Waamuzi 3

1Haya ndiyo mataifa ambayo BWANA aliyaacha katika nchi ili kwa hayo awajaribu Israeli, yaani, wale wote katika Israeli ambao hawakuwa wamejua vita vyovyote vya kuitwaa Kanaani. 2Alifanya hivyo ili tu vizazi vya Waisraeli vijifunze vita, angalau wale ambao hawakuwa wamevijua hapo kwanza. 3Hao walikuwa watawala watano wa Wafilisti, Wakanaani wote na Wasidoni, na Wahivi waliokaa katika milima ya Lebanoni kutoka Mlima Baal-hermoni mpaka Lebo-hamathi. 4Waliachwa ili kuwajaribu Israeli, ili ijulikane kama Waisraeli wangezitii amri za BWANA, alizowapa mababu zao kupitia Musa. 5Waisraeli waliishi kati ya Wakanaani, Wahiti, Waamori, Waperizi, Wahivi na Wayebusi. 6Waliwaoa binti za watu hao, wakawaoza binti zao wenyewe kwa wana wa watu hao, wakaitumikia miungu yao.

7Waisraeli walifanya maovu machoni pa BWANA. Walimsahau BWANA Mungu wao, wakawatumikia Mabaali na Maashera. 8Basi hasira ya BWANA ikawaka dhidi ya Israeli, naye akawauza mikononi mwa Kushan-rishathaimu mfalme wa Aramu-naharaimu. Waisraeli walimtumikia Kushan-rishathaimu kwa miaka minane. 9Kisha Waisraeli walimlilia BWANA, naye BWANA akawainulia mwokozi, aliyewaokoa: Othnieli mwana wa Kenazi, ndugu mdogo wa Kalebu. 10Roho wa BWANA alimjia, naye akawaamua Israeli. Alitoka kwenda vitani, naye BWANA akamtia Kushan-rishathaimu mfalme wa Aramu mikononi mwake, hata akamshinda Kushan-rishathaimu. 11Kisha nchi ilikuwa na amani kwa miaka arobaini, naye Othnieli mwana wa Kenazi akafa.

12Kwa mara nyingine Waisraeli walifanya maovu machoni pa BWANA. Basi BWANA akamtia nguvu Egloni mfalme wa Moabu dhidi ya Israeli, kwa sababu walikuwa wamefanya maovu machoni pa BWANA. 13Egloni aliwakusanya Waamoni na Waamaleki waungane naye, akaenda akawashinda Israeli, nao wakautwaa Mji wa Mitende. 14Waisraeli walimtumikia Egloni mfalme wa Moabu kwa miaka kumi na minane.

15Kisha Waisraeli walimlilia BWANA, naye BWANA akawainulia mwokozi: Ehudi mwana wa Gera, wa kabila la Benyamini, mtu aliyetumia mkono wa kushoto. Waisraeli walimtuma kupeleka kodi yao kwa Egloni mfalme wa Moabu. 16Ehudi alikuwa amejifanyia upanga wenye makali kuwili, urefu wake karibu sentimita 45, akaufunga kwenye paja lake la kuume chini ya nguo zake. 17Alimkabidhi Egloni mfalme wa Moabu kodi ile. Egloni alikuwa mtu mnene kupita kiasi. 18Alipomaliza kumkabidhi kodi, aliwaaga watu waliokuwa wameibeba. 19Lakini Ehudi mwenyewe alirudi kutoka kwenye sanamu za kuchonga karibu na Gilgali, akasema, “Mtukufu mfalme, nina ujumbe wa siri kwako.” Mfalme akasema, “Kimya!” Nao watumishi wake wote wakatoka nje. 20Ehudi alimjia alipokuwa ameketi peke yake katika chumba chake cha juu chenye baridi. Ehudi akasema, “Nina ujumbe kutoka kwa Mungu kwako,” naye mfalme akainuka kutoka kitini pake. 21Ehudi alinyosha mkono wake wa kushoto, akauchomoa upanga kutoka paja lake la kuume, akauchoma ndani ya tumbo la mfalme. 22Hata mpini uliingia ndani pamoja na kiwembe, na mafuta yakafunika kiwembe, kwa sababu Ehudi hakuuchomoa upanga tumboni mwake. Ncha yake ikatokea mgongoni. 23Kisha Ehudi alitoka kwenda ukumbini. Aliifunga milango ya chumba cha juu nyuma yake, akaifunga kwa komeo. 24Ehudi alipokwisha kuondoka, watumishi wa mfalme walikuja, wakakuta milango ya chumba cha juu imefungwa kwa komeo. Wakasema, “Lazima anajisaidia ndani ya chumba chenye baridi.” 25Walingoja mpaka wakaona aibu, lakini bado hakuifungua milango ya chumba cha juu. Basi wakachukua ufunguo wakaifungua, na tazama, bwana wao alikuwa amelala sakafuni, amekufa. 26Ehudi alitoroka walipokuwa wakingoja. Alipita sanamu za kuchonga, akakimbilia Seira. 27Alipofika, alipiga baragumu katika nchi ya milima ya Efraimu, nao Waisraeli wakashuka pamoja naye kutoka milimani, Ehudi akiwa mbele yao. 28Aliwaambia, “Nifuateni, kwa sababu BWANA amewatia adui zenu Wamoabu mikononi mwenu.” Basi walishuka wakimfuata, wakavishika vivuko vya Yordani vinavyoelekea Moabu, wala hawakumwacha mtu yeyote avuke. 29Wakati huo waliwaua Wamoabu kama elfu kumi, wote wakiwa watu wenye miili imara na wapiganaji hodari; hakuna hata mmoja aliyeokoka. 30Basi siku ile Moabu walishindwa, wakawa chini ya mamlaka ya Israeli, na nchi ikawa na amani kwa miaka themanini.

31Baada ya Ehudi alikuja Shamgari mwana wa Anathi. Aliwaua Wafilisti mia sita kwa fimbo ya kuchungia ng’ombe, naye pia akawaokoa Israeli.