Yoshua 18

1Jumuiya yote ya Waisraeli ilikusanyika huko Shilo, wakasimamisha Hema la Kukutania huko. Nchi sasa ilikuwa imetiishwa mbele yao. 2Lakini kati ya Waisraeli bado yalikuwepo makabila saba ambayo hayakuwa yamepewa urithi wao. 3Basi Yoshua akawaambia Waisraeli, “Mtasita mpaka lini kwenda kuimiliki nchi ambayo BWANA, Mungu wa baba zenu, amewapa? 4Chagueni watu watatu kutoka kila kabila, nami nitawatuma. Waondoke, wazunguke katika nchi, waandike maelezo yake kwa ajili ya kuigawa kuwa urithi wao, kisha warudi kwangu. 5Waigawe katika mafungu saba. Yuda atabaki na eneo lake upande wa kusini, na nyumba ya Yusufu itabaki na eneo lake upande wa kaskazini. 6Mtaeleza nchi katika mafungu saba, na kuniletea hapa maelezo hayo. Kisha hapa, mbele za BWANA Mungu wetu, nitawapigia kura. 7Walawi hawana fungu kati yenu, kwa sababu ukuhani wa BWANA ndio urithi wao. Nao Gadi, Reubeni na nusu ya kabila la Manase tayari wana urithi wao upande wa mashariki wa Yordani, nchi ambayo Musa mtumishi wa BWANA aliwapa.” 8Basi watu wakaondoka. Walipokuwa wakienda kuieleza nchi, Yoshua aliwaagiza hivi: “Nendeni mkazunguke katika nchi, mwandike maelezo yake, mrudi kwangu. Kisha hapa Shilo, mbele za BWANA, nitawapigia kura.” 9Watu walienda wakasafiri katika nchi. Waliieleza mji kwa mji katika mafungu saba, wakiandika katika kitabu, wakarudi kwa Yoshua kambini huko Shilo. 10Yoshua aliwapigia kura huko Shilo mbele za BWANA, na huko akaigawa nchi kati ya Waisraeli, akilipa kila kabila fungu lake.

11Kura ya kwanza ilitoka kwa kabila la Benyamini, ukoo kwa ukoo. Eneo lililowaangukia lilikuwa kati ya watu wa Yuda na watu wa Yusufu. 12Upande wa kaskazini mpaka wao ulianzia Yordani. Unapanda mteremko ulio kaskazini mwa Yeriko, unapanda kuelekea magharibi kupitia nchi ya milima, na kutokea kwenye nyika ya Beth-aveni. 13Kutoka huko mpaka unapita kuelekea Luzu, kando ya mteremko wa kusini wa Luzu (yaani Betheli), na kushuka hadi Atarothi-adari, juu ya kilima kilicho kusini mwa Beth-horoni ya Chini. 14Kisha mpaka unapinda na kugeuka kusini upande wa magharibi, kutoka kilima kinachoelekeana na Beth-horoni upande wa kusini, na kuishia Kiriath-baali (yaani Kiriath-yearimu), mji wa watu wa Yuda. Huo ndio upande wa magharibi. 15Upande wa kusini unaanzia ukingo wa Kiriath-yearimu. Mpaka unatokea kuelekea magharibi hadi chemchemi ya maji ya Neftoa. 16Kisha mpaka unashuka hadi chini ya kilima kinachoelekeana na Bonde la Ben-hinomu, upande wa kaskazini wa Bonde la Refaimu. Unashuka Bonde la Hinomu kando ya mteremko wa kusini wa mji wa Wayebusi, hadi En-rogeli. 17Kutoka hapo unapinda kuelekea kaskazini, unatokea En-shemeshi, kisha Gelilothi, ulio mkabala na Mwinuko wa Adumimu, na kushuka hadi Jiwe la Bohani mwana wa Reubeni. 18Unapita hadi mteremko wa kaskazini unaoelekeana na Araba, na kushuka kuingia Araba. 19Mpaka unapita hadi mteremko wa kaskazini wa Beth-hogla, na kuishia kwenye ghuba ya kaskazini ya Bahari ya Chumvi, mahali Yordani inapoingia baharini upande wa kusini. Huo ndio mpaka wa kusini. 20Yordani ndio mpaka wake upande wa mashariki. Huu ndio urithi wa kabila la Benyamini, ukoo kwa ukoo, pamoja na mipaka yake pande zote. 21Miji ya kabila la Benyamini, ukoo kwa ukoo, ilikuwa hii: Yeriko, Beth-hogla, Emek-kesisi, 22Beth-araba, Semaraimu, Betheli, 23Avimu, Para, Ofra, 24Kefar-amona, Ofni na Geba, jumla miji kumi na miwili pamoja na vijiji vyake. 25Kisha Gibeoni, Rama, Beerothi, 26Mispe, Kefira, Mosa, 27Rekemu, Irpeeli, Tarala, 28Sela, Haelefu, Yebusi (yaani Yerusalemu), Gibea na Kiriathi, jumla miji kumi na minne pamoja na vijiji vyake. Huu ndio urithi wa kabila la Benyamini, ukoo kwa ukoo.