Yoshua 16

1Nchi waliyogawiwa wazao wa Yusufu ilianzia Yordani karibu na Yeriko, mashariki ya chemchemi za Yeriko, ikapita katika nyika inayopanda kutoka Yeriko kuingia nchi ya milima hadi Betheli. 2Kutoka Betheli unaendelea hadi Luzu na kupita hadi Atarothi, katika eneo la Waarki. 3Kisha unashuka kuelekea magharibi hadi eneo la Wayafleti, hadi eneo la Beth-horoni ya Chini, na kuendelea hadi Gezeri, nao unaishia baharini. 4Hivyo wazao wa Yusufu, Manase na Efraimu, walipokea urithi wao. 5Hili ndilo lililokuwa eneo la Waefraimu, ukoo kwa ukoo. Mpaka wa urithi wao upande wa mashariki ulianzia Atarothi-adari hadi Beth-horoni ya Juu, 6na kutokea baharini. Kutoka Mikmethathi upande wa kaskazini mpaka unageuka kuelekea mashariki hadi Taanath-shilo, na kuupita upande wa mashariki hadi Yanoa. 7Kutoka Yanoa unashuka hadi Atarothi na Naara, unafika Yeriko, na kutokea Yordani. 8Kutoka Tapua mpaka unaenda magharibi kando ya Bonde la Kana na kuishia baharini. Huu ndio urithi wa kabila la Efraimu, ukoo kwa ukoo, 9pamoja na miji iliyotengwa kwa ajili ya Waefraimu ndani ya urithi wa Wamanase, miji hiyo yote na vijiji vyake. 10Lakini hawakuwafukuza Wakanaani walioishi Gezeri, na kwa hiyo Wakanaani wameishi kati ya Waefraimu mpaka leo, ingawa walilazimishwa kufanya kazi za kutumikishwa.