Yoshua 5

1Wafalme wote wa Waamori upande wa magharibi wa Yordani, na wafalme wote wa Wakanaani kando ya bahari, walisikia jinsi BWANA alivyoyakausha maji ya Yordani mbele ya Waisraeli mpaka walipomaliza kuvuka. Waliposikia hayo, mioyo yao iliyeyuka, wala hawakubaki na ujasiri wa kuwakabili Waisraeli.

2Wakati huo BWANA alimwambia Yoshua, “Tengeneza visu vya mawe magumu, uwatahiri tena wanaume wa Israeli, mara ya pili.” 3Basi Yoshua alitengeneza visu vya mawe magumu, akawatahiri wanaume wa Israeli kwenye Kilima cha Magovi. 4Hii ndiyo sababu Yoshua aliwatahiri: watu wote waliotoka Misri, wanaume wote, kila mwanamume aliyefikia umri wa vita, walikuwa wamekufa nyikani njiani baada ya kutoka Misri. 5Watu wote waliotoka Misri walikuwa wametahiriwa, lakini hakuna hata mmoja wa watu waliozaliwa nyikani wakati wa safari baada ya kutoka Misri aliyekuwa ametahiriwa. 6Kwa maana Waisraeli walisafiri nyikani miaka arobaini, mpaka taifa lile lote, watu wa vita waliotoka Misri, lilipokwisha kufa, kwa sababu hawakuisikiliza sauti ya BWANA. BWANA aliwaapia kwamba hawataiona nchi aliyowaahidi baba zao kwa kiapo kwamba atatupa, nchi itiririkayo maziwa na asali. 7Wana wao, ambao alikuwa amewainua mahali pao, ndio Yoshua aliowatahiri. Walikuwa hawajatahiriwa, kwa sababu hakuna aliyewatahiri njiani. 8Kutahiriwa kwa taifa lote kulipokwisha, walikaa mahali pao kambini mpaka walipopona.

9Kisha BWANA alimwambia Yoshua, “Leo nimeivingirisha mbali nanyi aibu ya Misri.” Kwa hiyo mahali pale panaitwa Gilgali hadi leo. 10Waisraeli walipokuwa wamepiga kambi huko Gilgali, waliiadhimisha Pasaka jioni ya siku ya kumi na nne ya mwezi, katika nchi tambarare za Yeriko. 11Siku iliyofuata Pasaka, siku hiyo hiyo, walikula baadhi ya mazao ya nchi: mikate isiyotiwa chachu na nafaka iliyokaangwa. 12Mana ilikoma siku iliyofuata baada ya kula mazao ya nchi. Waisraeli hawakuwa na mana tena; mwaka ule walikula mavuno ya nchi ya Kanaani.

13Wakati mmoja Yoshua alipokuwa karibu na Yeriko, aliinua macho, na hapo mbele yake alisimama mtu aliyeshika upanga uliofutwa mkononi mwake. Yoshua alimwendea, akamwuliza, “Je, wewe uko upande wetu au upande wa adui zetu?” 14Akajibu, “Hapana. Mimi ni mkuu wa jeshi la BWANA, na sasa nimekuja.” Ndipo Yoshua alijitupa chini kifudifudi, akasujudu. Akamwambia, “Bwana wangu anataka kumwambia nini mtumishi wake?” 15Mkuu wa jeshi la BWANA alimwambia Yoshua, “Vua viatu miguuni mwako, kwa sababu mahali unaposimama ni patakatifu.” Naye Yoshua akafanya hivyo.