Waamuzi 4

1Ehudi alipokwisha kufa, Waisraeli walifanya tena maovu machoni pa BWANA. 2Basi BWANA aliwauza mikononi mwa Yabini, mfalme wa Kanaani, aliyetawala huko Hazori. Mkuu wa jeshi lake alikuwa Sisera, aliyekaa Harosheth-hagoyimu. 3Waisraeli walimlilia BWANA, kwa sababu Yabini alikuwa na magari ya vita ya chuma mia tisa, naye alikuwa amewaonea Waisraeli vikali kwa miaka ishirini.

4Wakati huo Debora, nabii, mke wa Lapidothi, alikuwa akiwaamua Israeli. 5Alikuwa akiketi kuamua mashauri chini ya Mtende wa Debora, katika nchi ya milima ya Efraimu kati ya Rama na Betheli, nao Waisraeli walikwenda kwake ili mashauri yao yaamuliwe. 6Alituma mtu kumwita Baraka mwana wa Abinoamu kutoka Kedeshi katika Naftali. Akamwambia, “BWANA, Mungu wa Israeli, amekuamuru hivi: ‘Nenda, uongoze watu mpaka Mlima Tabori, uchukue pamoja nawe watu elfu kumi kutoka makabila ya Naftali na Zabuloni. 7Nitamvuta Sisera, mkuu wa jeshi la Yabini, aje kukutana nawe kwenye Mto Kishoni, pamoja na magari yake na askari wake, nami nitamtia mkononi mwako.’” 8Baraka alimjibu, “Ukienda pamoja nami, nitakwenda. Lakini usipokwenda pamoja nami, sitakwenda.” 9Akasema, “Hakika nitakwenda pamoja nawe. Lakini katika njia unayoiendea heshima haitakuwa yako, kwa maana BWANA atamtia Sisera mikononi mwa mwanamke.” Basi Debora aliondoka akaenda pamoja na Baraka mpaka Kedeshi. 10Baraka aliwaita watu wa Zabuloni na Naftali waje Kedeshi, nao watu elfu kumi wakapanda wakimfuata. Debora naye akapanda pamoja naye. 11Basi Heberi Mkeni alikuwa amejitenga na Wakeni, wazao wa Hobabu, baba mkwe wa Musa, naye alikuwa amepiga hema lake mbali, kwenye mti mkubwa ulioko Zaananimu, karibu na Kedeshi. 12Habari zilimfikia Sisera kwamba Baraka mwana wa Abinoamu amepanda Mlima Tabori.

13Basi Sisera aliyaita magari yake yote, magari ya vita ya chuma mia tisa, na askari wote waliokuwa pamoja naye, kutoka Harosheth-hagoyimu mpaka Mto Kishoni. 14Kisha Debora alimwambia Baraka, “Amka! Hii ndiyo siku ambayo BWANA amemtia Sisera mkononi mwako. Je, si BWANA aliyetoka kukutangulia?” Basi Baraka alishuka kutoka Mlima Tabori, na watu elfu kumi wakimfuata. 15BWANA alimtia Sisera na magari yake yote na jeshi lake lote hofu kuu mbele ya shambulio la upanga la Baraka. Sisera alishuka kutoka garini mwake, akakimbia kwa miguu. 16Baraka aliyafuatia magari na jeshi mpaka Harosheth-hagoyimu, na jeshi lote la Sisera likaanguka kwa upanga. Hakubaki hata mtu mmoja. 17Wakati huo Sisera alikimbia kwa miguu mpaka hemani mwa Yaeli, mke wa Heberi Mkeni, kwa sababu Yabini mfalme wa Hazori na jamaa ya Heberi Mkeni walikuwa na amani. 18Yaeli alitoka kumlaki Sisera, akamwambia, “Karibu ndani, bwana wangu, karibu kwangu. Usiogope.” Basi akaingia pamoja naye hemani, naye akamfunika kwa zulia. 19Akamwambia, “Tafadhali nipe maji kidogo ninywe. Nina kiu.” Basi akafungua kiriba cha maziwa, akamnywesha, akamfunika tena. 20Akamwambia, “Simama mlangoni mwa hema. Mtu yeyote akija na kukuuliza, ‘Je, yupo mtu hapa?’ mwambie, ‘Hapana.’” 21Lakini Yaeli, mke wa Heberi, alichukua kigingi cha hema, akashika nyundo, akamnyemelea kimya kimya. Akakipigilia kigingi katika paji lake mpaka kikazama ardhini. Alikuwa amelala usingizi mzito kwa uchovu, naye akafa. 22Mara Baraka alifika akimfuatia Sisera, naye Yaeli akatoka kumlaki. Akamwambia, “Njoo, nitakuonyesha mtu unayemtafuta.” Basi akaingia pamoja naye, na tazama, Sisera alikuwa amelala amekufa, na kigingi cha hema katika paji lake. 23Basi siku ile Mungu alimnyenyekeza Yabini mfalme wa Kanaani mbele ya Waisraeli. 24Na nguvu za Waisraeli zikazidi kumlemea Yabini mfalme wa Kanaani, mpaka walipomwangamiza.