Yoshua 23

1Muda mrefu baadaye, BWANA alipokuwa amewapa Israeli raha kutokana na kila adui pande zote, na Yoshua alikuwa mzee mwenye umri mkubwa, 2Yoshua aliwaita Israeli wote, wazee wao, viongozi, waamuzi na maafisa, akawaambia, “Sasa mimi ni mzee na umri wangu ni mkubwa. 3Ninyi wenyewe mmeona kila kitu ambacho BWANA Mungu wenu ameyafanyia mataifa haya yote kwa ajili yenu. Ni BWANA Mungu wenu mwenyewe ambaye amekuwa akiwapigania. 4Tazameni, nimewagawia kwa kura nchi ya mataifa haya yaliyobaki, iwe urithi wa makabila yenu, pamoja na nchi ya mataifa yote ambayo nimekwisha kuyaangamiza, kutoka Yordani hadi Bahari Kuu upande wa magharibi. 5BWANA Mungu wenu mwenyewe atayasukuma nyuma mbele yenu na kuyafukuza mtoke njiani mwenu, nanyi mtaimiliki nchi yao, kama BWANA Mungu wenu alivyowaahidi. 6Basi kuweni hodari sana, mshike na kutekeleza kila kitu kilichoandikwa katika kitabu cha sheria ya Musa, bila kugeuka kutoka hiyo kwenda kulia wala kushoto, 7ili msichanganyike na mataifa haya yaliyobaki kati yenu. Msiyataje hata majina ya miungu yao, wala msimwapishe mtu kwa majina hayo. Msiitumikie wala msiisujudie. 8Badala yake, ambataneni na BWANA Mungu wenu, kama mlivyofanya mpaka sasa. 9BWANA amefukuza mbele yenu mataifa makubwa na yenye nguvu, na mpaka leo hakuna mtu aliyeweza kusimama dhidi yenu. 10Mmoja wa watu wenu anaweza kuwakimbiza elfu, kwa sababu BWANA Mungu wenu mwenyewe anawapigania, kama alivyowaahidi. 11Basi jihadharini sana, kwa faida yenu wenyewe, kumpenda BWANA Mungu wenu. 12Kwa maana mkigeuka kamwe na kujiunga na mabaki ya mataifa haya yaliyobaki kati yenu, mkioana nao na kuchanganyika nao nao wakichanganyika nanyi, 13mjue hakika kwamba BWANA Mungu wenu hatayafukuza tena mataifa haya mbele yenu. Yatakuwa mtego na tanzi kwenu, mjeledi mbavuni mwenu na miiba machoni mwenu, mpaka mtakapofutiliwa mbali kutoka nchi hii nzuri ambayo BWANA Mungu wenu amewapa. 14Sasa niko karibu kwenda njia ya dunia yote. Mnajua kwa moyo wenu wote na kwa nafsi yenu yote kwamba hakuna hata neno moja lililopungua kati ya maneno yote mema ambayo BWANA Mungu wenu aliyasema kuwahusu. Kila moja limewatimilia; hakuna hata neno moja lililopungua. 15Lakini kama vile kila jambo jema ambalo BWANA Mungu wenu aliwaahidi limewajia, ndivyo BWANA atakavyoleta juu yenu kila jambo baya alilowaonya, mpaka atakapokuwa amewaangamiza nanyi mkatoweka kutoka nchi hii nzuri ambayo BWANA Mungu wenu amewapa. 16Mkivunja agano la BWANA Mungu wenu, alilowaagiza, na kwenda kutumikia miungu mingine na kuisujudia, hasira ya BWANA itawaka dhidi yenu, nanyi mtafutiliwa mbali upesi kutoka nchi nzuri aliyowapa.”