Waamuzi 13

1Kwa mara nyingine Waisraeli walifanya yaliyo maovu machoni pa BWANA, naye BWANA akawatia katika mamlaka ya Wafilisti kwa miaka arobaini.

2Palikuwa na mtu mmoja wa Sora, wa ukoo wa Wadani, jina lake Manoa. Mkewe alikuwa tasa, hakuwa amezaa watoto. 3Malaika wa BWANA alimtokea yule mwanamke, akamwambia, “Sikiliza, wewe ni tasa, hujazaa watoto, lakini utachukua mimba na kuzaa mwana. 4Basi sasa jihadhari: usinywe divai wala pombe, wala usile kitu chochote kilicho najisi. 5Kwa maana utachukua mimba na kuzaa mwana. Wembe usiguse kichwa chake, kwa sababu kijana huyo atakuwa Mnadhiri, aliyetengwa kwa ajili ya Mungu tangu tumboni. Yeye ataanza kuwaokoa Israeli kutoka katika mamlaka ya Wafilisti.” 6Yule mwanamke alikwenda kwa mumewe, akasema, “Mtu wa Mungu amenijia. Alionekana kama malaika wa Mungu, wa kutisha mno. Sikumwuliza alikotoka, wala hakuniambia jina lake. 7Lakini aliniambia, ‘Utachukua mimba na kuzaa mwana. Basi sasa usinywe divai wala pombe, wala usile kitu chochote kilicho najisi, kwa sababu kijana huyo atakuwa Mnadhiri, aliyetengwa kwa ajili ya Mungu tangu tumboni mpaka siku atakapokufa.’”

8Kisha Manoa alimwomba BWANA: “Tafadhali, Bwana wangu, yule mtu wa Mungu uliyemtuma na aje kwetu tena atufundishe tunachopaswa kumfanyia kijana atakayezaliwa.” 9Mungu alimsikiliza Manoa, naye malaika wa Mungu akamjia yule mwanamke tena alipokuwa ameketi shambani. Lakini Manoa mumewe hakuwa pamoja naye. 10Yule mwanamke alikimbia upesi kumwambia mumewe. Akamwambia, “Tazama, yule mtu aliyenijia siku ile amenitokea tena.” 11Manoa aliondoka, akamfuata mkewe. Alipomfikia yule mtu, alimwuliza, “Je, wewe ndiwe uliyesema na mke wangu?” Akajibu, “Ndiye mimi.” 12Kisha Manoa alisema, “Sasa maneno yako yatakapotimia, kijana huyo ataishi maisha ya namna gani, na kazi yake itakuwa nini?” 13Malaika wa BWANA alimwambia Manoa, “Mke wako lazima ajihadhari kufanya yote niliyomwambia. 14Asile kitu chochote kitokacho kwenye mzabibu, wala asinywe divai wala pombe, wala asile kitu chochote kilicho najisi. Lazima ashike yote niliyomwamuru.” 15Manoa alimwambia malaika wa BWANA, “Tafadhali kaa nasi, ili tukuandalie mwana-mbuzi ule.” 16Malaika wa BWANA alimjibu Manoa, “Hata ukinizuia, sitakula chakula chako. Ukitaka kuandaa sadaka ya kuteketezwa, mtolee BWANA.” Kwa maana Manoa hakuwa ametambua kwamba alikuwa malaika wa BWANA. 17Kisha Manoa alimwambia malaika wa BWANA, “Jina lako ni nani? Tungependa kukuheshimu maneno yako yatakapotimia.” 18Malaika wa BWANA alimjibu, “Kwa nini unauliza habari za jina langu? Ni la ajabu.” 19Basi Manoa alimchukua yule mwana-mbuzi pamoja na sadaka ya nafaka, akavitoa kwa BWANA juu ya mwamba. Kisha, Manoa na mkewe wakitazama, yule malaika akatenda jambo la ajabu. 20Mwali wa moto ulipopanda kutoka madhabahuni kuelekea angani, malaika wa BWANA alipanda katika mwali huo wa madhabahu. Manoa na mkewe walipoona hivyo, walianguka kifudifudi chini. 21Malaika wa BWANA hakuwatokea tena Manoa na mkewe. Ndipo Manoa alipotambua kwamba alikuwa malaika wa BWANA. 22Manoa alimwambia mkewe, “Hakika tutakufa, kwa sababu tumemwona Mungu!” 23Lakini mkewe alimjibu, “Kama BWANA angekusudia kutuua, asingekubali sadaka ya kuteketezwa na sadaka ya nafaka kutoka mikononi mwetu. Asingetuonyesha mambo haya yote, wala kutujulisha mambo kama haya sasa.” 24Baada ya muda yule mwanamke alizaa mwana, akamwita jina lake Samsoni. Kijana alipokua, BWANA alimbariki. 25Kisha Roho wa BWANA alianza kumsukuma huko Mahane-dani, kati ya Sora na Eshtaoli.