Waamuzi 19

1Siku hizo, hapakuwa na mfalme katika Israeli, Mlawi mmoja alikuwa akiishi kwa muda katika sehemu za mbali za nchi ya milima ya Efraimu. Alijitwalia suria kutoka Bethlehemu ya Yuda. 2Lakini suria wake hakuwa mwaminifu kwake. Alimwacha, akarudi nyumbani kwa baba yake huko Bethlehemu ya Yuda, akakaa huko kwa muda, miezi minne. 3Mumewe aliondoka kumfuata ili aseme naye kwa upole na kumrudisha. Alichukua mtumishi wake na punda wawili. Yule mwanamke alimkaribisha katika nyumba ya baba yake, na baba wa yule msichana alipomwona, alifurahi kukutana naye. 4Mkwewe, baba wa yule msichana, alimsihi sana abaki, kwa hiyo alikaa naye siku tatu. Walikula, wakanywa, wakalala huko. 5Waliamka mapema asubuhi ya siku ya nne, naye akajiandaa kuondoka. Lakini baba wa yule msichana alimwambia mkwewe, “Kula kidogo kwanza upate nguvu; kisha mtaweza kwenda.” 6Basi wote wawili waliketi, wakala na kunywa pamoja. Kisha baba wa yule msichana alimwambia yule mtu, “Tafadhali kubali kulala hapa usiku huu ujifurahishe.” 7Yule mtu alipoinuka ili aende, mkwewe aliendelea kumsihi, kwa hiyo akalala huko usiku mwingine. 8Aliamka mapema asubuhi ya siku ya tano ili aondoke, lakini baba wa yule msichana alisema, “Kula chakula kwanza upate nguvu, mkae mpaka alasiri.” Basi wote wawili walikula pamoja. 9Yule mtu alipoinuka ili aende pamoja na suria wake na mtumishi wake, mkwewe, baba wa yule msichana, alimwambia, “Tazama, mchana unafifia kuwa jioni. Tafadhali laleni hapa. Siku karibu imekwisha; lala hapa ujifurahishe. Kesho mtaamka mapema na kuanza safari ya kurudi nyumbani.” 10Lakini yule mtu alikataa kulala usiku huo. Aliondoka, akaanza safari, akafika mpaka mahali panapoelekeana na Yebusi, yaani Yerusalemu. Alikuwa na punda wawili waliotandikwa, na suria wake alikuwa pamoja naye. 11Walipokuwa karibu na Yebusi, na mchana karibu ukiisha, mtumishi alimwambia bwana wake, “Njoo, tuingie katika mji huu wa Wayebusi tulale humo.” 12Bwana wake alimjibu, “Hatutaingia katika mji wa wageni, ambamo hakuna Waisraeli. Tutaendelea mpaka Gibea.” 13Akamwambia mtumishi wake, “Njoo, tujaribu kufika mojawapo ya mahali hapa tulale Gibea au Rama.” 14Basi walipita, wakaendelea na safari yao, na jua likazama walipokaribia Gibea ya Benyamini. 15Walitoka njiani huko ili kuingia na kulala Gibea. Aliingia, akaketi katika uwanja wa mji, lakini hakuna aliyewakaribisha nyumbani kwake kulala usiku. 16Kisha jioni hiyo mzee mmoja alirudi kutoka kazini kwake mashambani. Alikuwa wa nchi ya milima ya Efraimu, naye alikuwa akiishi Gibea kama mgeni; watu wa mji huo walikuwa Wabenyamini. 17Alipoinua macho akamwona yule msafiri katika uwanja wa mji, yule mzee aliuliza, “Unakwenda wapi? Umetoka wapi?” 18Akajibu, “Tunasafiri kutoka Bethlehemu ya Yuda kwenda sehemu za mbali za nchi ya milima ya Efraimu. Huko ndiko nyumbani kwangu. Nilikuwa nimekwenda Bethlehemu ya Yuda, nami niko njiani kwenda nyumbani kwa BWANA. Lakini hakuna mtu hapa atakayenikaribisha nyumbani kwake. 19Tuna majani makavu na malisho yetu wenyewe kwa ajili ya punda, na mkate na divai kwa ajili yangu, kwa ajili ya mjakazi wako, na kwa ajili ya kijana aliye pamoja na watumishi wako. Hatupungukiwi na kitu chochote.” 20Yule mzee alisema, “Karibu sana. Niachie mahitaji yako yote. Ila tu usilale uwanjani.” 21Basi alimleta nyumbani kwake, akawalisha punda. Wakanawa miguu yao, wakala na kunywa. 22Walipokuwa wakifurahi, watu wa mji, watu wasiofaa kitu, waliizunguka nyumba, wakaendelea kuugonga mlango. Walimwita yule mzee, mwenye nyumba, “Mtoe yule mtu aliyeingia nyumbani kwako, ili tulale naye.” 23Mwenye nyumba alitoka kwao, akasema, “Hapana, ndugu zangu, tafadhali msitende uovu kama huu. Mtu huyu ameingia nyumbani kwangu kama mgeni wangu. Msitende jambo hili la aibu. 24Huyu hapa binti yangu, bikira, na suria wake. Niwatoe nje kwenu. Wanajisini na kuwatendea lolote mpendalo. Lakini msimtendee mtu huyu jambo hili la aibu.” 25Lakini watu wale walikataa kumsikiliza. Basi yule Mlawi alimshika suria wake, akamtoa nje kwao. Walimbaka na kumtesa usiku kucha mpaka asubuhi, wakamwachilia kulipokuwa kukipambazuka. 26Kulipopambazuka yule mwanamke alikuja, akaanguka mlangoni pa nyumba ya yule mtu alimokuwa bwana wake, akalala pale mpaka kulipokucha. 27Bwana wake aliamka asubuhi, akaifungua milango ya nyumba, akatoka ili aendelee na safari yake. Na pale alikuwa yule mwanamke, suria wake, amelala ameanguka mlangoni pa nyumba, mikono yake juu ya kizingiti. 28Akamwambia, “Inuka, twende.” Lakini hapakuwa na jibu. Kisha akamweka juu ya punda, na yule mtu akaondoka, akaenda nyumbani. 29Alipofika nyumbani kwake, alichukua kisu, akamshika suria wake, akamkata kiungo kwa kiungo vipande kumi na viwili. Kisha akavipeleka vipande hivyo katika nchi yote ya Israeli. 30Kila aliyeona alisema, “Jambo kama hili halijawahi kutukia wala kuonekana tangu siku Waisraeli walipopanda kutoka Misri mpaka leo. Lifikirini! Fanyeni shauri, mseme!”