Yoshua 24

1Yoshua aliyakusanya makabila yote ya Israeli huko Shekemu. Akawaita wazee wa Israeli, viongozi wake, waamuzi wake na maafisa wake, nao wakasimama mbele za Mungu. 2Ndipo Yoshua akawaambia watu wote, “BWANA, Mungu wa Israeli, anasema hivi: ‘Zamani za kale baba zenu waliishi upande wa pili wa Mto, yaani Tera, baba wa Abrahamu na wa Nahori, nao walitumikia miungu mingine. 3Lakini nilimchukua baba yenu Abrahamu kutoka upande wa pili wa Mto, nikamwongoza katika nchi yote ya Kanaani. Nikawafanya wazao wake kuwa wengi, nikampa Isaka. 4Isaka nilimpa Yakobo na Esau. Esau nilimpa nchi ya milima ya Seiri iwe yake, lakini Yakobo na wanawe walishuka Misri. 5Niliwatuma Musa na Haruni, nikaipiga Misri kwa mapigo kwa yale niliyoyafanya kati ya watu wake. Baada ya hayo niliwatoa ninyi. 6Nilipowatoa baba zenu kutoka Misri nanyi mkafika baharini, Wamisri waliwafuatia baba zenu kwa magari ya vita na wapanda farasi hadi Bahari ya Shamu. 7Ndipo walipomlilia BWANA, naye akaweka giza kati yenu na Wamisri. Akaileta bahari juu yao, ikawafunika. Mliona kwa macho yenu wenyewe niliyoyafanya Misri. Kisha mkaishi nyikani kwa muda mrefu. 8Niliwaleta katika nchi ya Waamori walioishi upande wa mashariki wa Yordani. Walipigana nanyi, lakini niliwatia mikononi mwenu. Mliichukua nchi yao iwe yenu, nami nikawaangamiza mbele yenu. 9Kisha Balaki mwana wa Sipori, mfalme wa Moabu, aliinuka akapigana vita na Israeli. Akatuma watu wamwite Balaamu mwana wa Beori ili awalaani. 10Lakini sikukubali kumsikiliza Balaamu. Badala yake aliwabariki tena na tena, nami nikawaokoa kutoka mkononi mwake. 11Kisha mlivuka Yordani mkafika Yeriko. Wakuu wa Yeriko walipigana nanyi, na vivyo hivyo Waamori, Waperizi, Wakanaani, Wahiti, Wagirgashi, Wahivi na Wayebusi, lakini niliwatia mikononi mwenu. 12Nilituma mavu mbele yenu, nayo yakawafukuza mbele yenu, wale wafalme wawili wa Waamori. Haikuwa kwa upanga wako wala kwa upinde wako. 13Niliwapa nchi ambayo hamkuifanyia kazi na miji ambayo hamkuijenga, nanyi mnaishi ndani yake. Mnakula matunda ya mashamba ya mizabibu na mizeituni ambayo hamkuipanda.’ 14Basi sasa mcheni BWANA na kumtumikia kwa moyo mkamilifu na kwa uaminifu. Iondoeni kati yenu miungu ambayo baba zenu waliitumikia upande wa pili wa Mto na huko Misri, mkamtumikie BWANA. 15Ikiwa kumtumikia BWANA kunaonekana vibaya kwenu, basi fanyeni uchaguzi wenu leo. Mtamtumikia nani? Miungu ambayo babu zenu waliitumikia upande wa pili wa Mto, au miungu ya Waamori ambao sasa mnaishi katika nchi yao? Mimi na watu wa nyumbani mwangu tutamtumikia BWANA.”

16Watu wakajibu, “Hatutamwacha BWANA kamwe ili kutumikia miungu mingine! 17Ni BWANA Mungu wetu aliyetupandisha sisi na baba zetu kutoka nchi ya Misri, kutoka nyumba ya utumwa. Yeye alifanya ishara hizi kubwa mbele ya macho yetu, akatulinda katika njia yote tuliyosafiri na kati ya mataifa yote tuliyopita katikati yao. 18BWANA aliwafukuza mbele yetu watu wote, hata Waamori walioishi katika nchi. Kwa hiyo sisi nasi tutamtumikia BWANA, kwa sababu yeye ndiye Mungu wetu.”

19Yoshua akawaambia watu, “Hamtaweza kumtumikia BWANA, kwa sababu yeye ni Mungu mtakatifu, Mungu mwenye wivu; hatausamehe uasi wenu na dhambi zenu. 20Mkimwacha BWANA na kutumikia miungu ya wageni, atawageukia. Atawaletea mabaya na kuwakomesha, baada ya mema yote aliyowatendea.” 21Lakini watu wakamwambia Yoshua, “Hapana! Tutamtumikia BWANA.” 22Ndipo Yoshua akawaambia watu, “Ninyi ni mashahidi juu yenu wenyewe kwamba mmejichagulia BWANA na mtamtumikia.” Wakajibu, “Sisi ni mashahidi.” 23“Basi iondoeni miungu ya kigeni iliyo kati yenu,” akasema, “na kuielekeza mioyo yenu kwa BWANA, Mungu wa Israeli.” 24Na watu wakamwambia Yoshua, “Ni BWANA Mungu wetu tutakayemtumikia, na ni sauti yake tutakayoitii.” 25Basi Yoshua akafanya agano kwa ajili ya watu siku ile, na huko Shekemu akawawekea kanuni na agizo. 26Yoshua aliyaandika maneno haya katika kitabu cha sheria ya Mungu. Pia alichukua jiwe kubwa akalisimamisha huko chini ya mwaloni uliokuwa karibu na mahali patakatifu pa BWANA.

27Yoshua akawaambia watu wote, “Mnaliona jiwe hili? Litasimama kuwa shahidi dhidi yetu, kwa maana limesikia kila neno ambalo BWANA alituambia. Litakuwa shahidi dhidi yenu, msije mkamkana Mungu wenu.” 28Kisha Yoshua akawaaga watu, kila mtu aende kwenye urithi wake mwenyewe.

29Baada ya matukio hayo, Yoshua mwana wa Nuni, mtumishi wa BWANA, alikufa akiwa na umri wa miaka 110. 30Walimzika ndani ya mipaka ya urithi wake mwenyewe, huko Timnath-sera, kaskazini mwa Mlima Gaashi katika nchi ya milima ya Efraimu. 31Israeli walimtumikia BWANA katika maisha yote ya Yoshua, na katika maisha ya wazee walioishi baada yake, waliokuwa wameijua wenyewe kila kazi ambayo BWANA alikuwa amewafanyia Israeli. 32Mifupa ya Yusufu, ambayo Waisraeli walikuwa wameipandisha kutoka Misri, ilizikwa huko Shekemu, katika kipande cha ardhi ambacho Yakobo alikuwa amekinunua kutoka kwa wana wa Hamori, baba wa Shekemu, kwa vipande mia moja vya fedha. Kikawa sehemu ya urithi wa wazao wa Yusufu. 33Eleazari mwana wa Haruni naye alikufa. Walimzika huko Gibea, mji wa kilimani wa mwanawe Finehasi, ambao Finehasi alikuwa amepewa katika nchi ya milima ya Efraimu.