Waamuzi 10

1Baada ya Abimeleki, Tola mwana wa Pua, mwana wa Dodo, aliinuka kuwaokoa Israeli. Alikuwa mtu wa Isakari, naye aliishi Shamiri katika nchi ya milima ya Efraimu. 2Aliwaamua Israeli kwa miaka ishirini na mitatu. Kisha akafa, akazikwa Shamiri.

3Baada yake alikuja Yairi Mgileadi, aliyewaamua Israeli kwa miaka ishirini na miwili. 4Yairi alikuwa na wana thelathini waliopanda punda thelathini, nao walimiliki miji thelathini. Miji hiyo iliyo katika nchi ya Gileadi inajulikana kwa jina la Havoth-yairi mpaka leo. 5Kisha Yairi alikufa, akazikwa Kamoni.

6Kwa mara nyingine Waisraeli walifanya maovu machoni pa BWANA. Waliwatumikia Mabaali na Maashtorethi, miungu ya Aramu, miungu ya Sidoni, miungu ya Moabu, miungu ya Waamoni na miungu ya Wafilisti. Walimwacha BWANA, wala hawakumtumikia tena. 7Ndipo hasira ya BWANA ikawaka dhidi ya Israeli, akawauza mikononi mwa Wafilisti na mikononi mwa Waamoni. 8Mwaka ule waliwavunja na kuwaponda Waisraeli, na kwa miaka kumi na minane waliwaonea Waisraeli wote walioishi mashariki ya Yordani katika Gileadi, nchi ya Waamori. 9Waamoni walivuka hata Yordani ili kupigana na Yuda, Benyamini na nyumba ya Efraimu. Israeli walikuwa katika dhiki kubwa. 10Ndipo Waisraeli walimlilia BWANA, “Tumetenda dhambi dhidi yako, kwa sababu tumemwacha Mungu wetu na kuwatumikia Mabaali.”

11Naye BWANA aliwaambia Waisraeli, “Je, sikuwaokoa kutoka kwa Wamisri, Waamori, Waamoni na Wafilisti? 12Wasidoni, Waamaleki na Wamaoni walipowaonea nanyi mkanililia, niliwaokoa kutoka mikononi mwao. 13Hata hivyo mmeniacha, mkaitumikia miungu mingine. Kwa hiyo sitawaokoa tena. 14Nendeni mkaililie miungu mliyojichagulia. Hiyo ndiyo iwaokoe taabu itakapowajia.” 15Lakini Waisraeli walimwambia BWANA, “Tumetenda dhambi. Ututendee lolote wewe unaloona kuwa bora, lakini tafadhali utuokoe leo.” 16Kisha waliiondoa miungu ya kigeni iliyokuwa kati yao, wakamtumikia BWANA, naye hakuweza kuvumilia tena taabu ya Israeli.

17Waamoni walipoitwa vitani, walipiga kambi katika Gileadi, nao Waisraeli wakakusanyika, wakapiga kambi Mispa. 18Watu na maafisa wa Gileadi waliulizana, “Ni nani atakayekuwa mtu wa kuanzisha vita dhidi ya Waamoni? Yeye atakuwa kiongozi juu ya wote wanaoishi Gileadi.”