Yoshua 4

1Taifa lote lilipomaliza kuvuka Yordani, BWANA alimwambia Yoshua, 2“Chagueni watu kumi na wawili kutoka kwa watu, mtu mmoja kutoka kila kabila. 3Kisha waagizeni, ‘Chukueni mawe kumi na mawili kutoka hapa katikati ya Yordani, mahali hasa ambapo makuhani wamesimama imara. Yavusheni pamoja nanyi na kuyaweka mahali mtakapopiga kambi usiku huu.’”

4Basi Yoshua aliwaita pamoja wale watu kumi na wawili aliokuwa amewachagua kutoka kwa Waisraeli, mmoja kutoka kila kabila. 5Yoshua aliwaambia, “Litangulieni sanduku la BWANA Mungu wenu mwende hadi katikati ya Yordani. Kila mmoja wenu ainue jiwe aliweke begani mwake, moja kwa kila kabila la Waisraeli, 6ili hii iwe ishara kati yenu. Siku zijazo, watoto wenu watakapouliza, ‘Mawe haya yana maana gani kwenu?’ 7basi waambieni, ‘Maji ya Yordani yalikatika mbele ya sanduku la agano la BWANA. Lilipovuka kuingia Yordani, maji ya Yordani yalikatika.’ Mawe haya yatakuwa ukumbusho kwa Waisraeli milele.” 8Waisraeli walifanya kama Yoshua alivyoamuru. Waliinua mawe kumi na mawili kutoka katikati ya Yordani, moja kwa kila kabila la Waisraeli, kama BWANA alivyomwambia Yoshua. Wakayavusha hadi mahali pa kambi, wakayaweka chini huko. 9Katikati ya Yordani, Yoshua alisimamisha pia mawe kumi na mawili, mahali walipokuwa wamesimama makuhani waliolibeba sanduku la agano. Yako huko hadi leo. 10Makuhani waliolibeba sanduku waliendelea kusimama katikati ya Yordani mpaka kila jambo lilipofanyika ambalo BWANA alikuwa amemwamuru Yoshua awaambie watu, kama vile Musa alivyokuwa amemwamuru Yoshua. Nao watu wakavuka kwa haraka. 11Watu wote walipomaliza kuvuka, sanduku la BWANA na makuhani walivuka mbele ya watu. 12Wareubeni, Wagadi na nusu ya kabila la Manase walivuka wakiwa na silaha za vita, wakiwatangulia Waisraeli, kama Musa alivyowaambia. 13Wanaume kama elfu arobaini waliojiandaa kwa vita walivuka mbele za BWANA, tayari kwa mapigano, hadi nchi tambarare za Yeriko.

14Siku hiyo BWANA alimwinua Yoshua machoni pa Israeli wote, nao wakamheshimu kwa kicho maisha yake yote, kama walivyomheshimu Musa.

15BWANA alimwambia Yoshua, 16“Waagize makuhani wanaolibeba sanduku la Ushuhuda watoke Yordani.” 17Basi Yoshua aliwaamuru makuhani, “Tokeni ndani ya Yordani.” 18Makuhani waliolibeba sanduku la agano la BWANA walipopanda kutoka katikati ya Yordani, na nyayo za miguu yao zilipofika nchi kavu, maji ya Yordani yalirudi mahali pake, yakafurika kingo zake zote kama hapo awali. 19Siku ya kumi ya mwezi wa kwanza, watu walipanda kutoka Yordani, wakapiga kambi Gilgali, kwenye mpaka wa mashariki wa Yeriko. 20Yoshua aliyasimamisha huko Gilgali yale mawe kumi na mawili waliyoyatoa Yordani. 21Kisha aliwaambia Waisraeli, “Siku zijazo, watoto wenu watakapowauliza wazazi wao, ‘Mawe haya yana maana gani?’ 22basi waelezeni watoto wenu: ‘Israeli walivuka Yordani hii juu ya nchi kavu.’ 23Kwa maana BWANA Mungu wenu aliyakausha maji ya Yordani mbele yenu mpaka mlipomaliza kuvuka, kama BWANA Mungu wenu alivyoifanya Bahari ya Shamu, akaikausha mbele yetu mpaka tulipomaliza kuvuka, 24ili mataifa yote ya dunia yajue jinsi mkono wa BWANA ulivyo na nguvu, na ili mmche BWANA Mungu wenu siku zote.”