Yoshua 3

1Yoshua aliamka mapema asubuhi. Yeye pamoja na Waisraeli wote waliondoka Shitimu, wakafika Yordani, wakalala huko usiku kabla ya kuvuka. 2Siku tatu zilipokwisha, maafisa walipita katika kambi yote. 3Wakawapa watu agizo hili: “Mara mtakapowaona makuhani Walawi wakilibeba sanduku la agano la BWANA Mungu wenu, ondokeni mahali mlipo mlifuate. 4Lakini acheni nafasi ya kama mita 900 kati yenu na sanduku hilo; msilikaribie. Ndipo mtakapojua njia ya kupita, kwa sababu hamjawahi kupita njia hii kabla.”

5Yoshua aliwaambia watu, “Jiwekeni wakfu, kwa sababu kesho BWANA atafanya maajabu miongoni mwenu.” 6Yoshua aliwaambia makuhani, “Libebeni sanduku la agano mvuke mkiwatangulia watu.” Basi wakalibeba sanduku la agano, wakawatangulia watu.

7Kisha BWANA alimwambia Yoshua, “Leo nitaanza kukuinua machoni pa Israeli wote, ili wajue kwamba nitakuwa pamoja nawe kama nilivyokuwa pamoja na Musa. 8Sasa wewe uwape agizo makuhani wanaolibeba sanduku la agano: ‘Mkishafika ukingoni mwa maji ya Yordani, simameni mtoni.’”

9Yoshua aliwaambia Waisraeli, “Njooni hapa msikilize maneno ya BWANA Mungu wenu.” 10Yoshua aliendelea, “Hivi ndivyo mtakavyojua kwamba Mungu aliye hai yuko kati yenu, na kwamba hakika atawafukuza mbele yenu Wakanaani, Wahiti, Wahivi, Waperizi, Wagirgashi, Waamori na Wayebusi. 11Angalieni, sanduku la agano la Bwana wa dunia yote linawatangulia kuingia Yordani. 12Sasa chagueni watu kumi na wawili kutoka katika makabila ya Israeli, mtu mmoja kutoka kila kabila. 13Makuhani wanaolibeba sanduku la BWANA, Bwana wa dunia yote, wataweka nyayo za miguu yao katika maji ya Yordani, na mara watakapofanya hivyo, maji ya Yordani yatakatika. Maji yanayotiririka kutoka juu yatasimama kama chungu moja.” 14Basi watu walipovunja kambi ili kuvuka Yordani, makuhani wakiwa wamelibeba sanduku la agano mbele yao, 15na mara wale waliolibeba sanduku walipofika Yordani, miguu ya makuhani ikagusa ukingo wa maji (Yordani hufurika kingo zake zote wakati wote wa mavuno), 16maji yaliyotiririka kutoka juu yalisimama. Yakainuka kama chungu moja mbali sana, huko Adamu, mji ulio karibu na Sarethani, na maji yaliyotiririka kwenda Bahari ya Araba, yaani Bahari ya Chumvi, yakakatika kabisa. Nao watu wakavuka mkabala na Yeriko. 17Makuhani waliolibeba sanduku la agano la BWANA walisimama imara juu ya nchi kavu katikati ya Yordani. Wakati huo Israeli wote walivuka juu ya nchi kavu, mpaka taifa lote lilipomaliza kuvuka.