Waamuzi 17

1Palikuwa na mtu mmoja wa nchi ya milima ya Efraimu, jina lake Mika. 2Alimwambia mama yake, “Unajua zile karibu kilo 13 za fedha ulizoibiwa, na jinsi ulivyotamka laana juu yake, nami nikakusikia ukisema? Tazama, fedha hiyo iko kwangu. Ni mimi niliyeichukua.” Mama yake akasema, “BWANA akubariki, mwanangu!” 3Alipomrudishia mama yake zile karibu kilo 13 za fedha, alisema, “Naiweka wakfu kabisa fedha hii kwa BWANA kutoka mkononi mwangu mwenyewe, kwa ajili ya mwanangu, ili kufanya sanamu ya kuchonga na sanamu ya kusubu. Kwa hiyo sasa nitakurudishia.” 4Basi alimrudishia mama yake ile fedha, naye akachukua karibu kilo 2.3 za fedha, akampa mfua fedha. Naye akaifanya kuwa sanamu ya kuchonga na sanamu ya kusubu, nayo ikawekwa katika nyumba ya Mika. 5Basi mtu huyu Mika alikuwa na mahali pake pa ibada. Alitengeneza efodi na miungu ya nyumbani, akamweka wakfu mmoja wa wanawe, naye akawa kuhani wake. 6Siku hizo hapakuwa na mfalme katika Israeli; kila mtu alifanya alivyoona ni sawa.

7Palikuwa na kijana mmoja kutoka Bethlehemu ya Yuda, wa ukoo wa Yuda. Alikuwa Mlawi, naye alikuwa akiishi huko kama mgeni. 8Mtu huyo aliondoka katika mji wa Bethlehemu ya Yuda ili kutafuta mahali pengine pa kuishi. Alipokuwa akisafiri, alifika katika nchi ya milima ya Efraimu, kwenye nyumba ya Mika. 9Mika alimwuliza, “Umetoka wapi?” Akajibu, “Mimi ni Mlawi kutoka Bethlehemu ya Yuda, nami ninakwenda kuishi popote nitakapopata mahali.” 10Kisha Mika alimwambia, “Kaa kwangu, uwe baba na kuhani kwangu. Nitakupa karibu gramu 115 za fedha kwa mwaka, jozi ya mavazi, na chakula chako.” Basi yule Mlawi akaingia. 11Mlawi huyo alikubali kukaa na mtu huyo, naye yule kijana akawa kwake kama mmoja wa wanawe mwenyewe. 12Basi Mika alimweka wakfu yule Mlawi. Kijana huyo akawa kuhani wake, akiishi katika nyumba ya Mika. 13Kisha Mika alisema, “Sasa najua kwamba BWANA atanitendea mema, kwa sababu nina Mlawi kuwa kuhani wangu.”