Yoshua 22

1Ndipo Yoshua akawaita Wareubeni, Wagadi na nusu ya kabila la Manase. 2Akawaambia, “Mmetekeleza yote ambayo Musa mtumishi wa BWANA aliwaamuru, na katika kila jambo nililowaamuru mmenitii. 3Muda huu wote mrefu, mpaka leo hii, hamkuwaacha Waisraeli wenzenu. Mmetekeleza kwa uaminifu wajibu ambao BWANA Mungu wenu aliamuru. 4Sasa BWANA Mungu wenu amewapa Waisraeli wenzenu raha, kama alivyowaahidi. Basi sasa rudini nyumbani hemani mwenu, katika nchi iliyo yenu wenyewe, ambayo Musa mtumishi wa BWANA aliwapa ng’ambo ya Yordani. 5Lakini jihadharini sana kutekeleza amri na sheria ambayo Musa mtumishi wa BWANA aliwapa: mpendeni BWANA Mungu wenu, tembeeni katika njia zake zote, shikeni amri zake, ambataneni naye, na mtumikieni kwa moyo wenu wote na kwa nafsi yenu yote.” 6Kisha Yoshua akawabariki, akawaaga, nao wakaenda nyumbani hemani mwao.

7Musa alikuwa amewapa nusu moja ya kabila la Manase nchi katika Bashani; nusu nyingine Yoshua alikuwa amewapa nchi upande wa magharibi wa Yordani, kando ya Waisraeli wenzao. Yoshua alipoyaaga makabila ya mashariki yaende nyumbani, aliwabariki 8akawaambia, “Rudini nyumbani kwenu na utajiri mwingi: makundi makubwa ya mifugo, fedha, dhahabu, shaba na chuma, na mavazi mengi sana. Gawanyeni nyara mlizowateka adui zenu pamoja na jamaa zenu walio nyumbani.”

9Basi Wareubeni, Wagadi na nusu ya kabila la Manase walirudi, wakaachana na Waisraeli huko Shilo, katika nchi ya Kanaani, ili waende nchi ya Gileadi. Hiyo ilikuwa nchi yao wenyewe, iliyokuwa yao kwa agizo la BWANA lililotolewa kupitia Musa. 10Walipofika katika eneo lililo kando ya Yordani, katika nchi ya Kanaani, Wareubeni, Wagadi na nusu ya kabila la Manase walijenga madhabahu huko kando ya Yordani, madhabahu kubwa ya kuvutia macho. 11Ndipo Waisraeli wakasikia habari: “Wareubeni, Wagadi na nusu ya kabila la Manase wamejenga madhabahu kwenye ukingo wa nchi ya Kanaani, katika eneo lililo kando ya Yordani, upande wa Waisraeli.” 12Waisraeli waliposikia hayo, jumuiya yote ya Waisraeli ilikusanyika huko Shilo ili kwenda kupigana nao.

13Basi Waisraeli walimtuma Finehasi mwana wa Eleazari kuhani kwa Wareubeni, Wagadi na nusu ya kabila la Manase katika nchi ya Gileadi. 14Pamoja naye walikwenda viongozi kumi, kiongozi mmoja kutoka kila jamaa kwa kila kabila la Israeli. Kila mmoja wao alikuwa mkuu wa jamaa yake kati ya koo za Israeli. 15Walikwenda katika nchi ya Gileadi, kwa Wareubeni, Wagadi na nusu ya kabila la Manase, wakasema nao: 16“Jumuiya yote ya BWANA inasema hivi: ‘Mmewezaje kuvunja uaminifu namna hii dhidi ya Mungu wa Israeli? Leo mmegeuka mkaacha kumfuata BWANA kwa kujijengea madhabahu, mkiasi dhidi ya BWANA leo hii. 17Je, dhambi ya Peori haikututosha? Mpaka leo hatujajitakasa nayo, ingawa tauni iliipiga jumuiya ya BWANA. 18Na sasa leo mnageuka na kuacha kumfuata BWANA! Mkiasi dhidi ya BWANA leo, kesho atakasirika na jumuiya yote ya Israeli. 19Lakini ikiwa nchi mnayoimiliki ni najisi, vukeni mje katika nchi ya BWANA mwenyewe, mahali ambapo maskani ya BWANA imesimama, mpate sehemu ya nchi kati yetu. Ila msimwasi BWANA, wala msituasi sisi, kwa kujijengea madhabahu nyingine mbali na madhabahu ya BWANA Mungu wetu. 20Akani mwana wa Zera alipovunja uaminifu kuhusu vitu vilivyowekwa wakfu kwa maangamizi, je, ghadhabu haikuiangukia jumuiya yote ya Israeli? Yeye alikuwa mtu mmoja tu, lakini hakuwa peke yake aliyekufa kwa sababu ya dhambi yake.’”

