Waamuzi 16

1Samsoni alikwenda Gaza. Huko alimwona kahaba mmoja, akaingia kwake akalala naye. 2Watu wa Gaza waliambiwa, “Samsoni amekuja hapa!” Basi walipazunguka mahali pale, wakamvizia usiku kucha kwenye lango la mji. Hawakufanya lolote usiku wote, kwa maana walisema, “Mwanga wa asubuhi utakapokuja, tutamwua.” 3Lakini Samsoni alilala huko mpaka usiku wa manane tu. Usiku wa manane aliamka, akaishika milango ya lango la mji pamoja na miimo yake miwili, akaing’oa yote pamoja na komeo lake. Akaiweka mabegani mwake, akaipandisha mpaka juu ya kilima kinachoelekea Hebroni.

4Baada ya muda alimpenda mwanamke mmoja aitwaye Delila, katika bonde la Soreki. 5Watawala wa Wafilisti walipanda kwake, wakamwambia, “Mbembeleze, ujue ni nini kinachompa nguvu nyingi hivyo, na jinsi tunavyoweza kumshinda, ili tumfunge na kumtiisha. Kila mmoja wetu atakupa karibu kilo 13 za fedha.” 6Basi Delila alimwambia Samsoni, “Tafadhali niambie ni nini kinachokupa nguvu nyingi hivyo, na ingehitajika nini kukufunga na kukutiisha.” 7Samsoni alimjibu, “Kama wangenifunga kwa kamba saba mbichi za upinde ambazo hazijawahi kukaushwa, ningekuwa dhaifu na kuwa kama mtu mwingine yeyote.” 8Basi watawala wa Wafilisti walimletea kamba saba mbichi za upinde zisizokaushwa, naye akamfunga kwa kamba hizo. 9Alikuwa amewaficha watu katika chumba cha ndani wakingoja. Kisha akamwambia, “Samsoni, Wafilisti wako juu yako!” Lakini alizikata zile kamba za upinde kwa urahisi kama uzi wa katani ukatikavyo unapoguswa na moto. Kwa hiyo siri ya nguvu zake bado haikujulikana. 10Kisha Delila alimwambia Samsoni, “Umenifanya mjinga na kuniambia uongo! Sasa tafadhali niambie ingehitajika nini kukufunga.” 11Akamwambia, “Wakinifunga kwa nguvu kwa kamba mpya ambazo hazijawahi kutumika kwa kazi yoyote, nitakuwa dhaifu na kuwa kama mtu mwingine yeyote.” 12Basi Delila alichukua kamba mpya, akamfunga kwa kamba hizo. Kisha akamwambia, “Samsoni, Wafilisti wako juu yako!” Watu walikuwa wamejificha katika chumba cha ndani, wakingoja. Lakini alizikata zile kamba mikononi mwake kama uzi. 13Kisha Delila alimwambia Samsoni, “Muda wote huu umekuwa ukinifanya mjinga na kuniambia uongo. Niambie ingehitajika nini kukufunga.” Akamjibu, “Suka mashungi saba ya kichwa changu ndani ya kitambaa kilicho kwenye kitanda cha kufumia.” 14Basi aliyasuka mashungi yake ndani ya kitambaa, akayakaza kwa kigingi, akamwambia, “Samsoni, Wafilisti wako juu yako!” Akaamka usingizini, akakingoa kigingi cha kitanda cha kufumia pamoja na kitambaa. 15Kisha alimwambia, “Wawezaje kuniambia, ‘Nakupenda,’ na huku unanificha moyo wako? Mara tatu sasa umenifanya mjinga, wala bado hujaniambia ni nini kinachokupa nguvu nyingi hivyo.” 16Siku baada ya siku aliendelea kumsumbua kwa maneno yake na kumsihi, mpaka akachoka hata kutaka kufa. 17Basi alimweleza yote yaliyokuwa moyoni mwake. Akamwambia, “Wembe haujawahi kugusa kichwa changu, kwa sababu tangu tumboni mwa mama yangu nimetengwa kwa ajili ya Mungu kama Mnadhiri. Kama kichwa changu kingenyolewa, nguvu zangu zingeniacha, nami ningekuwa dhaifu kama mtu mwingine yeyote.” 18Delila alipoona kwamba amemweleza yote yaliyokuwa moyoni mwake, alituma ujumbe kwa watawala wa Wafilisti: “Pandeni mara moja tena, kwa maana ameniambia kila kitu.” Basi watawala wa Wafilisti walipanda kwake, wakiileta ile fedha pamoja nao. 19Alimbembeleza mpaka akalala magotini pake, akamwita mtu, naye akayanyoa mashungi saba ya kichwa chake. Kisha alianza kumtiisha, kwa maana nguvu zake zilikuwa zimemwacha. 20Kisha alisema, “Samsoni, Wafilisti wako juu yako!” Aliamka usingizini, akasema, “Nitatoka kama nilivyofanya mara zile nyingine na kujinasua.” Lakini hakujua kwamba BWANA amemwacha. 21Wafilisti walimkamata, wakamng’oa macho. Walimpeleka Gaza, wakamfunga kwa pingu za shaba, naye akawekwa kusaga nafaka gerezani. 22Lakini nywele za kichwa chake zilianza kuota tena baada ya kunyolewa.

23Basi watawala wa Wafilisti walikusanyika ili kumtolea mungu wao Dagoni dhabihu kubwa na kusherehekea. Walisema, “Mungu wetu amemtia mikononi mwetu Samsoni adui yetu.” 24Watu walipomwona, walimsifu mungu wao. Walisema, “Mungu wetu amemtia mikononi mwetu adui yetu, yule aliyeiharibu nchi yetu na kuwaua wengi wetu.” 25Walipokuwa wamechangamka, walisema, “Mwiteni Samsoni atuburudishe.” Basi walimwita Samsoni kutoka gerezani, naye akawachezea. Walimsimamisha kati ya nguzo. 26Samsoni alimwambia yule kijana aliyekuwa akimwongoza kwa mkono, “Niache nipumzike hapa na kuzipapasa nguzo zinazolishikilia hekalu, ili niziegemee.” 27Hekalu lilikuwa limejaa wanaume na wanawake, na watawala wote wa Wafilisti walikuwa humo. Juu ya dari palikuwa na wanaume na wanawake kama 3,000 wakitazama Samsoni alipokuwa akicheza. 28Kisha Samsoni alimlilia BWANA: “Bwana MUNGU, tafadhali unikumbuke. Tafadhali unipe nguvu mara hii moja tu tena, Ee Mungu, ili kwa pigo moja niwalipize Wafilisti kwa ajili ya macho yangu mawili.” 29Samsoni alizishika zile nguzo mbili za katikati ambazo hekalu lilikuwa limesimama juu yake, akajiegemeza juu yake, mkono wake wa kuume kwenye moja na mkono wa kushoto kwenye nyingine. 30Samsoni alisema, “Na nife pamoja na Wafilisti!” Akasukuma kwa nguvu zake zote, na hekalu likawaangukia watawala na watu wote waliokuwa ndani. Hivyo aliwaua watu wengi zaidi katika kufa kwake kuliko aliowaua katika maisha yake yote. 31Kisha ndugu zake na jamaa yote ya baba yake walishuka. Walimchukua, wakampandisha, wakamzika katika kaburi la Manoa baba yake, kati ya Sora na Eshtaoli. Alikuwa amewaamua Israeli kwa miaka ishirini.