Waamuzi 9

1Abimeleki mwana wa Yerubaali alikwenda kwa jamaa za mama yake huko Shekemu, akazungumza nao na ukoo wote wa jamaa ya mama yake. Akasema, 2“Tafadhali waulizeni viongozi wote wa Shekemu swali hili: ‘Ni lipi lililo bora kwenu, kutawaliwa na watu sabini, wana wote wa Yerubaali, au kutawaliwa na mtu mmoja? Kumbukeni kwamba mimi ni damu yenu na nyama yenu.’” 3Jamaa za mama yake walimsemea, wakawaeleza viongozi wa Shekemu maneno hayo yote, na mioyo yao ikaelekea kwa Abimeleki, kwa sababu walisema, “Yeye ni ndugu yetu wa damu.” 4Walimpa vipande sabini vya fedha kutoka hekalu la Baal-berithi, naye Abimeleki akatumia fedha hiyo kuajiri watu wasiofaa kitu na wakorofi, wakawa wafuasi wake. 5Alikwenda nyumbani kwa baba yake huko Ofra, akawaua ndugu zake, wana sabini wa Yerubaali, juu ya jiwe moja. Lakini Yothamu, mwana mdogo kabisa wa Yerubaali, aliokoka kwa sababu alikuwa amejificha.

6Kisha viongozi wote wa Shekemu na watu wote wa Beth-milo walikusanyika, wakaenda wakamtawaza Abimeleki kuwa mfalme karibu na mwaloni wa jiwe la kusimamishwa huko Shekemu. 7Yothamu alipoambiwa habari hiyo, alikwenda akasimama juu ya kilele cha Mlima Gerizimu, akapaza sauti, akawaambia, “Nisikilizeni, enyi viongozi wa Shekemu, ili Mungu naye awasikilize. 8Siku moja miti ilitoka kwenda kumtia mafuta mfalme wa kuitawala. Ikauendea mzeituni, ikasema, ‘Uwe mfalme wetu.’ 9Lakini mzeituni ukaijibu, ‘Je, niache kutoa mafuta yangu mazuri, yanayotumiwa kumheshimu Mungu na wanadamu, niende kupepea juu ya miti?’ 10Kisha miti ikauambia mtini, ‘Njoo wewe, uwe mfalme wetu.’ 11Lakini mtini ukaijibu, ‘Je, niache utamu wangu na matunda yangu mazuri niende kupepea juu ya miti?’ 12Kisha miti ikauambia mzabibu, ‘Njoo wewe, uwe mfalme wetu.’ 13Lakini mzabibu ukaijibu, ‘Je, niache divai yangu mpya, inayoleta furaha kwa Mungu na kwa wanadamu, niende kupepea juu ya miti?’ 14Kisha miti yote ikauambia mchongoma, ‘Njoo wewe, uwe mfalme wetu.’ 15Mchongoma ukaijibu miti, ‘Ikiwa kweli mnanitia mafuta niwe mfalme juu yenu, njooni mpate hifadhi kivulini mwangu. La sivyo, moto na utoke katika mchongoma uiteketeze mierezi ya Lebanoni!’ 16Basi sasa, ikiwa mlitenda kwa uaminifu na kwa heshima mlipomtawaza Abimeleki, na ikiwa mmemtendea Yerubaali na jamaa yake mema na kumpa yale yaliyostahili matendo yake, 17kwa maana baba yangu aliwapigania, akahatarisha maisha yake, akawaokoa kutoka mikononi mwa Midiani, 18lakini leo mmeigeuka jamaa ya baba yangu. Mmewaua wanawe, watu sabini, juu ya jiwe moja, na mmemtawaza Abimeleki, mwana wa mjakazi wake, kuwa mfalme juu ya viongozi wa Shekemu kwa sababu ni ndugu yenu; 19basi nasema, ikiwa mmemtendea Yerubaali na jamaa yake kwa uaminifu na kwa heshima leo, furahini pamoja na Abimeleki, naye afurahi pamoja nanyi. 20Lakini ikiwa sivyo, moto na utoke kwa Abimeleki uwateketeze viongozi wa Shekemu na Beth-milo, na moto na utoke kwa viongozi wa Shekemu na Beth-milo umteketeze Abimeleki!” 21Kisha Yothamu alikimbia kuokoa maisha yake. Alitorokea Beeri, akakaa huko, mbali na mkono wa ndugu yake Abimeleki.

22Abimeleki aliwatawala Israeli kwa miaka mitatu. 23Kisha Mungu alituma roho mbaya ije kati ya Abimeleki na viongozi wa Shekemu, nao viongozi wa Shekemu wakavunja uaminifu wao kwa Abimeleki, 24ili jeuri waliyotendewa wana sabini wa Yerubaali iwarudie waliyoitenda, na hatia ya damu yao imwangukie Abimeleki ndugu yao, aliyewaua, na viongozi wa Shekemu, waliomsaidia kuwaua ndugu zake. 25Viongozi wa Shekemu waliweka watu wa kumvizia juu ya vilele vya milima, nao wakawanyang’anya wote waliopita karibu nao njiani. Abimeleki akaambiwa habari hiyo.

