishuka Ashkeloni, akawaua watu wao thelathini, akawavua mavazi yao, akawapa wale waliokitegua kitendawili yale mavazi. Akiwa amewaka hasira, alipanda kurudi nyumbani kwa baba yake.

20Kisha mke wa Samsoni alipewa mwenzake, yule aliyekuwa msimamizi wake wa harusi.