Yoshua 11

1Yabini mfalme wa Hazori aliposikia habari hizi, alituma ujumbe kwa Yobabu mfalme wa Madoni, kwa mfalme wa Shimroni, kwa mfalme wa Akshafu, 2na kwa wafalme wa kaskazini, wale wa nchi ya milima, wa Araba kusini mwa Kinerethi, wa vilima vya chini, na wa nyanda za juu za Dori upande wa magharibi, 3kwa Wakanaani wa mashariki na wa magharibi, kwa Waamori, Wahiti, Waperizi na Wayebusi wa nchi ya milima, na kwa Wahivi chini ya Mlima Hermoni katika eneo la Mizpa. 4Walitoka na majeshi yao yote, jeshi lisilohesabika kama mchanga ufuoni mwa bahari, pamoja na farasi na magari ya vita mengi sana. 5Wafalme hao wote waliunganisha majeshi yao; walikuja wakapiga kambi pamoja kwenye maji ya Meromu, ili kupigana na Israeli.

6BWANA alimwambia Yoshua, “Usiwaogope. Kesho saa kama hii nitawalaza wote wakiwa wamekufa mbele ya Israeli. Utawakata farasi wao mishipa ya miguu na kuyateketeza kwa moto magari yao ya vita.” 7Basi Yoshua na wapiganaji wake wote waliwajia ghafla kwenye maji ya Meromu, wakawashambulia. 8BWANA aliwatia mikononi mwa Israeli, nao wakawashinda na kuwafukuza hadi Sidoni Kuu na Misrefoth-maimu, na upande wa mashariki hadi bonde la Mizpe. Waliendelea kuwapiga mpaka hakubaki hata mmoja. 9Yoshua aliwatendea kama BWANA alivyomwambia: aliwakata farasi wao mishipa ya miguu na kuyateketeza kwa moto magari yao ya vita.

10Wakati huo Yoshua alirudi, akauteka Hazori, akamuua mfalme wake kwa upanga, kwa kuwa hapo zamani Hazori ulikuwa mkuu wa falme hizo zote. 11Walimuua kwa upanga kila mtu aliyekuwamo, wakiwaweka wakfu kwa maangamizi, wala hakubaki mtu yeyote mwenye pumzi. Kisha Yoshua aliuteketeza Hazori kwa moto. 12Yoshua aliiteka miji yote ya wafalme hao, pamoja na wafalme wao pia, akawaua kwa upanga. Aliwaweka wakfu kwa maangamizi, kama Musa mtumishi wa BWANA alivyoamuru. 13Lakini Israeli hawakuteketeza mji wowote kati ya miji iliyosimama juu ya vilima vyake, isipokuwa Hazori peke yake, ambao Yoshua aliuteketeza. 14Waisraeli walijichukulia nyara zote za miji hiyo pamoja na mifugo. Lakini kila mwanadamu walimuua kwa upanga mpaka walipowaangamiza wote; hawakumwacha mtu yeyote hai. 15Kama vile BWANA alivyomwamuru Musa mtumishi wake, ndivyo Musa alivyokuwa amemwamuru Yoshua, na ndivyo Yoshua alivyofanya. Hakuacha jambo lolote bila kulitimiza kati ya yote ambayo BWANA alimwamuru Musa. 16Basi Yoshua aliitwaa nchi hii yote: nchi ya milima, Negebu yote, nchi yote ya Gosheni, vilima vya chini, Araba, na nchi ya milima ya Israeli pamoja na vilima vyake vya chini, 17kuanzia Mlima Halaki unaopanda kuelekea Seiri, hadi Baal-gadi katika bonde la Lebanoni chini ya Mlima Hermoni. Aliwateka wafalme wao wote, akawapiga na kuwaua. 18Yoshua alipigana vita na wafalme hao wote kwa muda mrefu. 19Hakuna mji uliofanya amani na Waisraeli isipokuwa Wahivi walioishi Gibeoni. Miji mingine yote waliitwaa kwa vita. 20Kwa maana ni BWANA aliyeifanya mioyo yao kuwa migumu, hata wakatoka kupigana na Israeli, ili wawekwe wakfu kwa maangamizi bila kuhurumiwa, bali waangamizwe, kama BWANA alivyomwamuru Musa.

21Wakati huo Yoshua alikwenda akawaangamiza Waanaki kutoka nchi ya milima: kutoka Hebroni, Debiri na Anabu, na kutoka nchi yote ya milima ya Yuda na ya Israeli. Aliwaweka wakfu kwa maangamizi pamoja na miji yao. 22Katika nchi ya Waisraeli hawakubaki Waanaki wowote; baadhi yao walibaki tu huko Gaza, Gathi na Ashdodi. 23Basi Yoshua aliitwaa nchi yote, kama BWANA alivyomwambia Musa, akawapa Israeli iwe urithi wao, akaigawa kwa makabila yao. Nayo nchi ikawa na amani bila vita.