Yoshua 9

1Wafalme wote upande wa magharibi wa Yordani waliposikia habari hizi, wafalme wa nchi ya milima, wa vilima vya chini na wa pwani yote ya Bahari Kuu hadi Lebanoni, wafalme wa Wahiti, Waamori, Wakanaani, Waperizi, Wahivi na Wayebusi, 2waliunganisha majeshi yao kupigana na Yoshua na Israeli kwa nia moja.

3Lakini wakazi wa Gibeoni waliposikia mambo ambayo Yoshua aliufanyia Yeriko na Ai, 4nao pia walitumia hila. Waliondoka wakijifanya wajumbe, wakiwa na magunia yaliyochakaa juu ya punda wao, na viriba vya divai vilivyochakaa, vilivyopasuka na kushonwa, 5Walivaa viatu vikuukuu vyenye viraka miguuni mwao, na nguo zilizochakaa. Mikate yote waliyobeba kwa chakula ilikuwa mikavu na kumumunyika. 6Basi walikwenda kwa Yoshua kambini huko Gilgali, wakamwambia yeye na watu wa Israeli, “Tumetoka nchi ya mbali. Sasa fanyeni mkataba nasi.” 7Lakini watu wa Israeli waliwaambia Wahivi, “Huenda mnaishi kati yetu. Tungewezaje basi kufanya mkataba nanyi?” 8Wakamwambia Yoshua, “Sisi ni watumishi wako.” Yoshua akawauliza, “Ninyi ni nani? Mnatoka wapi?” 9Wakamjibu, “Watumishi wako wametoka nchi iliyo mbali sana kwa sababu ya sifa za BWANA Mungu wako. Tumesikia habari {WK} na yote aliyoyafanya Misri, 10na yote aliyowatendea wale wafalme wawili wa Waamori upande wa mashariki wa Yordani: Sihoni mfalme wa Heshboni, na Ogu mfalme wa Bashani, ambaye mji wake ulikuwa Ashtarothi. 11Basi wazee wetu na wote wanaoishi katika nchi yetu walituambia, ‘Chukueni chakula cha safari. Nendeni mkakutane nao, mkawaambie, “Sisi ni watumishi wenu. Sasa fanyeni mkataba nasi.”’ 12Mkate wetu huu ulikuwa bado wa moto tulipouchukua nyumbani kama chakula cha njiani, siku tulipoondoka kuja kwenu. Uangalieni sasa: umekauka na kumumunyika. 13Viriba hivi vya divai vilikuwa vipya tulipovijaza, na tazameni jinsi vilivyopasuka. Na nguo zetu na viatu vyetu vimechakaa katika safari ndefu mno.” 14Watu wa Israeli walichukua baadhi ya chakula chao, lakini hawakutafuta neno la BWANA. 15Basi Yoshua alifanya amani nao, akafanya mkataba nao wa kuwaacha hai, na viongozi wa jumuiya wakawaapia. 16Siku tatu baada ya kufanya mkataba nao, Waisraeli walisikia kwamba watu hao walikuwa jirani zao na waliishi kati yao. 17Basi Waisraeli waliondoka, wakafika kwenye miji yao siku ya tatu. Miji yao ilikuwa Gibeoni, Kefira, Beerothi na Kiriath-yearimu. 18Lakini Waisraeli hawakuwaua, kwa sababu viongozi wa jumuiya walikuwa wamewaapia kwa BWANA, Mungu wa Israeli. Jumuiya yote ikawanung’unikia viongozi hao. 19Lakini viongozi wote waliiambia jumuiya yote, “Tuliwaapia kwa BWANA, Mungu wa Israeli, kwa hiyo sasa haturuhusiwi kuwagusa. 20Hivi ndivyo tutakavyowatendea: tutawaacha hai, ili ghadhabu isije juu yetu kwa sababu ya kiapo tulichowaapia.” 21Viongozi waliwaambia, “Waacheni waishi.” Basi wakawa wakata kuni na wachota maji kwa ajili ya jumuiya yote, kama viongozi walivyosema. 22Kisha Yoshua aliwaita, akasema, “Kwa nini mlitudanganya mkisema, ‘Tunaishi mbali sana nanyi,’ wakati kumbe mnaishi hapa hapa kati yetu? 23Kwa hiyo sasa mko chini ya laana: hamtaacha kamwe kuwa watumwa, mkikata kuni na kuchota maji kwa ajili ya nyumba ya Mungu wangu.” 24Wakamjibu Yoshua, “Watumishi wako waliambiwa kwa hakika kwamba BWANA Mungu wako alimwagiza Musa, mtumishi wake, awape ninyi nchi yote na kuwaangamiza wakazi wake wote mbele yenu. Kwa hiyo tuliogopa sana kwa ajili ya maisha yetu kwa sababu yenu, na ndiyo sababu tulifanya hivi. 25Sasa tazama, tuko mikononi mwako. Utufanyie lolote unaloona ni jema na la haki.” 26Basi Yoshua aliwatendea hivyo: aliwaokoa na mikono ya Waisraeli, nao hawakuwaua. 27Siku ile Yoshua aliwafanya kuwa wakata kuni na wachota maji kwa ajili ya jumuiya na kwa ajili ya madhabahu ya BWANA, mahali ambapo angepachagua, na ndivyo walivyo hata leo.