Yoshua 1

1Baada ya kifo cha Musa, mtumishi wa BWANA, BWANA alisema na Yoshua mwana wa Nuni, msaidizi wa Musa. BWANA alimwambia, 2“Mtumishi wangu Musa amekufa. Sasa basi, inuka uvuke Yordani hii, wewe pamoja na watu hawa wote, mwingie katika nchi ninayokaribia kuwapa Waisraeli. 3Nimewapa kila mahali mtakapokanyaga kwa miguu yenu, kama nilivyomwahidi Musa. 4Nchi yenu itaanzia nyikani hadi Lebanoni hii, na hadi mto mkubwa, Frati, nchi yote ya Wahiti, na upande wa magharibi hadi Bahari Kuu, jua linapotua. 5Hakuna mtu atakayeweza kusimama dhidi yako maadamu unaishi. Nitakuwa pamoja nawe kama nilivyokuwa pamoja na Musa. Sitakuachilia wala sitakutupa. 6Uwe imara na jasiri, kwa sababu wewe ndiwe utakayewaongoza watu hawa kuirithi nchi niliyowaapia babu zao kuwapa. 7Ila tu uwe imara na jasiri sana. Uwe mwangalifu kuishika sheria yote ambayo mtumishi wangu Musa alikuagiza. Usigeuke kutoka kwake kwenda kulia wala kushoto, nawe utatenda kwa hekima na kufanikiwa kila mahali utakapokwenda. 8Kitabu hiki cha sheria kiwe midomoni mwako daima, ukikitafakari mchana na usiku, ili uwe mwangalifu kufanya yote yaliyoandikwa ndani yake. Hapo njia zako zitafika mwisho mwema, nawe utatenda kwa hekima na kufanikiwa. 9Je, sikukupa agizo hili? Uwe imara na jasiri. Usitetemeke kwa hofu wala usikate tamaa, kwa maana BWANA Mungu wako yuko pamoja nawe kila mahali utakapokwenda.”

10Basi Yoshua aliwapa maafisa wa watu maagizo haya: 11“Piteni katika kambi yote mkawape watu agizo hili: ‘Andaeni chakula cha safari, kwa sababu siku tatu kuanzia leo mtavuka Yordani hii, ili mwingie kuimiliki nchi ambayo BWANA Mungu wenu anawapa iwe yenu.’”

12Kisha Yoshua aliwaambia Wareubeni, Wagadi na nusu ya kabila la Manase: 13“Kumbukeni agizo ambalo Musa mtumishi wa BWANA aliwapa: ‘BWANA Mungu wenu anawapa pumziko, naye atawapa nchi hii.’ 14Wake zenu, watoto wenu na mifugo yenu wanaweza kukaa katika nchi ambayo Musa aliwapa mashariki ya Yordani. Lakini wanaume wenu wote wa vita lazima wavuke wakiwa na silaha, wakiwatangulia ndugu zenu Waisraeli, nanyi lazima mwasaidie, 15mpaka BWANA atakapowapa ndugu zenu pumziko kama alivyowapa ninyi, nao pia waimiliki nchi ambayo BWANA Mungu wenu anawapa. Baada ya hapo mnaweza kurudi katika nchi iliyo yenu na kuimiliki, nchi ambayo Musa mtumishi wa BWANA aliwapa mashariki ya Yordani, upande wa jua linapochomoza.” 16Wakamjibu Yoshua, “Tutatekeleza maagizo yako yote, na tutakwenda kila mahali utakapotutuma. 17Tulimtii Musa katika kila jambo, na vivyo hivyo tutakutii wewe. Ila tu BWANA Mungu wako awe pamoja nawe jinsi alivyokuwa pamoja na Musa. 18Mtu yeyote atakayeasi maagizo yako na kutoyatii maneno yako, chochote utakachoamuru, atauawa. Ila tu uwe imara na jasiri!”