Yoshua 13

1Yoshua alikuwa sasa amezeeka, akiwa na umri mkubwa. BWANA akamwambia, “Umezeeka, na umri wako ni mkubwa, na bado imebaki sehemu kubwa sana ya nchi ili itwaliwe. 2Hii ndiyo nchi iliyobaki: maeneo yote ya Wafilisti na nchi yote ya Wageshuri, 3kutoka Shihori, mashariki ya Misri, hadi mpaka wa Ekroni upande wa kaskazini, nchi inayohesabiwa kuwa ya Wakanaani. Kuna watawala watano wa Wafilisti, wa Gaza, Ashdodi, Ashkeloni, Gathi na Ekroni, na kuna Waavi, 4upande wa kusini, nchi yote ya Wakanaani, na Meara ya Wasidoni, hadi Afeki na mpaka wa Waamori; 5na nchi ya Wagebali, na Lebanoni yote upande wa mawio ya jua, kutoka Baal-gadi chini ya Mlima Hermoni hadi Lebo-hamathi; 6wote wanaoishi katika nchi ya milima kutoka Lebanoni hadi Misrefoth-maimu, Wasidoni wote. Mimi ndiye nitakayewafukuza mbele ya Waisraeli. Wewe ugawe tu nchi hii kwa Israeli iwe urithi, kama nilivyokuamuru. 7Basi sasa igawe nchi hii iwe urithi wa makabila tisa na nusu ya kabila la Manase.” 8Pamoja na nusu nyingine ya Manase, Wareubeni na Wagadi walikuwa wamepokea urithi wao, ambao Musa aliwapa upande wa mashariki wa Yordani, kama Musa mtumishi wa BWANA alivyokuwa amewagawia, 9kutoka Aroeri ukingoni mwa Bonde la Arnoni, na mji ulio katikati ya bonde, na uwanda wote wa juu wa Medeba hadi Diboni, 10na miji yote ya Sihoni mfalme wa Waamori, aliyetawala Heshboni, hadi mpaka wa Waamoni, 11na Gileadi, na eneo la Wageshuri na Wamaakathi, Mlima Hermoni wote, na Bashani yote hadi Saleka, 12ufalme wote wa Ogu katika Bashani, aliyetawala Ashtarothi na Edrei. Yeye alikuwa mmoja wa watu wa mwisho waliosalia wa Warefai. Musa aliwashinda, akawafukuza. 13Lakini Waisraeli hawakuwafukuza Wageshuri na Wamaakathi, kwa hiyo Geshuri na Maakathi wanaishi kati ya Israeli mpaka leo. 14Ila kabila la Lawi hakulipa urithi. Sadaka za kuteketezwa kwa moto za BWANA, Mungu wa Israeli, ndizo urithi wake, kama alivyoliahidi.

15Musa alilipa kabila la wazao wa Reubeni nchi, ukoo kwa ukoo. 16Eneo lao lilianzia Aroeri ukingoni mwa Bonde la Arnoni, pamoja na mji ulio katikati ya bonde na uwanda wote wa juu karibu na Medeba, 17Heshboni na miji yake yote katika uwanda wa juu: Diboni, Bamoth-baali, Beth-baal-meoni, 18Yahasi, Kedemothi, Mefaathi, 19Kiriathaimu, Sibma, Sereth-shahari juu ya kilima kilicho bondeni, 20Beth-peori, miteremko ya Pisga, na Beth-yeshimothi, 21miji yote ya uwanda wa juu, na ufalme wote wa Sihoni mfalme wa Waamori, aliyetawala Heshboni. Musa alikuwa amemshinda yeye pamoja na viongozi wa Midiani, Evi, Rekemu, Suri, Huri na Reba, wakuu walioshirikiana na Sihoni walioishi katika nchi hiyo. 22Waisraeli walimwua pia kwa upanga Balaamu mwana wa Beori, aliyekuwa mwaguzi, pamoja na wengine waliowaua. 23Mpaka wa Wareubeni ulikuwa Mto Yordani na kingo zake. Huu ndio urithi wa wazao wa Reubeni, ukoo kwa ukoo, miji na vijiji vyake.

24Musa alilipa kabila la Gadi nchi, yaani wazao wa Gadi, ukoo kwa ukoo. 25Eneo lao lilikuwa Yazeri na miji yote ya Gileadi, na nusu ya nchi ya Waamoni, hadi Aroeri mashariki ya Raba, 26na kutoka Heshboni hadi Ramath-mispe na Betonimu, na kutoka Mahanaimu hadi mpaka wa Debiri, 27na bondeni, Beth-haramu, Beth-nimra, Sukothi na Safoni, sehemu iliyobaki ya ufalme wa Sihoni mfalme wa Heshboni, Yordani ukiwa mpaka wake hadi mwisho wa Bahari ya Kinerethi, upande wa mashariki wa Yordani. 28Huu ndio urithi wa wazao wa Gadi, ukoo kwa ukoo, miji na vijiji vyake. 29Musa aliipa nusu ya kabila la Manase nchi. Ilikuwa mali ya nusu ya kabila la wazao wa Manase, ukoo kwa ukoo. 30Eneo lao lilienea kutoka Mahanaimu katika Bashani yote, ufalme wote wa Ogu mfalme wa Bashani, pamoja na vijiji vyote vya Yairi katika Bashani, miji sitini, 31na nusu ya Gileadi, pamoja na Ashtarothi na Edrei, miji ya kifalme ya Ogu katika Bashani. Hii ilipewa wazao wa Makiri mwana wa Manase, yaani nusu ya wazao wa Makiri, ukoo kwa ukoo. 32Huu ndio urithi ambao Musa aligawa katika nyanda za Moabu, ng’ambo ya Yordani kutoka Yeriko, upande wa mashariki.

33Lakini kabila la Lawi Musa hakulipa urithi. BWANA, Mungu wa Israeli, ndiye urithi wao, kama alivyowaahidi.