26Kisha Gaali mwana wa Ebedi alifika pamoja na jamaa zake, akahamia Shekemu, nao viongozi wa Shekemu wakamwamini. 27Walitoka kwenda mashambani, wakavuna zabibu za mashamba yao ya mizabibu, wakazikanyaga, wakafanya sikukuu ya mavuno. Wakaingia katika hekalu la mungu wao, wakala na kunywa, wakamlaani Abimeleki. 28Gaali mwana wa Ebedi alisema, “Abimeleki ni nani, na Shekemu ni nini, hata tuwe watumishi wake? Je, yeye si mwana wa Yerubaali, na Zebuli ni msaidizi wake? Watumikieni watu wa Hamori, baba wa Shekemu! Kwa nini tumtumikie Abimeleki? 29Laiti watu hawa wangekuwa chini ya uongozi wangu! Ningemwondoa Abimeleki.” Naye akamwambia Abimeleki, “Liimarishe jeshi lako, utoke upigane!” 30Zebuli, liwali wa mji, aliposikia yale Gaali mwana wa Ebedi aliyosema, alikasirika sana. 31Alituma wajumbe kwa Abimeleki kwa siri kusema, “Gaali mwana wa Ebedi na jamaa zake wamekuja Shekemu, nao wanaugeuza mji dhidi yako. 32Kwa hiyo sasa, ondoka usiku, wewe na askari walio pamoja nawe, mkavizie katika mashamba nje ya mji. 33Asubuhi, mara jua linapochomoza, amka mapema uushambulie mji. Yeye na watu wake watakapotoka dhidi yako, mtendee kadiri nafasi itakavyokuruhusu.”

34Basi Abimeleki na askari wote waliokuwa pamoja naye waliondoka usiku, wakajificha kuizunguka Shekemu katika vikosi vinne. 35Gaali mwana wa Ebedi alitoka akasimama penye mlango wa lango la mji wakati Abimeleki na askari wake walipoinuka kutoka mahali walipojificha. 36Gaali alipowaona askari, alimwambia Zebuli, “Tazama, watu wanashuka kutoka vilele vya milima!” Zebuli akamjibu, “Unadhani vivuli vya milima ni watu.”

37Gaali akasema tena, “Tazama, askari wanashuka kutoka katikati ya nchi, na kikosi kingine kinakuja kwa njia itokayo Mwaloni wa Wapiga Ramli!” 38Kisha Zebuli alimwambia, “Yako wapi sasa majivuno yako, wewe uliyesema, ‘Abimeleki ni nani, hata tuwe watumishi wake?’ Je, hawa si wale watu uliowadharau? Toka sasa upigane nao!”

39Basi Gaali alitoka akiwaongoza viongozi wa Shekemu, akapigana na Abimeleki. 40Abimeleki alimfukuza, naye Gaali akamkimbia. Wengi walianguka wamekufa njiani, mpaka penye mlango wa lango. 41Kisha Abimeleki alikaa Aruma, naye Zebuli akawafukuza Gaali na jamaa zake, wasiweze tena kukaa Shekemu. 42Siku iliyofuata watu wa Shekemu walitoka kwenda mashambani, na mtu fulani akampelekea Abimeleki habari hiyo. 43Aliwachukua askari wake, akawagawa katika vikosi vitatu, akaweka mavizio mashambani. Mara alipowaona watu wakitoka mjini, aliinuka akawashambulia. 44Abimeleki na majeshi yaliyokuwa pamoja naye walikimbia mbele, wakasimama penye mlango wa lango la mji, huku vile vikosi viwili vingine vikiwashambulia wote waliokuwa mashambani na kuwaua. 45Abimeleki alipigana na mji siku ile yote. Aliuteka, akawaua watu waliokuwa ndani yake; kisha akaubomoa mji, akanyunyiza chumvi juu yake.

46Viongozi wote wa Mnara wa Shekemu waliposikia habari hiyo, waliingia ndani ya ngome ya hekalu la El-berithi. 47Abimeleki aliambiwa kwamba viongozi wote wa Mnara wa Shekemu wamekusanyika huko. 48Abimeleki na askari wake wote walipanda Mlima Salmoni. Alichukua shoka mkononi mwake, akakata tawi la mti, akaliinua na kuliweka begani mwake. Kisha akawaambia watu waliokuwa pamoja naye, “Upesi! Fanyeni sawasawa na mlivyoniona nikifanya!” 49Basi askari wote nao walikata kila mmoja tawi lake, wakamfuata Abimeleki. Waliyarundika matawi kuizunguka ngome, wakaichoma moto pamoja na watu waliokuwa ndani. Basi watu wote wa Mnara wa Shekemu nao walikufa, kama elfu moja, wanaume na wanawake.

50Kisha Abimeleki alikwenda Thebesi, akauzingira, akauteka. 51Lakini ndani ya mji kulikuwa na mnara imara, nao wanaume wote na wanawake na viongozi wote wa mji walikimbilia ndani yake. Walijifungia ndani, wakapanda juu ya paa la mnara. 52Abimeleki alikuja kwenye mnara akaushambulia. Alikwenda mpaka karibu kabisa na mlango wa mnara ili kuuchoma moto. 53Lakini mwanamke mmoja aliliangusha jiwe la juu la kusagia juu ya kichwa cha Abimeleki, akalipasua fuvu lake. 54Upesi alimwita kijana aliyembebea silaha, akamwambia, “Chomoa upanga wako uniue, ili mtu yeyote asiseme habari zangu, ‘Mwanamke ndiye aliyemwua.’” Basi kijana wake akamchoma, naye akafa. 55Watu wa Israeli walipoona kwamba Abimeleki amekufa, wote walirudi nyumbani. 56Kwa njia hii Mungu alimlipa Abimeleki kwa uovu aliomtendea baba yake kwa kuwaua ndugu zake sabini. 57Mungu pia aliurudisha uovu wote wa watu wa Shekemu juu ya vichwa vyao wenyewe, nayo laana ya Yothamu mwana wa Yerubaali ikawajia.