Waamuzi 2

1Malaika wa BWANA alipanda kutoka Gilgali mpaka Bokimu. Akasema, “Niliwapandisha kutoka Misri, nikawaleta katika nchi niliyowaahidi mababu zenu kwa kiapo. Nilisema, ‘Sitalivunja kamwe agano langu nanyi, 2nanyi msifanye agano lolote na watu wanaokaa katika nchi hii; bomoeni madhabahu zao.’ Lakini hamkunitii. Ni nini hiki mlichokifanya? 3Kwa hiyo sasa natangaza: Sitawafukuza mbele yenu. Watakuwa miiba mbavuni mwenu, na miungu yao itakuwa mtego kwenu.” 4Mara malaika wa BWANA alipomaliza kuwaambia Waisraeli wote maneno haya, watu walipaza sauti, wakalia. 5Walipaita mahali pale Bokimu, wakamtolea BWANA dhabihu huko.

6Yoshua alikuwa amewaaga watu, nao Waisraeli walikuwa wamekwenda, kila mmoja kwenye urithi wake, ili kuimiliki nchi. 7Watu walimtumikia BWANA muda wote wa maisha ya Yoshua, na muda wote wa maisha ya wazee walioishi baada yake, waliokuwa wameona kila tendo kuu BWANA alilowatendea Israeli. 8Yoshua mwana wa Nuni, mtumishi wa BWANA, alikufa akiwa na umri wa miaka mia na kumi. 9Walimzika ndani ya mipaka ya urithi wake mwenyewe, huko Timnath-heresi, kaskazini mwa Mlima Gaashi katika nchi ya milima ya Efraimu. 10Kizazi kile chote nacho kilikufa na kukusanywa kwa mababu zao, na baada yao kikakua kizazi kingine ambacho hakikumjua BWANA wala kile alichowatendea Israeli.

11Kisha Waisraeli walifanya maovu machoni pa BWANA, wakawatumikia Mabaali. 12Walimwacha BWANA, Mungu wa mababu zao, aliyekuwa amewatoa katika nchi ya Misri. Waliifuata miungu mingine, miungu ya mataifa yaliyowazunguka, wakaisujudia, na hivyo wakamkasirisha BWANA. 13Walimwacha BWANA, wakamtumikia Baali na Maashtorethi. 14Ndipo hasira ya BWANA ikawaka dhidi ya Israeli, akawatia mikononi mwa wavamizi waliowateka nyara. Aliwauza mikononi mwa adui waliowazunguka, nao hawakuweza tena kusimama imara mbele ya adui zao. 15Kila walipotoka kwenda vitani, mkono wa BWANA ulikuwa dhidi yao kuwaletea maafa, kama BWANA alivyowaonya na kama BWANA alivyowaapia. Walikuwa katika dhiki kubwa. 16Kisha BWANA aliinua waamuzi, waliowaokoa kutoka mikononi mwa wale waliowateka nyara. 17Hata hivyo hawakuwasikiliza hata waamuzi wao. Walijitoa kama makahaba kwa miungu mingine, wakaisujudia. Waliiacha upesi njia ambayo mababu zao waliifuata, njia ya kuzitii amri za BWANA; hawakufanya kama mababu zao walivyofanya. 18Kila mara BWANA alipowainulia mwamuzi, BWANA alikuwa pamoja na mwamuzi huyo, akawaokoa kutoka mikononi mwa adui zao muda wote mwamuzi alipokuwa hai. Kwa maana BWANA aliwahurumia walipougua chini ya wale waliowaonea na kuwatesa. 19Lakini mwamuzi alipokufa, walirudi nyuma na kuenenda vibaya kuliko mababu zao, wakiifuata miungu mingine, wakiitumikia na kuisujudia. Hawakuacha hata moja ya matendo yao wala njia zao za ukaidi. 20Ndipo hasira ya BWANA ikawaka dhidi ya Israeli, akasema, “Kwa kuwa taifa hili limelivunja agano langu, nililowaamuru mababu zao walishike, wala hawakunitii, 21nami sitayafukuza tena mbele yao mataifa yoyote kati ya yale ambayo Yoshua aliyaacha alipokufa, 22ili kupitia mataifa hayo nimjaribu Israeli, nione kama watashika njia ya BWANA na kuienenda kama mababu zao walivyofanya, au la.” 23Basi BWANA aliyaacha mataifa hayo yabaki. BWANA hakuyafukuza upesi, wala hakuwa ameyatia mikononi mwa Yoshua.