21Ndipo Wareubeni, Wagadi na nusu ya kabila la Manase wakawajibu wakuu wa koo za Israeli: 22“Mwenye Nguvu, Mungu, BWANA! Mwenye Nguvu, Mungu, BWANA! Yeye anajua, na Israeli nao wajue! Ikiwa hili lilikuwa uasi au kukosa uaminifu dhidi ya BWANA, usituhurumie leo, 23ikiwa tulijijengea madhabahu ili tugeuke tusimfuate BWANA, au kutolea juu yake sadaka za kuteketezwa na sadaka za nafaka, au kutoa juu yake sadaka za amani, BWANA mwenyewe na atudai. 24Hapana, tulifanya hivi kwa sababu tulikuwa na wasiwasi juu ya yatakayotokea. Tuliwaza kwamba siku moja wazao wenu wangeweza kuwaambia wazao wetu, ‘Mna uhusiano gani ninyi na BWANA, Mungu wa Israeli? 25BWANA ameufanya Yordani kuwa mpaka kati yetu na ninyi, enyi Wareubeni na Wagadi. Ninyi hamna sehemu katika BWANA.’ Kwa njia hiyo wazao wenu wangeweza kuwafanya wazao wetu waache kumcha BWANA. 26Kwa hiyo tukasema, ‘Na tuchukue hatua tujenge madhabahu, si kwa ajili ya sadaka za kuteketezwa wala kwa ajili ya dhabihu, 27bali iwe ushahidi kati yetu na ninyi, na kati ya vizazi vitakavyokuja baada yetu, kwamba tutamwabudu BWANA mbele yake kwa kuleta sadaka zetu za kuteketezwa, dhabihu na sadaka za amani. Hivyo wazao wenu hawataweza kamwe kuwaambia wazao wetu siku zijazo, “Ninyi hamna sehemu katika BWANA.”’ 28Tulisema, ‘Ikiwa siku moja hilo litasemwa kwetu au kwa wazao wetu, jibu letu litakuwa, “Tazameni mfano huu wa madhabahu ya BWANA, ambao baba zetu waliufanya. Si kwa ajili ya sadaka za kuteketezwa wala dhabihu. Ni ushahidi kati yetu na ninyi.”’ 29Hasha sisi kumwasi BWANA na kuacha kumfuata BWANA leo kwa kujenga madhabahu kwa ajili ya sadaka za kuteketezwa, sadaka za nafaka au dhabihu mbali na madhabahu ya BWANA Mungu wetu iliyosimama mbele ya maskani yake.”

30Finehasi kuhani na viongozi wa jumuiya, wakuu wa koo za Israeli waliokuwa pamoja naye, waliposikia maneno ya Wareubeni, Wagadi na nusu ya kabila la Manase, waliridhika. 31Finehasi mwana wa Eleazari kuhani akawaambia Wareubeni, Wagadi na nusu ya kabila la Manase, “Leo tunajua kwamba BWANA yuko katikati yetu, kwa kuwa hamkuvunja uaminifu kwa BWANA namna hii. Kwa hili mmewaokoa Waisraeli kutoka mkononi mwa BWANA.” 32Kisha Finehasi mwana wa Eleazari kuhani na viongozi waliwaacha Wareubeni na Wagadi katika nchi ya Gileadi, wakarudi katika nchi ya Kanaani kwa Waisraeli, wakawapa taarifa yao. 33Taarifa hiyo iliwapendeza Waisraeli, nao wakamsifu Mungu. Hawakusema tena juu ya kwenda kupigana nao vita ili kuiharibu nchi waliyoishi Wareubeni na Wagadi. 34Wareubeni na Wagadi waliiita madhabahu hiyo Shahidi, wakisema, “kwa sababu ni shahidi kati yetu kwamba BWANA ndiye Mungu.”